గొల్లప్రోలు : 
 
 దుర్గాడ గ్రామదేవత వేగులమ్మ శాకాంబరిగా మంగళవారం భక్తులకు దర్శనమిచ్చారు. ఆషాఢ మాసం చివరి రోజు, అమావాస్యను పురస్కరించుకుని అమ్మవారి ఆలయంలో విశేష పూజలు నిర్వహించారు. అమ్మవారిని, ఉత్సవ విగ్రహాన్ని వివిధ రకాల కూరగాయలతో అలంకరించారు. సుమారు 10 అడుగులు పొడవు కలిగిన విగ్రహానికి కూరగాయలు, నిమ్మకాయలతో తయారు చేసిన మాలలను వేశారు. పెద్ద ఎత్తున తరలి వచ్చిన భక్తులు వేగులమ్మకు ముడుపులు, మొక్కులు చెల్లించుకున్నారు.  సుమారు మూడు గంటలపాటు శ్రమించి 200 కిలోల కూరగాయలతో అమ్మవారిని అలంకరించినట్టు ఆలయ అర్చకులు చెరుకూరి వీరబాబు, దత్తు తెలిపారు. శ్రావణమాసం ప్రారంభం సందర్భంగా అమ్మవారి ఆలయం వద్ద ముల్తైదువులకు బుధవారం పసుపు,కుంకుమ అందజేస్తామని చెప్పారు. ఏర్పాట్లను ఆలయకమిటీ పర్యవేక్షించింది.