ముంబై: ఢిల్లీ ముద్దుగుమ్మ ప్రియదర్శిని ఛటర్జీ ఎఫ్‌బీబీ ఫెమినా ‘మిస్ ఇండియా వరల్డ్’ కిరీటాన్ని దక్కించుకుంది. శనివారం రాత్రి ఇక్కడ జరిగిన వేడుకలో సినీ, ఫ్యాషన్ రంగ ప్రముఖుల మధ్య నటుడు షారూక్‌ఖాన్ ఈ అవార్డులను ప్రకటించారు. బెంగళూరు సుందరాంగి సుశ్రుతీకృష్ణా ఫస్ట్ రన్నరప్‌గా, లక్నో భామ పంఖురి గిద్వానీ సెకండ్ రన్నరప్‌గా నిలిచారు. ప్రియదర్శిని ‘మిస్ వరల్డ్ 2016’ అందాల పోటీల్లో భారత్ నుంచి ప్రాతినిధ్యం వహిస్తుంది.
 
 సినీ నిర్మాత కరణ్ జొహార్ ఆధ్వర్యంలో నిర్వహించిన ఈ పోటీలకు బాలీవుడ్ స్టార్లు సంజయ్‌దత్, అర్జున్‌కపూర్, యామీగౌతమ్, కబీర్‌ఖాన్, అమీ జాక్సన్, ఏక్తా కపూర్, మిస్ వరల్డ్ 2015 మిరియా లాలగునా, టెన్నిస్ బ్యూటీ సానియా మిర్జా, డిజైనర్లు మనీష్ మల్హోత్రా, షేన్ పీకాక్ న్యాయనిర్ణేతలుగా వ్యవహరించారు. సినీతారలు వరుణ్‌ధావన్, షాహిద్ కపూర్, టైగర్ షరాఫ్, జాక్వెలిన్ ఫెర్నాండెజ్ తళుకులు, యువ గాయని సునిధి చౌహాన్ దుమ్మురేగే పాటలు ప్రత్యేక ఆకర్షణ.