సాక్షి, అమరావతి : ఆంధ్రప్రదేశ్‌లో అమలు చేస్తున్న ‘పంటల నమోదు’ విధానం ఆదర్శనీయమని తెలంగాణా వ్యవసాయశాఖ అధికారుల బృందం కితాబిచ్చింది. తెలంగాణా రాష్ట్రంలోనూ ఇదే విధానాన్ని అమలు చేయాలని తమ ప్రభుత్వం ఆలోచన చేస్తోందని పేర్కొన్నారు. తెలంగాణా రాష్ట్ర వ్యవసాయ శాఖకు చెందిన జాయింట్‌ డైరెక్టర్‌ బాలు నేతృత్వంలోని అధికారుల బృందం మంగళవారం ఏపీలో పర్యటించింది. గుంటూరు వ్యవసాయ కమిషనరేట్‌ కార్యాలయంలో వ్యవసాయ శాఖ కమిషనర్‌ హెచ్‌.అరుణ్‌కుమార్‌తో పాటు ఇతర వ్యవసాయాధికారులతో వారు సమావేశమయ్యారు. ఈ సందర్భంగా పంటల నమోదు అమలు తీరును ఏపీ అధికారులు వివరించారు. ఈ–క్రాప్‌ బుకింగ్‌ ఆధారంగానే  సర్టిఫై చేసిన విత్తనాలు, ఎరువుల పంపిణీతో పాటు పంట కొనుగోలు చేస్తున్నామని తెలిపారు. పంటల రుణాలు, సున్నా వడ్డీ రాయితీ, ఇన్‌పుట్‌ సబ్సిడీ, ఉచిత పంటల బీమా ఇలా ప్రభుత్వం అమలు చేస్తోన్న సంక్షేమ పథకాలకూ పంటల బీమానే ప్రామాణికంగా తీసుకుంటున్నామని వివరించారు. సీజన్‌ ప్రారంభం నుంచి పంట కొనుగోళ్లు పూర్తయ్యే వరకు పంటల నమోదు కొనసాగిస్తున్నామని చెప్పారు. ఏపీ వ్యవసాయ శాఖ ఈ క్రాప్‌ డీడీ జెడ్‌.వెంకటేశ్వరరావు, బీఎల్‌ స్వామి తదితరులు పంటల నమోదు ఏ విధంగా చేస్తున్నారో.. ప్రయోగాత్మకంగా చూపించారు. తెలంగాణ వ్యవసాయ శాఖ ఏడీఏ ఎంఏ మసూద్‌ఖాన్, ఐటీ సెల్‌ ఇన్‌చార్జి బి.శివకుమార్‌ తదితరులు పాల్గొన్నారు. 


 సాక్షి, హైదరాబాద్: వ్యవసాయ సంయుక్త సంచాలకుల(జేడీఏ) వ్యవస్థను రద్దు చేయాలని తెలంగాణ వ్యవసాయశాఖ యోచిస్తోంది. జేడీఏలను ప్రాంతీయ సంయుక్త సంచాలకులు (ఆర్జేడీ)గా నియమించాలని భావిస్తోంది. అందుకోసం ఆర్జేడీ పోస్టును సృష్టించి రెండు మూడు జిల్లాలతో ఒక ప్రాంతీయ సంచాలకు ల కార్యాలయాన్ని ఏర్పాటు చేయాలనుకుం టోంది. అలాగే జేడీఏల స్థానంలో వ్యవసాయ ఉప సంచాలకుల (డీడీఏ)ను జిల్లా బాస్‌లుగా నియమించాలన్న నిర్ణయానికి వచ్చినట్లు తెలి సింది. ప్రభుత్వం కొత్త జిల్లాలను ఏర్పాటు చేయనున్న నేపథ్యంలో వ్యవసాయశాఖలో సంస్కరణలపై చర్చించేందుకు ఆ శాఖ... జేడీఏలతో మేధోమథనం నిర్వహించింది.
 
 అదనంగా ఎంత సిబ్బంది అవసరమో చర్చించింది. అనంతరం ఈ మేరకు ప్రభుత్వానికి ప్రతిపాదన పంపాలని నిర్ణయించినట్లు తెలిసింది. అయితే  జేడీఏ వ్యవస్థను రద్దు చేయొద్దని.. ప్రస్తుతం ఉన్నట్లుగానే ఉంచాలని కొందరు అధికారులు కోరుతున్నారు.
  
 కొత్త పోస్టులు వద్దు... సర్దుబాటు మాత్రమే
 కొత్త జిల్లాలు ఏర్పడినా కొత్త పోస్టుల మంజూరు ఉండదని... ప్రస్తుతం ఉన్న సిబ్బందినే సర్దుబాటు చేయాలని... ఆ మేరకు నిర్ణయాలు తీసుకోవాలని ప్రభుత్వం వ్యవసాయశాఖకు తేల్చి చెప్పింది. దీంతో వ్యవసాయశాఖ అధికారులు మల్లగుల్లాలు పడుతున్నారు. అదనంగా పోస్టులు మంజూరు చేయకుంటే కష్టమని చెబుతున్నారు. ప్రస్తుతం వ్యవసాయశాఖలో 2,246 పోస్టులున్నాయి. అందులో రెండు అదనపు సంచాలకులు, 12 జేడీఏలు, 34 డీడీఏలు, 204 ఏడీఏలు, 882 ఏవోలు, 1,112 ఏఈవోల మంజూరు పోస్టులున్నాయి. వీటికితోడు పబ్లిక్ సర్వీస్ కమిషన్ ద్వారా వెయ్యి ఏఈవో పోస్టులను భర్తీ చేయనున్నారు.
 
 అయితే కొత్త జిల్లాలకు ఈ సిబ్బంది సరిపోరని ఉద్యోగ సంఘాలు చెబుతున్నాయి. రాష్ట్రంలో ఉన్న 1.07 కోట్ల ఎకరాల సాధారణ సాగు భూమి, దాదాపు 55 లక్షల మంది రైతులకు సేవలందించాలంటే ఉన్న మంజూరు పోస్టులు సరిపోవని చెబుతున్నారు.
  
 1,571 పోస్టులు సృష్టించాలి: డీడీఏ
 కొత్త జిల్లాలు ఏర్పడితే అదనంగా 1,571 పోస్టులను సృష్టించాలని అగ్రి డాక్టర్స్ అసోసియేషన్ వ్యవస్థాపక అధ్యక్షుడు, వ్యవసాయశాఖ డీడీఏ  కె.రాములు ఉన్నతాధికారులను కోరుతున్నారు. అందులో రెండు అదనపు సంచాలకులు, 16 జేడీఏలు, 52 డీడీఏలు, 68 ఏడీఏలు, 25 ఏవోలు, 1,408 ఏఈవోల పోస్టులను కొత్తగా మంజూరు చేయాలని కోరారు. జిల్లాల్లో ప్రస్తుతం ఉన్న జేడీఏ వ్యవస్థనే కొనసాగించాలని విజ్ఞప్తి చేశారు. జిల్లా జేడీఏకు అవసరమైన సహకారం అందించేందుకు ఒక డీడీఏ, ఇద్దరు ఏడీఏలు, ముగ్గురు ఏవోలు, ఒక పరిపాలనా అధికారిని ఇవ్వాలన్నారు. ఆ ప్రకారం జేడీఏ వ్యవస్థను బలోపేతం చేయాలని కోరారు.