హరహర మహాదేవ

లేపాక్షి: ఓం నమః శివాయ, హరహర మహాదేవ అంటూ భక్తులంతా ఆ ముక్కంటిని కీర్తించగా పంచాక్షరీ నామంతో లేపాక్షి ప్రతిధ్వనించింది. మహాశివరాత్రి ఉత్సవాలను పురస్కరించుకుని సోమవారం శివపార్వతుల బ్రహ్మ రథోత్సవం వైభవంగా సాగింది. మధ్యాహ్నం ప్రత్యేక పూజల తర్వాత నాట్యమంటపంలో స్వామి వారికి మహామంగళ హారతి ఇచ్చి శివపార్వతుల ఉత్సవ విగ్రహాలను వేదపండితులు ఊరేగింపుగా బస్టాండు వద్దకు తీసుకువచ్చి రథంలో కొలువుదీర్చారు. హరహర మహాదేవ అంటూ భక్తులు కీర్తించగా కదిలిన కై లాసవాసుని రథం ఎగువ పేటలోని రామభజన మందిరం వరకు సాగింది. రథం ముందు భాగంలో మేళతాళాలు, మంగళ వాయిద్యాలు, హైదరాబాద్‌ నుంచి వచ్చిన వెంకట అన్నమాచార్య బృందం కోలాటాలను ప్రదర్శించారు. రథం రామ భజన మందిరం వద్దకు చేరుకోగానే ప్రత్యేక పూజలు చేశారు. సాయంత్రం ధూళోత్సవం తర్వాత రథాన్ని యథాస్థానంలోకి ఽతీసుకు వచ్చారు. ఆలయ కమిటీ చైర్మన్‌ కరణం రమానందన్‌, ఈఓ నరసింహమూర్తి పర్యవేక్షణలో సునీల్‌శర్మ ఆధ్వర్యంలో వేదపండితులు పూజ కార్యక్రమాలను నిర్వహించారు. అంతకుముందు ఉదయం స్వామివారికి అభిషేకార్చనలు, రథ సంప్రోక్షణ తదితర కార్యక్రమాలను నిర్వహించారు.

గరుత్మంతుని ఆగమనం..

శివపార్వతుల రథోత్సవం ప్రారంభానికి ముందు రెండు గరుడ పక్షులు రథం చుట్టూ తిరిగాయి. ఆ ఆదిదంపతులను దర్శించుకుంటున్నట్లుగా రథం ముందు భాగంలో ఎగురుతూనే కాసేపు నిలిచాయి. ఈ వింతను చూసిన భక్తులు శంభోశంకర అంటూ పార్వతీపతిని కీర్తిస్తూ ఆధ్యాత్మిక భావనలో మునిగిపోయారు. హిందూపురం డీఎస్పీ మహేష్‌ ఆధ్వర్యంలో సీఐలు, ఎస్‌ఐలు గట్టి బందోబస్తును ఏర్పాటు చేశారు. కార్యక్రమంలో పలువురు సర్పంచ్‌లు, ఎంపీటీసీ సభ్యులు, ప్రజాప్రతినిధులు, గ్రామ పెద్దలు, అన్నదాన కమిటీ సభ్యులు పాల్గొన్నారు.

లేపాక్షిలో వైభవంగా

శివపార్వతుల బ్రహ్మ రథోత్సవం

భారీగా హాజరైన భక్తజనం

హరహర మహాదేవ

హరహర మహాదేవ

హరహర మహాదేవ