TV
ప్రతి ఏడాదిలానే ఈ ఏడాది మెట్‌గాలా ఫ్యాషన్‌ షో సినీ తారల సందడితో అదిరిపోయింది. డిఫరెంట్‌ కాస్ట్యూమ్స్‌తో ఈ వేడుక కన్నుల పండువగా జరిగింది. న్యూయార్క్‌లోని మెట్రోపాలిటిన్‌ మ్యూజియం ఆఫ్‌ ఆర్ట్స్, కాస్ట్యూమ్‌ ఇనిస్టిట్యూట్‌ ఏటా ఒక్కో థీమ్‌తో ఈ కార్యక్రమాన్ని నిర్వహిస్తుంటుంది. ప్రతి ఏడాది మేలో వచ్చే మొదటి సోమవారం ఈ వేడుక న్యూయార్క్‌లో జరుగుతుంది. ఈ కార్యక్రమం ద్వారా సేకరించిన డబ్బును పలు స్వచ్ఛంద సేవా సంస్థలకు విరాళంగా అందిస్తారు.
ఈ ఏడాది ఎప్పటిలాగే చాలామంది హాలీవుడ్‌ తారలు ఈ ఫ్యాషన్‌ షోలో అలరించారు. ‘క్యాంప్‌: నోట్స్‌ ఆన్‌ ఫ్యాషన్‌’ అనేది ఈ మెట్‌గాలా–2019 థీమ్‌. ఈ వేడుకలో ప్రియాంకా చోప్రా, ఆమె భర్త నిక్‌ జోనస్‌ పింక్‌ కార్పెట్‌పై నడిచారు. ఈ జంట సెంటరాఫ్‌ ఎట్రాక్షన్‌ అయింది. ఈ ఈవెంట్‌లో ప్రియాంక పాల్గొనడం ఇది మూడోసారి. అలాగే మరో బ్యూటీ దీపికా పదుకోన్‌ కూడా పాల్గొన్నారు. ఈ సంగతి ఇలా ఉంచితే.. ప్రియాంకా లుక్‌కు నెటిజన్ల నుంచి విమర్శలు వచ్చాయి. ‘ఏమంత బాగాలేవు.. వరస్ట్‌ లుక్‌’ అని పలువురు కామెంట్‌ చేశారు. ‘బెస్ట్‌ కపుల్‌.. వరస్ట్‌ లుక్‌’ అని కూడా కొందరు అన్నారు.
