విజయ్ వసంత్‌కు జోడీగా..

విజయ్ వసంత్‌కు జోడీగా..

 విజయ్‌వసంత్‌తో జోడీ కట్టడానికి రెడీ అవుతున్నారు నటి నికీషా పటేల్. తెలుగులో పవన్‌కళ్యాణ్ సరసన పులి చిత్రం ద్వారా పరిచయమైంది ఈ నికీషా అనంతరం ‘ఓం’  చిత్రాల్లో నటించి తమిళ చిత్రరంగ ప్రవేశం చేశారు. ఇక్కడ ఎన్నమో ఏదో చిత్రంతో పరిచయమైన నికిషా పటేల్‌కు పలు అవకాశాలు తలుపు తడుతున్నాయి. కన్నడంలోను కథానాయికిగా రాణిస్తున్న ఈ ముద్దుగుమ్మకు తమిళంలో తాజాగా విజయ్‌వసంత్‌తో జోడీ కట్టే అవకాశం వచ్చింది. వీరిద్దరు కలిసి శిఖండిగా తెరపైకి రానున్నారు.
 
 ఇంతకుముందు విజయ్ వసంత్ హీరోగా ఎన్నమో నడక్కుదు వంటి విజయవంతమైన చిత్రాల్ని రూపొందించిన రాజపాండి ఈ శిఖండి చిత్రానికి దర్శకత్వం వహించనున్నారు. వి.రికార్డ్స్ పతాకంపై వి.వినోద్ నిర్మించనున్న ఈ చిత్రం గురించి దర్శకుడు తెలుపుతూ ఇది విద్య ప్రయోజనాలను ఆవిష్కరించే చిత్రంగా ఉంటుందన్నారు. విద్య అవశ్యకత గురించి తెలుపుతూ ఇంతకుముందు పలు చిత్రాలు వచ్చినా అలాంటి వాటికి భిన్నంగా ఈ శిఖండి చిత్రం ఉంటుందన్నారు.
 
 ఆరు నెలలు విద్యాధికులతోను, సామాజిక స్పృహ ఉన్న పాత్రికేయ మిత్రులతోను, సుదీర్ఘంగా చర్చించి ఈ చిత్ర కథను తయారు చేసినట్లు తె లిపారు. విద్య, విద్యా సంస్థలు ఎలా ఉండాలన్న విషయాలను తనదైన శైలిలో ఈ చిత్రం ద్వారా చెప్పదలుచుకున్నానని అన్నారు. చిత్రంలో ప్రముఖ దర్శక, నటుడు సముద్రకని ఒక కీలక పాత్రలో నటింపజేసే ప్రయత్నాలు జరుగుతున్నట్లు చెప్పారు. చిత్ర షూటింగ్ త్వరలో ప్రారంభం కానుందని దర్శకుడు రాజపాండి వెల్లడించారు.