TV
ఇంద్రకీలాద్రి(విజయవాడపశ్చిమ): వీఐపీ దర్శనం చేయిస్తానంటూ భక్తుల నుంచి డబ్బులు వసూలు చేసి.. వారిని ఆలయంలో వదిలేసిన ఘటన ఆదివారం దుర్గగుడిలో చోటుచేసుకుంది. గతంలో వన్టౌన్ పీఎస్లో హోంగార్డుగా చంద్రశేఖర్ విధులు నిర్వహించే వాడు. అయితే చంద్రశేఖర్ హోంగార్డు ఉద్యోగం తర్వాత గతంలో ఉన్న పరిచయాలతో ఆలయంలో తిరుగుతూ భక్తులకు దర్శనాలు చేయించసాగాడు. ఆదివారం భక్తుల రద్దీ అధికంగా ఉన్న తరుణంలో మహా మండపం దిగువన టికెట్ కౌంటర్ వద్ద నిల్చుని వీఐపీ దర్శనాలు చేయిస్తానంటూ కొంత మంది భక్తుల నుంచి భారీగా డబ్బులు వసూలు చేశారు. డబ్బులు చెల్లించిన నాలుగు బృందాలను లిఫ్ట్ ద్వారా కొండపైకి తీసుకువెళ్లి వారిని ఆలయ ప్రాంగణంలో వదిలేశాడు. డబ్బులు చెల్లించిన భక్తులు చంద్రశేఖర్ కోసం ఎదురు చూసినా అతని జాడ కనిపించలేదు. దీంతో మోసపోయామని గ్రహించిన భక్తులు ఆలయంలో అధికారులకు ఫిర్యాదు చేయడంతో పాటు ఆలయ ప్రాంగణంలోని పోలీస్ అవుట్పోస్టులో సిబ్బందికి సైతం విషయం తెలియజేశారు. వెంటనే అప్రమత్తమైన అవుట్ పోస్టు సిబ్బంది చంద్రశేఖర్ కోసం ఆలయ ప్రాంగణంలో, దేవస్థాన సీసీ కెమెరాలో వెతికినా ఫలితం లేకపోయింది. దీంతో విసుగుపోయిన భక్తులు వన్టౌన్ పోలీసులకు ఫిర్యాదు చేశారు. నాలుగు బృందాల్లో మొత్తం 15 మంది భక్తుల నుంచి రూ.500 చొప్పున రూ. 7500 వసూలు చేసినట్లు భక్తులు పేర్కొంటున్నారు. అయితే ఉదయం నుంచి కూడా చంద్రశేఖర్ పలువురికి వీఐపీ దర్శనాలు చేయించినట్లు తెలుస్తుంది. ఈ వ్యవహారంలో కొంత మంది ఆలయ సిబ్బంది ప్రమేయం ఉన్నట్లు ఆలయ అధికారులు అనుమానాలు వ్యక్తం చేస్తున్నారు. చంద్రశేఖర్ ఫోన్ నంబర్ ఆధారంగా అతని ఆచూకీ తెలుసుకునే పనుల్లో పోలీసులు నిమగ్నమయ్యారు.
