ఈ వారం మీ రాశి ఫలాలు ఎలా ఉన్నాయంటే..?

మేషం....పరిస్థితులు అనుకూలిస్తాయి. చిన్ననాటి స్నేహితులను కలుసుకుని మంచీచెడ్డా విచారిస్తారు. విలువైన వస్తువులు సేకరిస్తారు. కాంట్రాక్టర్లకు అనుకూల కాలం. కొన్ని ఇబ్బందులు తొలగుతాయి. ధార్మిక కార్యక్రమాలలో పాల్గొంటారు. ఇంటి నిర్మాణయత్నాలు కలసివస్తాయి. సభలు, సమావేశాలలో పాల్గొంటారు. వ్యాపారాలు లాభసాటిగా ఉంటాయి. ఉద్యోగాలలో ముందుకు సాగుతారు. వైద్యులు, కళాకారులకు పురస్కారాలు. వారం ప్రారంభంలో వృథా ఖర్చులు. బంధువిరోధాలు. ఆకుపచ్చ, నేరేడు రంగులు. అంగారక స్తోత్రాలు పఠించండి.వృషభం...రావలసిన సొమ్ము అంది అవసరాలు తీరతాయి. పనులు విజయవంతంగా పూర్తి చేస్తారు. బంధువర్గంతో తగాదాలు తీరతాయి. మీ నైపుణ్యం వెలుగులోకి వస్తుంది. చిరకాల ప్రత్యర్థులు అనుకూలురుగా మారి సహకరిస్తారు. వాహనాలు, ఆభరణాలు కొంటారు. వ్యాపారులకు కొత్త పెట్టుబడులు అందుతాయి. ఉద్యోగాలలో చిక్కులు తొలగి ఊపిరిపీల్చుకుంటారు. సాంకేతికవర్గాలు, క్రీడాకారులకు నూతనోత్సాహం. వారం మధ్యలో వృథా ఖర్చులు. మానసిక అశాంతి. అనారోగ్యం. ఎరుపు, లేత గులాబీ రంగులు. వినాయకుని పూజించండి.మిథునం...ఆదాయం కొంత నిరుత్సాహపరుస్తుంది. వ్యవహారాలలో ఆటంకాలు. బాధ్యతలు పెరుగుతాయి. కష్టానికి తగ్గ ఫలితం కనిపించదు. కాంట్రాక్టర్లకు కొంత నిరాశ ఎదురవుతుంది. దూరపు బంధువులను కలుసుకుంటారు. అనారోగ్య సూచనలు. దేవాలయ దర్శనాలు. వ్యాపారాలు సామాన్యంగా ఉంటాయి. ఉద్యోగాలలో చికాకులు.. కళాకారులు, రాజకీయవర్గాలకు నిరుత్సాహం. వారం మధ్యలో శుభవార్తలు. వాహనయోగం. ఎరుపు, ఆకుపచ్చ రంగులు. హనుమాన్‌ ఛాలీసా పఠించండి.కర్కాటకం...కొత్త కార్యక్రమాలు చేపడతారు. బంధువులు, శ్రేయోభిలాషులు సహకరిస్తారు. ఎంతటి వారినైనా మాటలతో ఆకట్టుకుంటారు. పలుకుబడి కలిగిన వారితోఉత్తరప్రత్యుత్తరాలు. ఆస్తి వివాదాలు తీరతాయి. ఇంటాబయటా బాధ్యతలు సమర్థవంతంగా నిర్వహిస్తారు. కీలక నిర్ణయాలు తీసుకుంటారు. విద్యార్థులు ఉత్సాహంగా ముందడుగు వేస్తారు. ఆలయాలు సందర్శిస్తారు. వ్యాపారులకు లాభాలు, పెట్టుబడులు అందుతాయి. ఉద్యోగులకు అనుకోని హోదాలు. సాంకేతికవర్గాలు, పారిశ్రామికవర్గాలకు విదేశీయానం. వారం చివరిలో ఆస్తి వివాదాలు. పనుల్లో ఆటంకాలు. నీలం, లేత ఆకుపచ్చ రంగులు. లక్ష్మీస్తుతి మంచిది.సింహం....కొత్త వ్యక్తుల పరిచయం. శుభవర్తమానాలు. అదనపు రాబడి ఉంటుంది. దీర్ఘకాలిక సమస్యలు తీరతాయి. మీ అంచనాలు నిజమవుతాయి. దేవాలయాలు సందçర్శిస్తారు. విద్యార్థుల యత్నాలు అనుకూలిస్తాయి. కాంట్రాక్టర్లకు అనుకూలం. చిన్ననాటి స్నేహితులు తారసపడతారు. వ్యాపారులకు లాభాలు అందుతాయి. ఉద్యోగాలలో ఆటంకాలు తొలగి ముందుకు సాగుతారు. క్రీడాకారులు, రచయితలకు సన్మానాలు. వారం ప్రారంభంలో దూరప్రయాణాలు. అనారోగ్యం. బంధువిరోధాలు. లేత నీలం, గులాబీ రంగులు. విష్ణుధ్యానం చేయండి.కన్య....పనులు నిదానంగా సాగుతాయి. స్నేహితులతో స్వల్ప వివాదాలు. కలహాలు. శ్రమాధిక్యంతో కొన్ని విజయాలు సాధిస్తారు. పరపతి కలిగిన వారితో పరిచయాలు. సభలు, సమావేశాలలో పాల్గొంటారు. పాతసంఘటనలు గుర్తుకుతెచ్చుకుంటారు. ఆరోగ్యంపై శ్రద్ధ చూపండి. దూరపు బంధువులను కలుసుకుంటారు. తీర్థయాత్రలు చేస్తారు. వ్యాపారాలలో కొద్దిపాటి లాభాలు అందుతాయి. ఉద్యోగులకు కొత్త ఆశలు చిగురిస్తాయి. సాహిత్యవేత్తలు, కళాకారులకు విశేష ఆదరణ. వారం చివరిలో వ్యయప్రయాసలు. మనశ్శాంతి లోపిస్తుంది. ఎరుపు, ఆకుపచ్చ రంగులు. . హయగ్రీవస్తోత్రాలు పఠించండి.తుల....కుటుంబసభ్యులతో ఉల్లాసంగా గడుపుతారు. దేవాలయాలు సందర్శిస్తారు. పనులు విజయవంతంగా సాగుతాయి. ఇంటిలో విందువినోదాలు. ఇంటర్వ్యూలకు హాజరవుతారు. దాపరికాలు లేకుండా మీ అభిప్రాయాలను నిర్భయంగా వెల్లడిస్తారు . చిన్ననాటి మిత్రులను కలుసుకుంటారు. ఆశ్చర్యకరమైన విషయాలు తెలుస్తాయి. వ్యాపార లావాదేవీలు ఆశాజనకంగా ఉంటాయి., ఉద్యోగాల్లో ప్రగతి కనిపిస్తుంది. క్రీడాకారులు, రాజకీయవర్గాలకు మరింత అనుకూల పరిస్థితులు.. వారం చివరిలో ఆకస్మిక ప్రయాణాలు. అనారోగ్యం. గులాబీ, లేత పసుపు రంగులు. కనకధారా స్తోత్రాలు పఠించండి.వృశ్చికం...చిన్ననాటి స్నేహితులను కలుసుకుంటారు. పరపతి పెరుగుతుంది. సన్నిహితుల సాయంతో ముందుకు సాగుతారు. వాహనాలు కొంటారు. గతాన్ని గుర్తుకు తెచ్చుకుంటారు. పనులు అనుకున్న రీతిలో సాగుతాయి. దేవాలయాలు సందర్శిస్తారు. ఇంతకాలం పడిన కష్టం ఫలితమిస్తుంది. నూతన విద్య, ఉద్యోగావకాశాలు దక్కుతాయి. వ్యాపారాలలో మరింత లాభాలు. ఉద్యోగాలలో మీ అంచనాలు నిజమవుతాయి. వైద్యులు,కళాకారులకు సన్మానాలు,ఊహించని అవకాశాలు. వారం ప్రారంభంలో బంధువులతో తగాదాలు. ఆరోగ్యసమస్యలు. కుటుంబంలో చికాకులు. నలుపు, నేరేడు రంగులు.గణేశాష్టకం పఠించండి.ధనుస్సు...పనులు అనుకున్న విధంగా పూర్తి చేస్తారు. బంధువులు ఆపద్బాంధువులుగా ఆదుకుంటారు. కష్టాల నుంచి గట్టెక్కుతారు. కొత్త కాంట్రాక్టులు పొందుతారు. మీ ఆశయాలు నెరవేరతాయి. గృహం, వాహనాలు కొనుగోలు చేస్తారు. నిరుద్యోగులకు ఉద్యోగావకాశాలు. రాబడి ఆశాజనకంగా ఉంటుంది. వ్యాపారాలు ఉత్సాహంగా కొనసాగుతాయి. ఉద్యోగాలలో అనూహ్యమైన పురోభివృద్ధి. క్రీడాకారులు, కళాకారులకు కొత్త ఆశలు.. వారం ప్రారంభంలో వ్యయప్రయాసలు. ఆరోగ్యభంగం. పసుపు, నేరేడు రంగులు. ఆదిత్య హృదయం పఠించండి.మకరం...సన్నిహితులు, శ్రేయోభిలాషుల నుంచి శుభవర్తమానాలు. రాబడి పెరుగుతుంది. ఇంతకాలం పడిన కష్టానికి ఫలితం దక్కుతుంది. అనుకున్నది పట్టుదలతో సాధిస్తారు. కార్యసిద్ధి. అందరిలోనూ సత్తా చాటుకుంటారు. పలుకుబడి పెరుగుతుంది. వ్యాపారలావాదేవీలు ఉత్సాహంగా సాగుతాయి. ఉద్యోగాలలో చికాకులు తొలగుతాయి. కాంట్రాక్టర్లకు అనుకూల సమయం. క్రీడాకారులు, రాజకీయవర్గాలకు ప్రోత్సాహకరంగా గడుస్తుంది.. వారం మధ్యలో ఖర్చులు అధికం. మానసిక ఆందోళన. ఆకుపచ్చ, తెలుపు రంగులు. విష్ణుసహస్రనామ పారాయణ చేయండి.కుంభం..పరిచయాలు పెరుగుతాయి. రావలసిన సొమ్ము అందుతుంది. పనులు సకాలంలో పూర్తి చేస్తారు. ఆత్మీయుల నుంచి పిలుపు అందుతుంది. ఆశ్చర్యకౖరమైన సమాచారం. మిత్రులతో వివాదాలు తీరతాయి. అంచనాలు నిజమవుతాయి. దేవాలయాలు సందర్శిస్తారు. విద్యార్థులు, నిరుద్యోగులకు శుభవార్తలు. వ్యాపారులకు లాభాలు తథ్యం. ఉద్యోగాలలో చిక్కులు తొలగుతాయి. వైద్యులు, కళాకారులకు అవార్డులు. వారం చివరిలో ధనవ్యయం. సోదరులతో స్వల్ప వివాదాలు. పసుపు, ఎరుపు రంగులు. దేవీస్తోత్రాలు పఠించండి.మీనం..పరపతి పెరుగుతుంది. సోదరులు, సన్నిహితుల సాయం అందుతుంది. వ్యవహారాలలో విజయం. శుభవర్తమానాలు. ఆదాయం పెరిగి అప్పులు తీరతాయి. ఆశయాల సాధనలో కుటుంబసభ్యుల సహకరిస్తారు. వాహనయోగం. నిరుద్యోగులకు ఆశలు చిగురిస్తాయి. పుణ్యక్షేత్రాలు సందర్శిస్తారు. వ్యాపారాలు మరింతగా పుంజుకుంటాయి. ఉద్యోగాలలో అనుకూలస్థితి. రాజకీయవేత్తలు, కళాకారులకు కొన్ని చిక్కులు తొలగుతాయి. వారం ప్రారంభంలో వివాదాలు. ఆరోగ్య, కుటుంబసమస్యలు. ఎరుపు, లేత పసుపు రంగులు. దుర్గాదేవిని పూజించండి.

‘సీతా కల్యాణం’ (1976) @ 50

దర్శకుడు బాపు తనకు అత్యంత ఇష్టమైన చిత్రాలలో ఎప్పుడూ ఓ పేరు చెబుతూ ఉండేవారు. అది – స్వీయ దర్శకత్వంలో, ఎన్టీఆర్‌ రావణుడిగా నటించి, నిర్మించిన ‘సీతారామ కల్యాణం’ (1961). దర్శకుడిగా ఎన్టీఆర్‌కు అదే తొలి చిత్రం. ఆ వెండితెర రామాయణ గాథ బాపు మనసుపై ఎంత ప్రగాఢమైన ముద్ర వేసిందంటే, దశాబ్దిన్నర తర్వాత ఆ కథాంశాన్నే ‘సీతా కల్యాణం’గా తెరకెక్కించారు. అదీ ఎంతో సాహసంతో... సామాన్య సినీ జనాభిరుచిని పక్కకుపెట్టి, దృశ్య, సంగీత ప్రధానంగా రూపొందించారు. సినీ ప్రముఖుడు పింజల సుబ్బారావు కుమారుడు పింజల ఆనందరావు నిర్మాతగా వ్యవహరించారు. ‘సీతా కల్యాణం’లో రవి, జయప్రద, కైకాల సత్యనారాయణ ఇది పాటల కల్యాణం! ఎన్టీఆర్‌ ‘సీతారామ కల్యాణం’ ప్రధానంగా శివపురాణం ఆధారంగా నంది శాపం, వేదవతి వృత్తాంతం లాంటి వాటితో నడుస్తుంది. ఇటు అందాల రాముడు (నూతన నటుడు హరనాథ్‌), అటు ఆభిజాత్య రావణబ్రహ్మ (ఎన్టీఆర్‌)... ఇద్దరూ తెరపై గొప్పగా కనిపిస్తూ, ప్రేక్షకులను ఆశ్చర్యపరుస్తారు. అయితే, ఏ పాత్రా ప్రత్యర్థి పాత్రపై పై చేయి చూపదు. బాపు ‘సీతా కల్యాణం’ మాత్రం రామ, రావణ పాత్రల కన్నా ప్రధానంగా విశ్వామిత్రుడి కథాకథనంలో నడుస్తుంది. రాముడి కథ కన్నా గంగావతరణం, త్రిపురాసుర వధ, త్రివిక్రమ రూపం ధరించి బలి చక్రవర్తిని పాతాళానికి పంపిన వామనావతారం లాంటి అనేక ఘట్టాలను తీసుకొని, ఓ మంచి దృశ్యకావ్యంగా మలిచారు బాపు. స్వతహాగా డైలాగుల్లో మరపురాని విన్యాసాలకు పేరుబడ్డ ముళ్ళపూడి వెంకట రమణ సైతం ‘సీతా కల్యాణం’లో మాత్రం బాపు ఆలోచనకు తగ్గట్టే మాటలు తక్కువ, పాటలు ఎక్కువగా ఉండేలా కథ, కథనాన్ని స్క్రీన్‌ ప్లే ప్రధానంగా నడిపించారు. చిత్రంలో డైలాగులంతా కలిపి పది, పన్నెండు పేజీలే. సినిమాను పూర్తిగా ఓ సంగీత, దృశ్య రూపకంలా రూపొందించారు. 1975 విజయదశమి నాడు ఇటు బాపు ‘సీతాకల్యాణం’ పాటల రికార్డింగ్, అటు బాపు దర్శకత్వంలోనే హీరో కృష్ణంరాజు ‘భక్త కన్నప్ప’ పాటల రికార్డింగ్‌... రెండూ మొదలయ్యాయి. ‘భక్త కన్నప్ప’ త్వరితగతిన షూటింగ్‌ ముగించుకొని, మరుసటేడు మే 29న విడుదలైంది. ‘సీతా కల్యాణం’ మాత్రం కొంత జాప్యమై, జూలై 16న జనం ముందుకు వచ్చింది. కళాత్మక విలువలు తెలిసిన కళాహృదయులకు తాము సినిమా చూస్తున్నట్టు అనిపించ లేదు. తెర మీద కనిపిస్తున్న ఆ రామాయణ సన్నివేశాల్లో తామూ సంచరిస్తున్నట్టు అనిపించింది. ఆ సన్నివేశాల చుట్టూనే మనసు పరిభ్రమించింది. అదీ బాపు– రమణల ‘సీతాకల్యాణం’ గొప్పతనం. ∙బాపు–రమణ మలయాళ రాముడు – ముగ్ధమోహన సీత నిజానికి, ఈ సినిమాలో శ్రీరాముడి పాత్రకు మొదట హీరో రామకృష్ణను ఎంపిక చేశారు. తర్వాత ఎందువల్లో ఆ నిర్ణయం మార్చుకున్నారు. సినీ శ్రీరాముడిగా సుప్రసిద్ధుడైన ఎన్టీఆర్‌తోనూ, అలాగే అందాల నటుడు శోభన్‌బాబుతోనూ అంతకు ముందు రామాయణ గాథలు తీసిన బాపు – రమణలు చివరకు శ్రీమద్రామాయణంలోని బాలకాండలోని ఘట్టాల చుట్టూ తిరిగే ‘సీతా కల్యాణం’ కోసం తెలుగు తెరకు నవ యువకుడైన కొత్త రాముణ్ణి పరిచయం చేశారు. ఏరికోరి... కంటికి నదురుగా, కెమెరాకు అందంగా కనిపించే మలయాళీ యువకుడు రవికుమార్‌ను ఆ పాత్ర కోసం పట్టుకొచ్చారు. అప్పట్లో అది సంచలనమే. శ్రీమహావిష్ణువుగా, శ్రీరాముడిగా రవి కనువిందు చేశారు.ఇక, అప్పటికే విజయా వారి ‘శ్రీరాజేశ్వరీ విలాస్‌ కాఫీ క్లబ్‌’ రూపకల్పనతో దర్శకుడు బాపుకు పరిచయమైన లలిత లావణ్య యువ నటి జయప్రదను సీత పాత్రకు తీసుకున్నారు. లక్ష్మీదేవిగానూ ఆమె కనిపిస్తారు. అందంతో పాటు అభినయంతోనూ ఆ టీనేజ్‌ సీత పాత్రకు జయప్రద ప్రాణం పోశారు. రావణాసురుడిగా నిండైన విగ్రహం, మంచి వాచికం ఉన్న కైకాల సత్యనారాయణ సరేసరి. ్రపాణం పోసిన ప్రతిభావంతులు! ‘సీతా కల్యాణం’ చిత్రీకరణ అంతా కెమెరా కుంచెతో వెండితెర క్యాన్వాస్‌పై పెయింటింగ్‌ వేసినట్లు ఉంటుందంటే అతిశయోక్తి కాదు. అందుకు మచ్చుతునకలు సినిమాలో వచ్చే గంగావతరణం, శివధనుస్సు వృత్తాంతం లాంటి ఎన్నెన్నో. బాపు దర్శకత్వానికి కళాదర్శకత్వం (కుదరవల్లి నాగేశ్వరరావు), కె.ఎస్‌. ప్రసాద్‌ ఛాయాగ్రహణం, రవికాంత్‌ నగాయిచ్‌ తాంత్రిక ఛాయాగ్రహణం పెద్ద ఎస్సెట్‌. ఈ సినిమాలో కె.వి. మహదేవన్‌ సంగీతం గురించి, సినారె, ఆరుద్రలు అందించిన సాహిత్యం గురించి ఎంత చెప్పినా తక్కువే.ఇవాళ దేశమంతటా చెప్పుకుంటున్న సినిమా... ‘రామాయణం’. అత్యంత భారీయెత్తున నిర్మించగా, ప్రపంచవ్యాప్తంగా రిలీజవుతున్న సినిమా. సీతారాములుగా రణబీర్‌ కపూర్, సాయి పల్లవి, రావణాసురుడిగా యశ్‌ నటించగా మరో అయిదు రోజుల్లో దీపావళి కానుకగా వస్తున్న ఆ రెండు భాగాల సినిమాకు కొన్ని వందల కోట్లు ఖర్చయింది. కానీ, 50 ఏళ్ళ క్రితమే తెలుగు దర్శక, నిర్మాతలు, రచయితలు కలసి కొన్ని లక్షల్లోనే వెండితెరపై పునఃసృష్టించిన ఓ రామాయణ గాథ ప్రపంచమంతటా ప్రశంసలు అందుకుందని తెలుసా? ఆ సినిమా... బాపు–రమణలు జరిపిన వెండితెర ‘సీతా కల్యాణం’. ఆ వన్నెతరగని దృశ్యకావ్యానికి ఇప్పుడు 50 వసంతాలు. పాశ్చాత్యులు సినిమా పాఠంగా పెట్టుకున్న ఈ అచ్చమైన భారతీయ సినీ ఆణిముత్యానికి ఇది అక్షర నీరాజనం.ఆ దేశంలో సినిమా పాఠంగా... ‘షికాగో ఇంటర్నేషనల్‌ ఫిల్మ్‌ ఫెస్టివల్‌’లో భాగంగా 1978 నవంబర్‌ 5న ఆ నగరంలోని విలేజ్‌ థియేటర్‌లో ‘సీతా కల్యాణం’ సినిమాను ప్రదర్శించారు. తెరపై ఈ రామాయణ దృశ్యకావ్యాన్ని చూడాలని దేశం నలుమూల నుంచి జనం వచ్చారట. అప్పట్లో బెర్లిన్, శాన్‌రెనో, డెన్వర్‌లలోని ఇంటర్నేషనల్‌ ఫిల్మ్‌ ఫెస్టివల్స్‌లోనూ ఈ చిత్రం భాగమైంది. ఇక, ఈ చిత్రాన్ని నాలుగు భాగాలుగా చేసి, సుప్రసిద్ధ టీవీ ఛానల్‌ బి.బి.సి.లో ‘సీతాస్‌ వెడ్డింగ్‌’ పేరుతో టెలికాస్ట్‌ చేయడం మరో విశేషం. ‘సీతా కల్యాణం’ చిత్రాన్ని ఆ రోజుల్లోనే ‘బ్రిటిష్‌ ఫిల్మ్‌ ఇన్‌స్టిట్యూట్‌’ (బి.ఎఫ్‌.ఐ)లో విద్యార్థులకు కోర్సు వర్కులో భాగంగా పాఠం కింద పెట్టారు. తెలుగు సినిమాకు అంతర్జాతీయ స్థాయిలో దక్కిన అరుదైన ఘనత అది.అమ్మ చెప్పిన అరుదైన మాట బాపు – రమణలది ఎంతటి అనుబంధమో అందరికీ తెలుసు. కొందరికే తెలిసింది ఏమంటే... బాపు వాళ్ళ అమ్మ గారికి కూడా రమణ అంటే వల్లమాలిన అభిమానం. ‘‘నాకు ఇంతమంది కొడుకులున్నా, రమణే నా పెద్దకొడుకు అనేవార’’ట ఆవిడ. లండన్, షికాగో ఫెస్టివల్స్‌లో ‘సీతా కల్యాణం’ ప్రదర్శన సందర్భంగా బాపు మొదటిసారిగా విదేశీ ప్రయాణం చేశారు. ప్రయాణమై వెళ్ళబోతూ, తల్లి కాళ్ళకు దణ్ణం పెట్టారు. ‘‘నీకు కాస్త పేరు ఏదైనా వస్తే అంతా (ముళ్ళపూడి వెంకట) రమణ చలవే... అతని వల్లే! అతనికి దణ్ణం పెట్టు’’ అంది ఆ మహాతల్లి. స్నేహంతో పాటు పరస్పర గౌరవం నిండిన అపూర్వమైన మిత్రద్వయం వారు అనేది అందుకే! సత్యజిత్‌ రే కార్పెట్‌ పక్క! క్రోటన్‌ మొక్క! ఓసారి ఢిల్లీ ఫిల్మ్‌ ఫెస్టివల్‌కు సుప్రసిద్ధ భారతీయ దర్శకుడు సత్యజిత్‌ రే వచ్చారు. ఆరుద్ర, లండన్‌ ‘గార్డియన్‌’ పత్రిక సినీ విమర్శకుడు డెరెక్‌ మాల్కమ్‌లు ఆయనకు బాపును పరిచయం చేశారు. ‘సీతా కల్యాణం’ ఫెస్టివల్స్‌కు వెళ్ళిన సంగతి తెలిసిన రే అబ్బురపడి, అడిగి మరీ ఆ సినిమా వేయించుకుని చూశారు. తీరా సినిమా చూశాక, ‘‘సీత కూర్చున్న కార్పెట్‌ ఇండియన్‌ డిజైన్‌ కాదు... పర్షియన్‌. సీత తోటలో క్రోటన్‌ మొక్కలు కనిపించాయి. రామాయణ కాలంలో క్రోటన్‌ మొక్కలు లేవు’’ అనేసి వెళ్ళిపోయారట. ఈ సినిమా ప్రస్తావన వచ్చినప్పుడు ముళ్ళపూడి సరదాగా ఆ సంఘటన చెబుతుండేవారు. ‘‘ఆ రెండు పాయింట్లే కనిపించాయంటే, ఆ రెండు మినహా మిగతా సినిమా అంతా పర్ఫెక్ట్‌ అని అర్థం కదా’’ అని నవ్వేసేవారు. సీరియల్‌ తప్పిపోయిన శ్రీరాముడు ‘సీతా కల్యాణం’ రావడానికి ముందే తమిళం నుంచి తెలుగులోకి జగపతి పిక్చర్స్‌ వారు అనువాదం చేసిన ‘దశావతారములు’ (1976 జూన్‌ 18) చిత్రంలోనూ మలయాళ నటుడు రవి కుమార్‌ శ్రీమహావిష్ణువు పాత్రలో అలరించారు. అటుపైన ‘సీతా కల్యాణం’లో అందాల రాముడిగా తెరపై ఒదిగిపోయారు. ‘సీతా కల్యాణం’ తర్వాత సీత, రామ, రావణ పాత్రధారులను మళ్ళీ అవే పాత్రలకు తీసుకొని, అదే నిర్మాత పింజల సుబ్బారావు మరో పౌరాణికం ‘సీతారామ వనవాసము’ (1977 మార్చి 31) కూడా నిర్మించారు. ఈసారి దర్శకుడు కమలాకర కామేశ్వరరావు. అయితే, దురదృష్టవశాత్తూ ఆ సినిమా కూడా ఆడలేదు. జయాపజయాలు ఎలా ఉన్నా, రాముడిగా రవికుమార్‌ అందమైన రూపానికి సామాన్య జనమే కాదు... బాపు – రమణలు కూడా మురిసిపోయారు. ఎంతలా అంటే, ఆ సినిమా వచ్చిన దాదాపు రెండు దశాబ్దాల పైచిలుకు తర్వాత ఆ స్నేహద్వయం ‘శ్రీభాగవతం’ టీవీ సీరియల్‌ తీస్తూ, ఎలాగైనా మళ్ళీ రవిని తీసుకొని విష్ణుమూర్తి, శ్రీరాముడు లాంటి పాత్రల్లో చేయించాలని విశ్వప్రయత్నం చేశారు. టీవీ వాళ్ళతో కేరళ అంతటా విచారించినా, రవి ఆచూకీ పట్టుకోలేకపోయారు. అలా ఆ ఆశ తీరలేదు. కాలాన్ని సవాలు చేసిన సినిమా! ఏది ఏమైనా, ‘సీతా కల్యాణం’ అప్పటికీ ఇప్పటికీ కళాత్మకంగా కథను తెరపై దృశ్యమానం చేయడంలో ఓ క్లాసిక్‌గా మిగిలిపోయింది. దర్శక – నిర్మాతలకే కాదు... తెలుగు సినీ ప్రియులకు సైతం మనసు నింపిన సినిమాగా నిలిచిపోయింది. నేటికీ జనం చెప్పుకొనే చిత్రంగా చిరంజీవిగా మారిపోయింది. నాటి పత్రికలు ఒక్క ముక్కలో తేల్చేసినట్టు... బాపు ఇంత (అంత)వరకు రూపొందించిన చిత్రాలన్నీ ఒక ఎత్తు, ‘సీతా కల్యాణం’ ఒకటే ఒక ఎత్తు.– ఆర్‌. జయ కవి కాంచనిది... రవి గాంచును!బాపు భావుకతకు తన తాంత్రిక ఛాయాగ్రహణం జోడించి, రవికాంత్‌ నగాయిచ్‌ ఈ ఈస్ట్‌మన్‌ కలర్‌ ‘సీతా కల్యాణం’ని మరింత కన్నులపండుగ చేశారు. భారతదేశంలో ట్రిక్‌ ఫోటోగ్రఫీలో గురుతుల్యుడు బాబూభాయ్‌ మిస్త్రీ అయితే, గురువును మించిన శిష్యుడు రవికాంత్‌. బాపు ‘సంపూర్ణ రామాయణం’, అంతకు మించి ‘సీతా కల్యాణం’ వెండితెరపై రవికాంత్‌ కెమెరా మాయకు మచ్చుతునకలు.అసలు రవికాంత్‌ తెలుగుతెరపై తొలిసారి ఛాయాగ్రహణ దర్శకుడు అయినదే ఎన్టీఆర్‌ ‘సీతారామ కల్యాణం’తో! దశాబ్దిన్నర తర్వాత ఈ బాపు ‘సీతా కల్యాణం’ కూడా ఆయనకే దక్కింది. ‘‘రవికాంత్‌ నగాయిచ్‌ కెమెరా చేసిన రంగుల లయ విన్యాసం మరపురానిది. మళ్ళీ మళ్ళీ చూడదగినది. గంగావతరణ ఘట్టం చిత్రానికంతా హైలైట్‌’’ అని ఆ రోజుల్లో పత్రికలు వేనోళ్ళ కొనియాడాయి. చాక్‌ పీస్‌ పొడితో సూపర్‌ ఎఫెక్ట్‌! ముఖ్యంగా, ‘సీతా కల్యాణం’ కోసం సినారె కలం నుంచి జాలువారిన గంగావతరణ గీతాన్ని బాపు ముందుగా తన చిత్రలేఖనం ద్వారా బొమ్మకట్టారు. ఆపైన రవికాంత్‌ నగాయిచ్‌ చాతుర్యంతో వెండితెరపైకి అపూర్వంగా తీసుకొచ్చారు. దివి నుంచి భువికి గంగ ఉరకలెత్తుతూ వచ్చే జలపాత దృశ్యం సహజంగా అనిపించడం కోసం ఆ కెమెరా మాంత్రికుడు నీళ్ళు విరజిమ్మ లేదు. కామన్‌ సెన్స్‌తో ఓ చిన్న ట్రిక్‌ చేశారు. బస్తాల కొద్దీ చాక్‌పీస్‌ పొడి తెప్పించారు. స్టూడియోలో పైన అటక మీదకు ఎక్కించి, ఓ క్రమపద్ధతిలో కిందకు గుమ్మరించారు. అలా ఆ సుద్దపొడే అచ్చం ఆకాశగంగలా తెరపై ప్రత్యక్షమైంది. కమర్షియల్‌ ఫ్లాప్‌! క్లాసిక్‌ ఫిల్మ్‌ స్టేటస్‌! అప్పట్లో కేవలం 14 లక్షల రూపాయల్లో ‘సీతా కల్యాణం’ నిర్మాణం జరిగింది. ఇంకా విశేషం ఏమిటంటే, ఈ పౌరాణిక సినిమా తీస్తున్నప్పుడు నిర్మాతకు డబ్బు ఇబ్బంది అయింది. బాపు – రమణల రామభక్తి, సినిమా ప్రేమ ఎంతటివంటే, అయిదు లక్షలకు మూడు జిల్లాల హక్కులు కొని, డిస్ట్రిబ్యూటర్‌ నుంచి అడ్వాన్సు తెచ్చి మరీ డబ్బు సర్దారు. రాజీ పడకుండా సినిమా రూపొందించారు. సినిమా పూర్తయ్యాక బాగా వచ్చిందని భావించి, నటీనటుల్లో కొందరు కొన్ని ఏరియాలకు సినిమా తీసేసుకున్నారట. తీరా పిక్చర్‌ విడుదలయ్యాక చూస్తే, డైలాగ్‌ బేస్డ్‌ సినిమాలకు అలవాటు పడ్డ జనం... అంతా పాటలమయమైన ఈ సంగీత ప్రధాన చిత్రాన్ని మెచ్చలేదు. సినిమా ఫ్లాపైంది. నిజానికి, ‘సీతా కల్యాణం’కు సరిగ్గా ఏడాది ముందు బాపు – రమణల ‘ముత్యాలముగ్గు’ (1975 జూలై 25న రిలీజ్‌), అలాగే నెలన్నర ముందు ‘భక్త కన్నప్ప’ (1976 మే 29) వచ్చాయి. రెండూ సూపర్‌ హిట్టయ్యాయి. కానీ ‘సీతా కల్యాణం’ భిన్నమైన స్పందనను ఎదుర్కొంది. విజయవాడ, గుంటూరు లాంటి అనేక ప్రధాన సెంటర్లలో సైతం నాలుగైదు వారాలకే హాళ్ళ నుంచి ‘సీతా కల్యాణం’ సర్దుకుంది. అప్పట్లో పౌరాణికాలకు ఒకింత ఎక్కువ ఆదరణ చూపిన ఒక్క హైదరాబాద్‌ కేంద్రంలో మాత్రం సుదర్శన్‌ థియేటర్‌లో అత్యధికంగా 49 రోజులు ఆడింది. మొత్తానికి, నిర్మాతకు పెట్టుబడి వచ్చేసింది కానీ, బాపు – రమణలకు 4 లక్షలు పోయాయి. మంచి సినిమా తీశామనే సంతోషం, సంతృప్తి మాత్రం మిగిలాయి. కాలం గడిచేకొద్దీ... ‘సీతా కల్యాణం’ కమర్షియల్‌ హిట్‌ను మించి క్లాసిక్‌ హోదాను సొంతం చేసుకొని, ఆశ్చర్యపరిచింది. హిందీలో ‘సీతా స్వయంవర్‌’ పేరుతో, మలయాళంలో ‘సీతా స్వయంవరం’గా అనువాదమైంది. ఆర్థికంగా నిల్లు! అభినందనలు ఫుల్లు! ‘సీతా కల్యాణం’ సామాన్యులకు నచ్చలేదన్న బాధే కానీ, సినీ, సామాజిక దిగ్గజాల మెచ్చుకోళ్ళకు మాత్రం అంతు లేదు. సాక్షాత్తూ తెలుగు రాష్ట్ర ముఖ్యమంత్రి జలగం వెంగళరావు కేవలం పది నిమిషాలే టైమిచ్చి కూర్చున్నా, తెరపై ‘సీతా కల్యాణం’ చూస్తూ కళ్ళుతిప్పుకోలేక రెండు గంటల పైచిలుకు సినిమా ఆసాంతం చూస్తూనే ఉండిపోయారు. అలాగే, ఓసారి ఏదో అవార్డుల ప్రదానోత్సవానికి బాపు ఢిల్లీ వెళ్ళారు.అప్పుడు తమిళ దర్శకుడు కె. బాలచందర్‌ అక్కడ కనబడి, బాపు భుజం మీద చెయ్యి వేసి ఒకటే మాట అన్నారు. ‘‘నేను గుడికెళ్ళను. పూజలు చేయను. నాస్తికుడిననే చె΄్పాలి. కానీ, మీ ‘సీతా కల్యాణం’ చూసిన తర్వాత వారం రోజుల పాటు అవే దృశ్యాలు నా కళ్ళకు కనిపిస్తూనే ఉన్నాయి’’ అని మెచ్చుకున్నారు. ఆ ఏడాది ‘ఫిల్మ్‌ఫేర్‌’ అవార్డుల్లో తెలుగుకు సంబంధించి ఉత్తమ దర్శకుడిగా ‘సీతా కల్యాణం’కి గాను బాపు ఎంపికయ్యారు. రామచంద్రన్‌ అంటే రామకథ వేశారు! ‘సీతా కల్యాణం’కు సంబంధించి చాలా కథలున్నాయి. అప్పట్లో ఆ సినిమా లండన్, షికాగో సహా అనేక ఫిల్మ్‌ ఫెస్టివల్స్‌కు వెళ్ళింది. అది కూడా గమ్మత్తుగా జరిగింది. 1978 జనవరిలో మద్రాసులో ఫిల్మోత్సవ్‌ నిర్వహించారు. తమిళనాడు ముఖ్యమంత్రేమో సాక్షాత్తూ టాప్‌ సినీస్టార్‌ ఎం.జి. రామచంద్రన్‌. ఆ సంగతి తెలిసిన విదేశీ ప్రతినిధులు రామచంద్రన్‌ నటించిన సినిమా ఏదైనా చూడాలనుకున్నారు. ‘రామచంద్రన్‌ సినిమా చూపించండ’ని వీళ్ళు అడిగితే, హిందీ వాడైన ఆ ఫెస్టివల్‌ ఛీఫ్‌ ఆర్గనైజర్‌కు ‘వీళ్ళేదో రాముల వారి సినిమా చూపించమంటున్నార’న్నట్టుగా అర్థమైంది. ఆయన అర్జెంటుగా రేపు ఓ రాముల వారి సినిమాను విదేశీయులకు ప్రదర్శించాల్సిందిగా మద్రాసులోని ఫిల్మ్‌ ఛాంబర్‌ వారిని అభ్యర్థించారు. ఎవరి దగ్గరా అప్పటికప్పుడు ప్రింట్లు వగైరా రెడీగా లేవు. ముళ్ళపూడిని కూడా అడిగితే, ‘రామాయణం లేదు కానీ, ‘సీతా కల్యాణం’ ప్రింటు ఉంది. అందులోనూ రాముడుంటాడు లెండి’ అని ప్రింటు పంపారట. అదిగో... అలా అక్కడ అనుకోకుండా మరునాడు పొద్దున్నే పది గంటలకు సెల్యులాయిడ్‌ కావ్యం ‘సీతా కల్యాణం’ చూసి దేశ, విదేశీ ప్రతినిధులకు మతిపోయింది. లండన్‌ ఫిల్మ్‌ ఫెస్టివల్‌లో... మద్రాసు ‘ఫిల్మోత్సవ్‌’లో ‘సీతా కల్యాణం’ షో చూసినవారిలో లండన్‌ ‘గార్డియన్‌’ పత్రిక సినిమా సెక్షన్‌ ఎడిటర్‌ డెరెక్‌ మాల్కమ్‌ ఉన్నారు. అద్భుతమైన సినిమా తీశారంటూ దర్శకుడు బాపును అభినందించడమే కాక, ఆ తర్వాత ‘‘కొద్ది నెలల్లో జరిగే ‘లండన్‌ ఫిల్మ్‌ ఫెస్టివల్‌’కు భారతదేశం తరఫున ఈ సినిమా పంపండి. మేమూ ఇండియన్‌ గవర్నమెంట్‌కు రాస్తాం’’ అని చె΄్పారట. అలా ‘సీతా కల్యాణం’ రిలీజైన రెండేళ్ళ తర్వాత సినిమాటిక్‌గా లండన్‌కు వెళ్ళింది. అలా 1978లో ఆ ఏటి అత్యుత్తమ చిత్రాల్లో ఒకటిగా బ్రిటిష్‌ ఫిల్మ్‌ ఇన్‌స్టిట్యూట్‌ వారి ‘లండన్‌ ఫిల్మ్‌ ఫెస్టివల్‌’లో ప్రదర్శన జరుపుకొంది. మన పౌరాణిక ఆహార్యం, ఆభరణాలు, నటీనటుల అందం వగైరా ఫోటోల్లో చూసి విదేశీ జనం గుమ్మయిపోవడంతో, ఒక ఆటకు టికెట్లన్నీ అమ్ముడుపోయాయి. అలాగే, ఆ ఫెస్టివల్‌లోనే ఒక ఇండియన్‌ ఎంట్రీ సినిమా టైమ్‌కి రాలేదు. అప్పుడు ఆ ఖాళీలో జనం డిమాండ్‌ మీద ‘సీతా కల్యాణ’మే రెండోసారి వేశారు. లండన్‌ ఫిల్మ్‌ ఫెస్టివల్‌లో ఈ సినిమా స్క్రీనింగ్‌ అయిన వెంటనే బాపును వేదిక మీదకు తీసుకువెళితే, హాలులో అందరూ లేచి నిలబడి మరీ చప్పట్లు కొట్టి, స్టాండింగ్‌ ఒవేషన్‌ ఇచ్చారు. 1978 నవంబర్‌ ప్రాంతంలో ఈ చిత్రోత్సవం జరిగినప్పుడే లండన్‌లో బాపు చిత్రకళా ప్రదర్శన కూడా ఏర్పాటైంది. బాపు సినిమాకే కాదు... బొమ్మలకూ జనం ఆకర్షితులయ్యారంటే, ఆ ప్రదర్శనలోని మూడు రేఖా చిత్రాలను ఆ ప్రాంత అభిమానులు అక్కడికక్కడ ఏకంగా 600 పౌండ్లకు కొన్నారు.

లైక్.. షేర్‌.. ఫాలో!.. అందమైన మాయాజాలం

ఫేస్‌బుక్‌లో ఒక పిక్‌ షేర్‌ చేశాం – అప్పటి నుంచి ఎన్ని లైకులు వచ్చాయనే ఆతృత. వాట్సాప్‌లో ఆరోజు జరుపుకున్న బర్త్‌ డే వీడియోని ‘స్టేటస్‌’గా పెట్టాం – ఆ క్షణం నుంచి ఎంతమంది చూశారు, ఫలానా వారెందుకు విష్‌ చేయలేదనే ఆరాటం. ఇన్‌స్టాలో ఒక వీడియోని పోస్ట్‌ చేశాం – లైకులు వచ్చాయ్‌. ఫాలోవర్స్‌ ఎందుకు పెరగలేదన్న ఆవేదన. ఒక ఇన్‌ఫ్లూయెన్సర్‌ ఒక గాడ్జెట్‌ గురించి పదేపదే చెప్తున్నాడు– అందరూ కొనేస్తున్నారు – మరి నా దగ్గర లేదే అని ఆక్రోశం! చేతిలోని ఒక చిన్న తెర – ప్రపంచాన్ని మన ముందుకు తీసుకువచ్చింది. కానీ అదే తెర వెనుక కనిపించని ఒత్తిళ్లు, పోలికలు, ట్రోలింగ్, నకిలీ వార్తలు, గోప్యతకు ముప్పు వంటివి ఎన్నో! కనెక్ట్‌ చేయాల్సిన సోషల్‌ మీడియానే కొన్నిసార్లు మనల్ని మనకు దూరం చేస్తోంది. ప్రపంచాన్ని ముందుంచుతూనే, పక్కగదిలో ప్రాణాలు పోయినా పట్టించుకునే తీరిక లేకుండా చేస్తోంది. ఒక్క సెకన్‌ – ఒక్క స్క్రోల్‌తో మొదలై సమయాన్నంతా మింగేస్తోంది.అందమైన మాయ!సోషల్‌ మీడియాలో కనిపించే ప్రతి ఫొటో నిజమైనది కాదు. ఫిల్టర్లు, ఎడిటింగ్, మేకప్, ఆర్టిఫిషియల్‌ లైటింగ్, ఏఐ జోడింపు– ఇవన్నీ కలిపి ఒక మాయా ప్రపంచాన్ని చూపిస్తున్నాయి. దాన్నే నిజమని భావిస్తూ, పోల్చుకోవడం మొదలుపెడుతున్నాం. ‘నేను ఎందుకు అలా లేను?’, ఎందుకు వారిలా అందంగా కనిపించడం లేదు? అనే ప్రశ్నలు మొదలవుతున్నాయి. ఇదే నేడు యువతలో ఆత్మన్యూనతకు, అసంతృప్తికి కారణమవుతోంది.నేనెందుకు అలా లేను?మన బంధువులు విదేశీ పర్యటనలో ఉన్నారు. మరొకరు ఖరీదైన కారు కొన్నారు. ఇంకొకరు కొత్త ఇల్లు చూపించారు. వేరొకరు ప్రతిరోజూ తన ఆనందాలను, విజయాలను పంచుకుంటున్నారు. వీటిని చూసినపుడు మనం జీవితంలో వెనుకబడిపోయామేమో అనే భావన కలగవచ్చు. కానీ వారు పంచుకునే ఆనంద క్షణాల వెనుక ఎన్నో కష్టాలు, వైఫల్యాలు, అప్పులు, ఒత్తిళ్లు, కన్నీళ్లు ఉండవచ్చు. అవి మనకు కనిపించకపోవచ్చు. అయినా మనం వారి ‘హైలెట్స్‌’ని మన రియల్‌ లైఫ్‌తో పోల్చుకుంటూ కుంగిపోతుంటాం. వ్యక్తిగతం కాకూడదు!సోషల్‌ మీడియా రాజకీయ చర్చలకు పెద్ద వేదికగా మారింది. ఒక వార్త, ఒక వీడియో, ఒక ప్రసంగం.. క్షణాల్లో వేలమందికి చేరుతుంది. ఇది మంచిదే కాని, ఇందులో నిజానికీ అబద్ధానికీ మధ్య ఉండాల్సిన ఒక సన్నని గీత చెరిగిపోతోంది. పూర్తి సమాచారం తెలుసుకోకుండానే ఒక అభిప్రాయానికి వచ్చేస్తున్నాం. ఇందుకు విరుద్ధంగా ఎవరైనా స్పందిస్తే, ఎదురు దాడికి తెగబడుతున్నాం. రాజకీయాంశాలపై చర్చ ఉండాలి. కానీ వ్యక్తులపై దాడిగా, వ్యక్తిగత దాడిగా మారకూడదు. అభిప్రాయ భేదం ఉండొచ్చు కాని, అది శత్రుత్వం కాకూడదు.కామెంట్లతో పోస్ట్‌మార్టంసోషల్‌ మీడియాలో కామెంట్‌ చేయడం చాలా సులభం. ఎదుటివారి ముఖం కనిపించదు. వారి బాధ మనకు తెలియదు. అందుకే కొందరు నిజ జీవితంలో చెప్పలేని మాటలను ఆన్ లైన్ లో సులభంగా రాసేస్తారు. నైతిక తీర్పులు, వ్యక్తిగత విమర్శలు, అవమానకరమైన వ్యాఖ్యలు– ఇవి ఒక్కోసారి ఒక వ్యక్తి ఆత్మవిశ్వాసాన్నే దెబ్బతీయవచ్చు. ‘కామెంటే కదా’ అనుకునే వ్యక్తికి అది కొన్ని సెకన్ల విషయం కావచ్చు. కాని, ఆ కామెంట్‌ అందుకున్న వ్యక్తికి మాత్రం అది చాలా కాలం గుర్తుండిపోయే చేదు జ్ఞాపకం.సైబర్‌ బుల్లీయింగ్‌.. కంటికి కనిపించని వేధింపులే ‘సైబర్‌ బుల్లీయింగ్‌ ’. స్కూల్, కాలేజీ, ఆఫీస్‌లో జరిగే వేధింపులకు సోషల్‌ మీడియా మరో రూపాన్ని ఇచ్చింది. ఎగతాళి చేసే పోస్టులు, అవమానకరమైన మీమ్స్, వ్యక్తిగత ఫొటోలపై దూషణలు, నకిలీ ఖాతాలు, బెదిరింపులు, పదేపదే వేధించే సందేశాలు– ఇవన్నీ ఆన్ లైన్ హెరాస్‌మెంట్‌ రూపాలు. ఇవేవీ కంటికి కనిపించవు, తలుపులు మూసుకున్నా ఆగవు. ఇన్‌ఫ్లుయెన్స్‌ కావొద్దు!సోషల్‌ మీడియాలో ఓ వ్యక్తి చెప్పిన మాట– ఒక ఉత్పత్తిని కొనిపించగలదు. ఒక ఫ్యాషన్ పోస్టు– మన రూపం గురించి మన ఆలోచనలను మార్చగలదు. ఒక అందమైన లైఫ్‌ స్టైల్‌ వీడియో– మన జీవితంతో పోల్చుకునేలా చేయగలదు. అందుకే ఇన్ ఫ్లుయెన్సర్ల ప్రభావం రోజురోజుకూ పెరుగుతోంది. ప్రముఖ బ్రాండ్లు సైతం వీరిని తమ ఉత్పత్తుల ప్రచారానికి ఉపయోగించు కుంటున్నాయి. అయితే సోషల్‌ మీడియాలో కనిపించే ప్రతి ప్రోడక్ట్‌ వారు చెప్పినంత గొప్పది కాకపోవచ్చు. ముఖ్యంగా ఆరోగ్యం, అందం, కొనుగోళ్ళ విషయంలో జాగ్రత్త అవసరం. రాంగ్‌ జడ్జిమెంట్‌!నిజం చెప్పులు తొడుక్కునే లోపు అబద్ధం ప్రపంచం చుట్టి వస్తుందట! ఈ వాక్యం సోషల్‌ మీడియాకి చక్కగా అతికినట్లుగా సరిపోతుంది. ఒక ఆరోపణ సోషల్‌ మీడియాలోకి వస్తుంది. క్షణాల్లో అది వందల పోస్టులుగా మారుతుంది. నిజానిజాలు తెలుసుకునేలోపే ఒక కథ సిద్ధమైపోతుంది. ఎవరో చెప్పిన మాటను నిజమని భావించడం, పాత విషయాన్ని కొత్తదిగా ప్రచారం చేయడం వంటి వాటి వల్ల వ్యక్తిగత జీవితాలు, సంబంధాలు, ప్రతిష్ఠ దెబ్బతినే ప్రమాదం ఉంటుంది.తెలియకుండానే తీర్పులు!ఒక వీడియోలో కొంత భాగం చూశాం. ఒక పోస్టు చదివాం. ఒక కామెంట్‌ నచ్చింది. అంతే, మన తీర్పు సిద్ధం! కానీ ఆ సంఘటనకు ముందు ఏమైంది?, తర్వాత ఏమైంది?, సమాచారం ఎక్కడి నుంచి వచ్చింది?, దానికి ఆధారం ఏమిటి?, ఇవేవీ తెలుసుకోకుండానే అభిప్రాయం ఏర్పరచుకోవడం తొందరపాటు నిర్ణయాలకు దారితీయొచ్చు.సైబర్‌ మోసాలుఎక్కడికి వెళ్తున్నాం, ఏం తింటున్నాం అనే ప్రతి చిన్న విషయాన్ని సోషల్‌ మీడియాలో పోస్ట్‌ చేయడం ఈరోజుల్లో ఒక ట్రెండ్‌గా మారింది. దీని వల్ల సైబర్‌ నేరగాళ్లకు మన వివరాలన్నీ సులువుగా చిక్కు తున్నాయి. ఫోటోలను డౌన్‌లోడ్‌ చేసి మార్ఫింగ్‌లకు పాల్పడి బ్లాక్‌ మెయిల్‌కు పాల్పడుతున్నారు. కరెంట్‌ బిల్లు కట్టలేదంటూ, బ్యాంక్‌ కేవైసీ అప్‌డేట్‌ చేయాలంటూ వస్తున్న మెసేజ్‌లలోని లింక్‌లు క్లిక్‌ చేయగానే బ్యాంక్‌ ఖాతాలు ఖాళీ అవుతున్నాయి. ఈ ఊబిలో చిక్కుకునేది చదువుకోని వారో, లేదంటే టెక్నాలజీ తెలియని వారో అనుకుంటే పొరపాటు. అన్నీ తెలిసిన వారు కూడా ఒక్కోసారి ఇటువంటి ప్రమాదాలను ఎదుర్కోక తప్పడం లేదు. నమ్మకం కలిగించే ఫొటో, పరిచయమైన పేరుతో వచ్చిన ఖాతా నిజమైనదే అని అనుకోవడం ప్రమాదాలకు తెచ్చిపెడుతోంది.నిజమేదో, నకిలీదేదో?ఏఐ టెక్నాలజీతో ఒక వ్యక్తి ముఖాన్ని, గొంతును ఉపయోగించి అతను చెప్పని మాటలను చెప్పినట్టుగా, చేయని పనిని చేసినట్టుగా చూపించే నకిలీ కంటెంట్‌ రూపొందించవచ్చు. ఇలాంటి డీప్‌ఫేక్‌లు వ్యక్తిగత ప్రతిష్ఠ నుంచి ప్రజా చర్చల వరకు ప్రభావం చూపించే అవకాశం ఉంది. అందుకే ఏ వీడియో చూసినా వెంటనే నమ్మకుండా, అది ఎక్కడి నుంచి వచ్చిందో, సందర్భం ఏమిటో వంటివి పరిశీలించడం అవసరం.చట్టం చుట్టం కాదు! ‘ఆన్ లైన్ లోనే కదా పోస్ట్‌ చేసింది. ఏమవుతుందిలే’ అని అనుకుంటే పోలీస్‌ స్టేషన్‌లో కాలుపెట్టక తప్పదు. వ్యక్తిగత గోప్యతకు భంగం కలిగించడం, బెదిరింపులు, వేధింపులు, మోసాలు, అనుమతి లేకుండా వ్యక్తిగత సమాచారాన్ని పంచుకోవడం, నకిలీ కంటెంట్‌ సృష్టి్టంచడం వంటి చర్యలకు సందర్భాన్ని బట్టి చట్టపరమైన పరిణామాలు ఉండవచ్చు. అందుకే డిజిటల్‌ స్వేచ్ఛతో పాటు డిజిటల్‌ బాధ్యత కూడా తెలుసుకోవాలి.సోషల్‌ మీడియా మంచిదా, చెడ్డదా అని కాదు; తప్పా, ఒప్పా కాదు; ఇక్కడ మనం ఎలా వాడుతున్నామనేదే అసలు ముచ్చట. సోషల్‌ మీడియా జ్ఞానాన్ని అందించగలదు, దూరాన్ని తగ్గించగలదు. ప్రతిభకు వేదిక కాగలదు, సమస్యలను ప్రపంచం దృష్టి్టకి తీసుకువెళ్లే ఒక శక్తిమంతమైన సాధనంగా మారగలదు. అదే సమయంలో పోలికలు, తప్పుడు సమాచారం, సైబర్‌ వేధింపులు, మోసాలు, నకిలీ కంటెంట్, అనవసర చర్చలు, టైమ్‌ వేస్ట్‌కి కూడా కారణం కాగలదు. అందుకే ‘సోషల్‌ మీడియాను మనం నడుపుతున్నామా లేక సోషల్‌ మీడియానే మనల్ని నడుపుతోందా?’ అనే సందిగ్ధతలో చిక్కుకుపోకుండా, విచక్షణతో ముందుకు సాగడమే అసలైన డిజిటల్‌ తెలివి. చివరగా తెలుసుకోవాల్సిందేమిటంటే, చూసేవన్నీ నిజాలు కావు. ఏది నిజమో, ఏది అవసరమో, దేన్ని కొనాలో, దేన్ని దాటవేయాలో ఆలోచించి సోషల్‌ మీడియాని సంయమనంతో వినియోగిస్తే లాభం లేకపోయినా నష్టం నుంచి దూరంగా ఉండవచ్చు.10 సూత్రాలతో పదిలం!1. చూసిన ప్రతిదాన్ని నిజమని నమ్మకండి. మూలం తెలుసుకోండి.2. ప్రతి విషయానికీ స్పందించాల్సిన అవసరం లేదు. కొన్నింటికి మౌనమే మంచి సమాధానం.3. ఇతరులతో పోల్చుకోవద్దు. స్క్రీన్ పై కనిపించేది పూర్తి జీవితం కాదు.4. లైక్‌లు మీ విలువను నిర్ణయించవు. అవి వ్యక్తిగత విలువకు కొలమానం కావు.5. వ్యక్తిగత సమాచారం జాగ్రత్త. ఫొటోలు, ఫోన్ నంబర్లు, అడ్రస్‌లు, పాస్‌వర్డ్‌లు వంటి వివరాల్లో అప్రమత్తంగా ఉండాలి.6. కోపంలో కామెంట్‌లు వద్దు. పోస్ట్‌ చేయడానికి ముందు ఒక్క క్షణం ఆలోచించండి.7. ప్రతి వైరల్‌ వీడియో నిజం కాదేమో! ముందు పరిశీలించండి.8. ఫోన్ కు టైమ్‌ లిమిట్‌ తప్పనిసరి. నోటిఫికేషన్లు మీ సమయాన్ని తినేయవద్దు.9. డీప్‌ఫేక్‌లు, నకిలీ ఖాతాలు, లింకుల విషయంలో జాగ్రత్త. గుడ్డిగా నమ్మేయవద్దు.10. నిజ జీవితాన్ని మర్చిపోవద్దు. కుటుంబం, స్నేహితులు, చదువు, పని, నిద్ర, ఆరోగ్యం– ఇవన్నీ స్క్రీన్ బయటే ఉన్నాయి.లైఫ్‌ అంటే లైక్స్‌ కాదు!ఒక ఫొటో పెట్టాం. ఎన్ని లైక్‌లు వచ్చాయి?, ఎవరు కామెంట్‌ చేశారు?, ఎంతమంది షేర్‌ చేశారు? లైక్‌లు ఎక్కువైతే ఆనందం. తక్కువైతే నిరాశ. స్పందన రాకపోతే మరో పోస్టు. ఇలా ఇతరుల స్పందనతో మన ఆనందాన్ని కొలిచే అలవాటు సహజమైపోతోంది. ఫోన్ ను కాసేపు పక్కన పెట్టినా.. ‘ఏదైనా మెసేజ్‌ వచ్చిందా?’, ‘ఎవరైనా కామెంట్‌ చేశారా?’, ‘కొత్తగా ఏమైనా జరిగిందా?’’ అనే ఆలోచన మళ్లీ ఫోన్ వైపు తీసుకెళ్తుంది.స్వీయ నియంత్రణసోషల్‌ మీడియాలో పెద్ద సమస్యల్లో ఒకటి సెల్ఫ్‌ అసెస్‌మెంట్‌ కోల్పోవడం. ఏది చూడాలి?, ఎంతసేపు చూడాలి?, దేనిని ఫాలో అవ్వాలి?, దేనిని పట్టించుకోకూడదు?, ఏ కామెంట్‌కు స్పందించాలి?, ఏ విషయాన్ని వదిలేయాలి? ఈ హద్దులు మనమే నిర్ణయించుకోవాలి. కానీ నిరంతరం వస్తున్న కంటెంట్‌ మధ్య మనకు అవసరమైనది, మనకు హాని చేసేది గుర్తించడం కష్టమవుతోంది.⇒ పొద్దున్న లేవగానే కళ్లు కూడా పూర్తిగా తెరవకుండానే చేతులు మొట్టమొదట వెతికేది ఫోన్‌నే! అయితే, మనల్ని ఇంతలా అడిక్ట్‌ చేస్తున్న ఈ డిజిటల్‌ ప్రపంచం వెనుక కొన్ని సరదా, విచిత్రమైన రీసెర్చ్‌ నిజాలు దాగున్నాయి.⇒ మీ జేబులో ఫోన్‌ లేకపోయినా, అసలు మెసేజ్‌ రాకపోయినా ‘ఫోన్‌ వైబ్రేట్‌ అయిందేమో‘ అనిపించిందా?. దానినే ఫాంటమ్‌ వైబ్రేషన్‌ సిండ్రోమ్‌ అంటారు. సర్వేల ప్రకారం 90% పైగా స్మార్ట్‌ఫోన్‌ వినియోగదారులు ఈ ఫాంటమ్‌ వైబ్రేషన్ ని అనుభవిస్తారు. మన మెదడు నోటిఫికేషన్ల కోసం ఎంతగా ఆరాటపడుతుందంటే, చిన్న కండరాల కదలికను కూడా ఫోన్‌ వైబ్రేషన్‌ అనుకుని భ్రమపడుతుంది!⇒ ఫోన్‌ చార్జింగ్‌ అయిపోతుందేమో, లేదంటే నెట్‌వర్క్‌ పోతుందేమో అని కలిగే భయాన్ని ‘నోమో ఫోబియా’ అని పిలుస్తారు. అంటే మనం రోజులో చాలాసార్లు ఈ ఫోబియా బారిన పడుతుంటాం.⇒ ఆన్ లైన్ లో 90% మంది కేవలం లర్కర్స్‌. అంటే వీరు సోషల్‌ మీడియా పోస్టులను సైలెంట్‌గా చూసి వెళ్లిపోతారు.⇒ రీసెర్చ్‌ ప్రకారం, ఫోన్‌ పోయినా లేదా చార్జింగ్‌ ఐపోయినా మనుషుల్లో పెరిగే హార్ట్‌బీట్‌ రేట్, భయం... ఎదురుగా ఒక పాము వచ్చినప్పుడు కలిగే భయంతో సమానమట!⇒ సోషల్‌ మీడియాలో ‘పర్ఫెక్ట్‌ లైఫ్‌’ చూపించడం ఒక పెద్ద టాస్క్‌. ఒక అధ్యయనం ప్రకారం, 30% కంటే ఎక్కువ మంది తాము వెళ్లని ప్రదేశాల్లో ఉన్నట్టు, లేదా కొనని వస్తువులను కొన్నట్టు సోషల్‌ మీడియాలో బిల్డప్‌ ఇవ్వడానికి అబద్ధాలు చెప్తారట!⇒ ఇన్ స్ట్రాగామ్‌లో ఫొటో పెట్టడానికి ప్లేట్‌ ముందు పెట్టుకుని, పది నిమిషాలు యాంగిల్స్‌ వెతికే అలవాటు మీకూ ఉందా? ఒక అధ్యయనం ప్రకారం, సోషల్‌ మీడియా లవర్స్‌ తమ జీవితంలో సగటున కనీసం ఆరు నెలల కాలాన్ని కేవలం ఫొటోలు తీయడానికి, పర్ఫెక్ట్‌ ఫిల్టర్‌ ఎంచుకోవడానికే కేటాయిస్తారు.రమా జంబుల

రాష్ట్రానికి మరో తుపాను ముప్పు

సాక్షి, అమరావతి : కోస్తాంధ్రను అతలాకుతలం చేసిన అర్నబ్‌ తుపాను గాయాలు ఇంకా సలుపుతుండగానే, రాష్ట్రాన్ని మరో తుపాను ముప్పు వణికిస్తోంది. ఆగ్నేయ బంగాళాఖాతం, దానికి ఆనుకుని ఉన్న అండమాన్‌ సముద్ర ప్రాంతాల్లో ఏర్పడిన అల్పపీడనం శనివారం వాయుగుండంగా మారింది. ఇది మరింత బలపడి తుపానుగా మారుతుందని వాతావరణ శాఖ తెలిపింది. ప్రస్తుతం ఇది శ్రీ విజయపురానికి 330, చెన్నైకి 1140, మచిలీపట్నానికి 1200 కిలోమీటర్ల దూరంలో కేంద్రీకృతమై ఉంది. ఇది పశ్చిమ వాయువ్య దిశగా ఏపీ తీరం వైపు కదులుతూ ఆదివారానికి తీవ్ర వాయుగుండంగా, సోమవారానికి ఏపీ తీరానికి దగ్గరగా చేరుకుని తుపానుగా బలపడనుంది. మంగళవారం కావలి సమీపంలో తుపానుగా తీరం దాటే అవకాశం ఉందని వాతావరణ శాఖ అంచనా వేసింది. దీని ప్రభావంతో ఆది, సోమ, మంగళవారాల్లో కోస్తా, రాయలసీమ జిల్లాల్లో భారీ నుంచి అతి భారీ వర్షాలు కురుస్తాయని తెలిపింది. ఆదివారం కృష్ణా, గుంటూరు, బాపట్ల, ప్రకాశం, నెల్లూరు జిల్లాల్లో అక్కడక్కడా భారీ వర్షాలు కురుస్తాయి.మూడు జిల్లాలకు రెడ్‌ అలర్ట్‌కృష్ణా, గుంటూరు, బాపట్ల జిల్లాల్లో సోమవారం అక్కడక్కడా అత్యంత భారీ వర్షాలు కురిసే అవకాశం ఉండడంతో ఈ మూడు జిల్లాలకు రెడ్‌ అలర్ట్‌ ప్రకటించారు. అదే రోజు ఏలూరు, పశ్చిమగోదావరి, ఎన్టీఆర్, పల్నాడు, ప్రకాశం, నెల్లూరు, తిరుపతి జిల్లాల్లో అక్కడక్కడా భారీ నుంచి అతిభారీ వర్షాలు కురుస్తాయని వాతావరణ శాఖ తెలిపింది. తూర్పుగోదావరి, కోనసీమ, నంద్యాల, వైఎస్సార్‌ కడప, అన్నమయ్య, చిత్తూరు జిల్లాల్లో భారీ వర్షాలు పడే అవకాశం ఉంది. మంగళవారం కాకినాడ, తూర్పుగోదావరి, కోనసీమ, ఏలూరు, పశ్చిమ గోదావరి, ఎన్టీఆర్, కృష్ణా, పల్నాడు, గుంటూరు, బాపట్ల, ప్రకాశం జిల్లాలు, యానాంలో అక్కడక్కడా భారీ నుంచి అతిభారీ వర్షాలు కురిసే అవకాశం ఉంది. విజయనగరం, విశాఖపట్నం, అనకాపల్లి, నెల్లూరు, కర్నూలు, నంద్యాల, వైఎస్సార్‌ కడప, అన్నమయ్య, తిరుపతి, చిత్తూరు జిల్లాల్లో భారీ వర్షాలు పడతాయి. బుధవారం అల్లూరి సీతారామరాజు, కాకినాడ, తూర్పు గోదావరి, ఏలూరు జిల్లాల్లో అక్కడక్కడా భారీ వర్షాలు కురుస్తాయని తెలిపింది.గంటకు 100 కిలోమీటర్ల వేగంతో గాలులుతీరం వెంబడి ఆదివారం సాయంత్రం నుంచి గంటకు 40 నుంచి 50 కిలోమీటర్లు, గరిష్టంగా 60 కిలోమీటర్ల వేగంతో ఈదురుగాలులు వీచే అవకాశం ఉంది. సోమవారం మధ్యాహ్నానికి గాలుల తీవ్రత గరిష్టంగా 85 కిలోమీటర్లకు, సోమవారం సాయంత్రం నుంచి మంగళవారం ఉదయం వరకు గంటకు గరిష్టంగా 100 కిలోమీటర్ల వేగంతో గాలులు వీస్తాయని వాతావరణ శాఖ హెచ్చరించింది. మత్స్యకారులు వేటకు వెళ్లవద్దని సూచించింది.