న్యూఢిల్లీ: పెద్దనోట్ల రద్దుతో దేశవ్యాప్తంగా కరెన్సీ కష్టాలు కొనసాగుతూనే ఉన్నాయి. తమ వద్ద ఉన్న డబ్బులు మార్చుకోవడానికి బ్యాంకుల ముందు పడిగాపులు పడుతున్న ప్రజలు సహనం కోల్పోయి గొడవలకు దిగుతుండగా.. పలుచోట్ల ఖాకీలు పేట్రేగిపోయి లాఠీలు ఝళిపిస్తున్నారు. కరెన్సీ కష్టాలకు సంబంధించి పలు ఘటనలు వెలుగులోకి వచ్చాయి. అవి ఇవి..

ఢిల్లీలో మహిళలు..
నోట్ల రద్దుతో తమ దగ్గర ఉన్న కరెన్సీ మార్చుకునేందుకు ఢిల్లీలోని ఓ బ్యాంకు ముందు మహిళలు, ప్రజలు పెద్దసంఖ్యలో క్యూలైన్లో నిలుచున్నారు. కిలోమీటర్ల మేర బారులు తీరారు. ఈ సమయంలో ఓ మహిళ మధ్యలో వచ్చి నిలబడింది. అంతే వెనుక ఉన్న మహిళ సహనం కోల్పోయి దూషించింది. ఇద్దరు మధ్య మాట మాట పెరిగి చివరకు సిగపట్లు పట్టుకుని ఒకరిపై ఒకరు పిడిగుద్దులు కురిపించుకున్నారు. పక్కనున్న వారు ఎంత ఆపినా ఆగలేదు. చిరవకు పోలీసులు రంగంలోకి దిగితే కానీ పరిస్థితి చక్కబడలేదు.