మరిన్ని సడలింపులు

కడప సిటీ : కోవిడ్‌–19 వైరస్‌ వ్యాప్తి నేపథ్యంలో వ్యాపార రంగం కుదేలైంది. దీంతో వ్యాపారులు, కూలీలు, ప్రజలు తీవ్ర ఇబ్బందులుది పడ్డారు. ఈ నేపథ్యంలో ప్రభుత్వం గత కొన్ని రోజులుగా లాక్‌డౌన్‌లో కొన్ని సడలింపులుగా ఇవ్వగా, తాజాగా మరికొన్నింటికి ఇచ్చింది. 60 రోజులుగా మూతపడిన నగలు, దుస్తులు, పాదరక్షల దుకాణాలకు ఎట్టకేలకు మోక్షం లభించింది. నిబంధనలకు లోబడి వాటిని నిర్వహించుకునేందుకు ప్రభుత్వం అనుమతులు ఇచ్చింది. దీంతో ఆ దుకాణాల షెట్టర్లు తెరుచుకోనున్నాయి. వీధి హోటళ్లు (స్ట్రీట్‌ ఫుడ్స్‌)కు కూడా అనుమతి ఇచ్చింది. అయితే పార్శల్‌ సర్వీసుకు మాత్రమే అనుమతులు ఉన్నాయి. పానీపూరీ బండ్లకు నిరాకరించింది. కంటైన్‌మెంట్‌ ప్రాంతాలకు మాత్రం ఈ సడలింపులు ఇవ్వలేదు. వీటికి సంబంధించిన ప్రకటనను జిల్లా కలెక్టర్‌ హరికిరణ్‌ మంగళవారం విడుదల చేశారు.

విధి విధానాలు
♦ పైన పేర్కొన్న సంబంధిత వ్యాపార వర్గాలు ప్రభుత్వం నిర్దేశించిన మార్గదర్శకాలు, ప్రమాణికాలను తప్పనిసరిగా పాటించాలి.
♦ వ్యాపారాలకు సంబంధించిన పెద్ద దుకాణాలు ఆన్‌లైన్‌ బుకింగ్‌ను ప్రోత్సహించాలి.
♦ వినియోగదారుల వివరాలు నమోదు చేయాలి.
♦ థర్మల్‌ స్క్రీనింగ్, చేతులను శానిటైజ్‌ చేసిన తర్వాత అనుమతించాలి. 99 డిగ్రీల జ్వరంతో గానీ, ఇతర కోవిడ్‌ లక్షణాలు ఉన్నట్లయితే వారిని అనుమతించరాదు.
♦ కోవిడ్‌ లక్షణాలు ఉన్న సిబ్బందిని గానీ, ఇతరులను గానీ దుకాణదారుడు అనుమతించడానికి వీలు లేదు.
♦ ప్రతి కౌంటర్‌లో శానిటైజర్‌ ఏర్పాటు చేయాలి. వినియోగదారుడు లోనికి వచ్చినపుడు, బయటికి వెళ్లేటపుడు చేతులు శుభ్రం చేసుకోవాలి.
♦ నగల దుకాణదారుడు వినియోగదారులకు డిస్పోజబుల్‌ గ్లౌజ్‌ ద్వారా మాత్రమే నగలు తాకే అవకాశం కల్పించాలి.
♦ వస్త్ర, నగల దుకాణాల్లో వస్తువులు ధరించే పద్ధతి అనుమతించరాదు. ట్రయిల్‌ గదులను మూసివేయాలి.
♦ ప్రవేశ ద్వారం వద్ద పాదరక్షలను క్రిమి రహిత ద్రావణంతో పిచికారీ చేయాలి.
♦ అనుకూలతను బట్టి వ్యాలెట్‌ పార్కింగ్‌ అనుమతిస్తూ కార్లకు దారి చూపాలి. వాహనం బీగాలను శానిటైజ్‌ చేయాలి.
♦ అన్ని ప్రాంతాల్లో పరిశుభ్రత పాటించాలి. లిఫ్ట్‌లో సిబ్బంది మాత్రమే ప్రెస్‌ బటన్‌ నొక్కడం చేయాలి.
♦ షాపులలో ఆరు అడుగుల దూరాన్ని వినియోగదారులు పాటించేలా మార్కింగ్‌ వేయాలి. వీలైనంత వరకు నగదు లావాదేవీలను నివారించి ఆన్‌లైన్‌ పేమెంట్‌ చేయాలి. కార్డు పేమెంట్‌ శానిటైజ్‌ చేయాలి.
♦ తినుబండారాలు, న్యూస్‌ పేపర్లు, మ్యాగ్‌జైన్లు, ఇతర పానీయాలు తాత్కాలికంగా నివారించాలి.

వీధి వర్తకులు పాటించాల్సిన పద్ధతులు
♦ వీధి వర్తకులు (స్త్రీట్‌ ఫుడ్స్‌) నిబంధనలు పాటిస్తూ వ్యాపార లావాదేవీలు కొనసాగించాలి.
♦ కేవలం పార్శల్‌ రూపంలోనే వినియోగదారులకు ఇవ్వాలి.
♦ మున్సిపల్‌ కార్యాలయంలో రిజిస్టర్‌ చేసుకుని మున్సిపల్‌ కమిషనర్ల ద్వారా అనుమతి, గుర్తింపు కార్డులు పొందిన వారు మాత్రమే వీధుల్లో అమ్మకాలు చేపట్టాలి.
♦ రిజిస్ట్రేషన్, ఐడీ కార్డు లేని వారు వారికి సంబంధించిన వార్డు సచివాలయానికి వెళ్లి వాటిని పొందవచ్చు. మున్సిపల్‌ కమిషనర్లు వీరికి గుర్తింపు కార్డులు జారీ చేస్తారు.
♦ ప్రతి వీధి వర్తకుడు ఐడీ కార్డు ధరించి ఉండాలి. చేతికి గ్లౌజులు, మాస్క్‌లు ధరించాలి.
♦ పానీపూరీ, ఎక్కువ వైరస్‌ సంక్రమణ వస్తువులను అమ్మకానికి అనుమతించరాదు.
♦ ఐదుగురు గుమికూడకుండా చూసుకోవాలి. భౌతికదూరం పాటించాలి. ఆరు మీటర్ల మేర భౌతిక దూరం పాటించేలా మార్కింగ్‌ వేయాలి.
♦ జిల్లాలోని మున్సిపల్‌ కమిషనర్లు వీధి వర్తకులకు అవగాహన కల్పించి వినియోగదారులు, వ్యాపారులకు ఎటువంటి ఇబ్బంది లేకుండా పై నిబంధనలు పాటించేలా చర్యలు తీసుకోవాలని కలెక్టర్‌ ఆదేశించారు.