సంక్రాంతి కానుక

 సాక్షి, చెన్నై: సంక్రాంతి కానుకగా రాష్ట్రంలో 3.45 కోట్ల మందికి ధోవతులు, చీరలు పంపిణీ చేయాలని ప్రభుత్వం నిర్ణయించింది. ఈ మేరకు వాటి ఉత్పత్తిని వేగవంతం చేయాలని ఆదేశించింది.  సంక్రాంతి పండగ (పొంగల్)ను పురస్కరించుకుని రాష్ట్రంలో ప్రతిఏటా కార్డుదారులకు ఉచితంగా ధోవతులు, చీరలు పంపిణీ చేస్తున్న విషయం తెలిసిందే. ఏ ప్రభుత్వం అధికారంలో ఉన్నా క్రమం తప్పకుండా ఈ కార్యక్రమం చేపడుతున్నారు. ప్రతి ఏటా లబ్ధిదారుల సంఖ్యను ప్రభుత్వం పెంచుతోంది. కుటుంబ కార్డుదారులతో పాటు పేదలకు వీటిని అందజేస్తున్నారు. అలాగే అప్పుడప్పుడూ పండగ సందర్భంగా బియ్యం, చక్కెర లేదా బెల్లం పంపిణీ చేస్తున్నారు. ఈ ఏడాది 3.45 కోట్ల మందికి వీటిని పంపిణీ చేయాలని ప్రభుత్వం నిర్ణయించింది. పండుగ సమీపిస్తుండడంతో వీటి ఉత్పత్తిని వేగవంతం చేశారు. ఇప్పటి వరకు 1.52 కోట్ల ధోవతులు సిద్ధమయ్యాయి. 56 లక్షల చీరలు సిద్ధంగా ఉన్నాయి. మరో వారం, పది రోజుల్లో పూర్తి స్థాయిలో ఉత్పత్తిని పూర్తి చేయాలని ప్రభుత్వం ఆదేశించింది.