సాక్షి, ముంబై: ప్రముఖ బాలీవుడ్‌ సీనియర్‌ నటి విద్యాసిన్హా(71) గురువారం ముంబైలోని ఓ ఆస్పత్రిలో కన్నుమూశారు. హృదయ, ఊపిరితిత్తుల వ్యాధితో బాధపడుతున్న ఆమె కొంతకాలంగా వెంటిలేటర్‌పైనే ఉన్నారు. గతంలో అనారోగ్య కారణాలతో బుల్లితెరలో ప్రసారమయ్యే ‘కుల్ఫీ కుమార్‌ బజేవాలా షో’ నుంచి విద్యాసిన్హా తప్పుకున్నారు. అయితే ఆరోగ్యం కుదుటపడిందని భావించి కొన్ని వారాల క్రితం షోలో తిరిగి ఎంట్రీ ఇవ్వగా మళ్లీ అస్వస్థతకు గురయ్యారు. కాగా విద్యాసిన్హా మరణానికి పలువురు బాలీవుడ్‌ ప్రముఖులు సంతాపం తెలిపారు. విద్యాసిన్హా 27 ఏళ్ల వయస్సులో బాలీవుడ్‌లో హీరోయిన్‌గా కెరీర్‌ను ప్రారంభించి అనతికాలంలో మంచి నటిగా గుర్తింపు తెచ్చుకున్నారు. చోటీసీ బాత్‌, రజనీ గంధ, పతి పత్ని ఔర్‌వో అనే చిత్రాలు ఆమె కెరీర్‌లో బ్లాక్‌బస్టర్‌ హిట్లుగా నిలిచాయి. సినిమాల్లోనే కాకుండా బుల్లితెరలో ప్రసారమయ్యే కార్యక్రమాల్లోనూ ప్రత్యక్షమై ప్రేక్షకులను మెప్పించారు. కుల్ఫీ కుమార్‌ బజేవాలా, కుబూల్‌ హై, కావ్యాంజలి, భాబీ వంటి పలు షోలలో విద్యాసిన్హా నటించింది. బాలీవుడ్‌ ఒక మంచి నటిని కోల్పోయిందని ప్రముఖ నటులు దిగ్భ్రాంతి వ్యక్తం చేశారు.

ముంబై : ప్రముఖ బాలీవుడ్‌ నటి విద్యాసిన్హా(71) అనారోగ్యం పాలవడంతో ముంబైలోని ఆస్పత్రిలో చేర్పించారు. ప్రస్తుతం ఆమె పరిస్థితి ఆందోళనకరంగా ఉందని ఆస్పత్రి వర్గాలు వెల్లడించాయి. గుండె, ఊపిరితిత్తులు సంబంధిత వ్యాదులతో ఆమె గత కొంతకాలంగా బాధపడుతున్నారు. శనివారం పల్స్‌రేట్‌ పడిపోవడంతో ముంబైలోని క్రిటికేర్‌ ఆస్పత్రిలో చేర్పించారు. ప్రస్తుతం ఆమె ఐసీయూలో చికిత్స పొందుతున్నారు. కాగా, విద్యాసిన్హా బాలీవుడ్‌లో 27 ఏళ్లకు హీరోయిన్‌గా కెరీర్‌ను ప్రారంభించినా అనతికాలంలోనే మంచినటిగా గుర్తింపు తెచ్చుకున్నారు. చోటీసీ బాత్‌, రజనీ గంధ, పతి పత్ని ఔర్‌వో అనే చిత్రాలు ఆమె కెరీర్‌లో బ్లాక్‌బస్టర్‌ హిట్లుగా నిలిచాయి. ఫిలింఫేర్‌ అవార్డు గెలుచుకున్న 'రజనీగంధ'లో విద్యాసిన్హా నటనకు వ్రశంసలు లభించాయి. సినిమాలో అవకాశాలు తగ్గాక ఆమె కెరీర్‌ను బుల్లితెరవైపుకు మరల్చారు. ప్రస్తుతం స్టార్‌ ప్లస్‌ టెలివిజన్‌లో ప్రసారమయ్యే 'కుల్ఫీ కుమార్‌ భాజేవాలా' అనే షోలో గ్రాండ్‌ మదర్‌ పాత్ర చేస్తున్నారు. ఈమె నటించిన హిట్‌ చిత్రం 'పతి పత్నీ ఔర్‌ వో'ను ప్రస్తుతం బాలీవుడ్‌లో రీమేక్‌ చేస్తున్నారు.


 ముంబై: బాలీవుడ్ సీనియర్ నటి సాధన(74) కన్నుమూశారు. సుదీర్ఘ కాలంగా అనారోగ్యంతో బాధపడుతున్న సాధన శుక్రవారం తన నివాసంలో తుదిశ్వాస విడిచారని ఆమె స్నేహితురాలు, బీజేపీ ముంబై అధికార ప్రతినిధి షైనా ఎన్ సీ తెలిపారు. సాధనకు పెంపుడు కుమార్తె ఉన్నారు.
 
 1941, సెప్టెంబర్ 2న కరాచీలోని సింధ్ కుటుంబంలో ఆమె జన్మించారు. 1959లో వచ్చిన 'లవ్ ఇన్ సిమ్లా' సినిమాతో బాలీవుడ్ లో హీరోయిన్ గా పరిచయమయ్యారు. 1960 దశకంలో టాప్ హీరోయిన్లలో ఒకరిగా వెలుగొందారు. పరాఖ్, హమ్ దోనో, ప్రేమ్ పత్రా, అసలీ-నకిలీ, ఏక్ ముసాఫిర్ ఏక్ హసినా, దుల్హా దుల్హన్, మేరీ మెహబూబ్, దిల్ దౌలత్ దునియా, ఛోటే సర్కార్ తదితర సినిమాల్లో నటించారు.
 
 అప్పట్లో 'సాధనా కట్' పేరుతో ఆమె కేశాలంకరణ(హెయిర్ స్టైల్) బాగా పాపులర్ అయింది. ముంగురులను నుదుటిపై అడ్డంగా దువ్విన తలకట్టు మహిళా ప్రేక్షకులను ఎంతగానో ఆకట్టుకుంది. సాధన మరణం పట్ల బాలీవుడ్ ప్రముఖులు సంతాపం తెలిపారు.