ప్రతిరోజూ అతడు లండన్ వీధుల్లో ప్రయాణిస్తుంటాడు. కళ్లు లేని తన పట్ల అక్కడ ఎంత వివక్ష చూపిస్తున్నారో అతడికి తెలుసు. కానీ, ఎవరికైనా ఆ విషయం చెప్పాలంటే సాక్ష్యం కావాలంటారు. అందుకోసం భారత సంతతికి చెందిన ఆ అంధుడు ఓ విభిన్నమైన ప్రయత్నం చేశారు. తన పెంపుడు కుక్కకు కెమెరా కట్టి.. ఆ వివక్ష మొత్తాన్ని షూట్ చేశారు. ఆయన పేరు అమిత్ పటేల్. ఐదేళ్ల క్రితం కెరటోకానస్ అనే కంటి వ్యాధి కారణంగా చూపు కోల్పోయారు. ఒక కుక్క సాయంతో లండన్ వీధుల్లో తిరుగుతుంటారు. దాని పేరు కైకా. ఈమధ్య దానికి గోప్రో కెమెరా ఒకటి అమర్చారు. ప్రతిరోజూ లండన్ వాసులు తన పట్ల చూపిస్తున్న వివక్షను ఆ కెమెరా సాయంతో షూట్ చేశారు.