women's cricketer

కొన్ని నెలల క్రితం... కనీస సౌకర్యాలు లేని దక్షిణ కశ్మీర్‌లోని మారుమూల గ్రామంలో క్రికెట్‌ ఆడుతున్న బాలిక ఫొటో వైరల్‌ అయింది. ఆ పాపకు ఎలాంటి కోచింగ్‌ లేదు. సరిౖయెన బ్యాట్‌ కూడా లేదు. అయితే గట్టి కల మాత్రం ఉంది. ‘నేను స్మృతి మంధాన అవుతాను’ అనేది ఆ కల. ‘చిట్టితల్లీ... నీకు నేను అండగా ఉంటాను’ అని ప్రకటించింది స్మృతి మంధాన. యునిసెఫ్‌ గర్ల్స్‌ ఎంపవర్‌మెంట్‌ అడ్వకేట్‌గా లక్షలాది మంది చిన్నారులకు స్మృతి అండగా నిలవాల్సిన టైమ్‌ వచ్చేసింది. బాలికలకు సమాన అవకాశాలు, ఆరోగ్యం, శ్రేయస్సుకు సంబంధించి సెలబ్రిటీ అడ్వకేట్‌గా భారత మహిళా క్రికెట్‌ జట్టు కొత్త కెప్టెన్‌ స్మృతి మంధానను యూనిసెఫ్‌ నియమించింది...బాలికలకు సాధికారత కల్పించడం, ఆరోగ్యం, శ్రేయస్సును మెరుగుపరచడం, నాయకత్వ స్థానాలలోకి ఎదగడంలో సహాయపడడం... మొదలైన వాటికి సంబంధించి యూనిసెఫ్‌ ఇండియా కృషికి స్మృతి మంధాన తన వంతు సహకారం అందించనుంది.ప్రతి కల... ఒక అవకాశంతోనే...‘యునిసెఫ్‌ ఇండియాలో సెలబ్రిటీ అడ్వకేట్‌గా చేరడం నాకు ఎంతో గౌరవంగా ఉంది. ప్రతి కల ఒక అవకాశంతోనే మొదలవుతుంది. క్రికెట్‌ ఆడుతూ పెరగడం వల్ల ఈ విషయాన్ని తెలుసుకోగలిగాను. కృషి, పట్టుదల, ప్రోత్సాహం తోడైతే వచ్చిన అవకాశం అద్భుతమైన ఫలితంగా మారుతుంది. ప్రతి బిడ్డకు కలలు కనే అవకాశం రావాలి. పూర్తి ఫలితాన్ని అందుకునే అవకాశం దక్కాలి’ అంటుంది స్మృతి మంధాన.స్వాగతం... సుస్వాగతం...యూనిసెఫ్‌కు దక్షిణాసియా ప్రాంతీయ రాయబారి గా ఆ సంస్థతో దీర్ఘకాల అనుబంధం ఉన్న క్రికెట్‌ ఐకాన్‌ సచిన్‌ టెండుల్కర్‌ ఆమె నియామకం పట్ల హర్షం వ్యక్తం చేస్తూ.. ‘యునిసెఫ్‌ ఇండియా కుటుంబంలోకి స్వాగతం పలుకుతున్నాను. మీరు మైదానంలో లక్షలాది మందికి స్ఫూర్తిని ఇచ్చారు. మైదానం బయట బాలల హక్కుల కోసం అద్భుత గళంగా నిలుస్తారని నాకు తెలుసు’ అని ట్వీట్‌ చేశారు. ‘యూనిసెఫ్‌ ఇండియా సెలబ్రిటీ అడ్వకేట్‌గా స్మృతి మంధానకు స్వాగతం పలకడం మాకు సంతోషంగా ఉంది. ఆశావహ యువ క్రీడాకారిణి నుండి ప్రపంచ క్రికెట్‌ ఐకాన్‌గా ఎదిగిన స్మృతి ప్రయాణం ఎంతోమందికి స్ఫూర్తినిస్తుంది. ప్రతిభకు అవకాశం తోడైతే జరిగేది ఏమిటో ఆమె ప్రయాణం సూచిస్తుంది. ప్రతి బాలికకు నేర్చుకోవడానికి, ఆడుకోవడానికి, నాయకత్వం వహించడానికి, తమ సామర్థ్యాన్ని పూర్తి స్థాయిలో వినియోగించుకోవడానికి అవకాశం కల్పించేందుకు, స్మృతితో కలిసి పనిచేయడానికి ఎదురుచూస్తున్నాం’ అన్నారు యునిసెఫ్‌ ఇండియా ప్రతినిధి సింథియా మెక్‌కాఫ్రే.ప్రతిభకు ప్రోత్సాహం తోడైతే...మహారాష్ట్రలోని ముంబైలో జన్మించి సాంగ్లీలో పెరిగిన స్మృతి మంధానకు చిన్న వయసులోనే క్రికెట్‌ అంటే ఇష్టం ఏర్పడింది. తండ్రి, సోదరుడు క్రికెట్‌ బాగా ఆడేవారు. దీంతో ఇంటినిండా క్రికెట్‌ కబుర్లే.బాలికల కలలకు ప్రతిభ తోడైతే, ఆ ప్రతిభకు ప్రోత్సాహం చేరువైతే పూర్తి స్థాయిలో సామర్థ్యాన్ని వినియోగించుకోవచ్చు అని చెప్పడానికి స్మృతి మంధాన బలమైన ఉదాహరణ. తొమ్మిదేళ్ల వయసులో అండర్‌–15 జట్టులోకి ప్రవేశించి, 11 ఏళ్ల వయసులో అండర్‌–19 జట్టుకు చేరుకుంది మంధాన. ‘నేను ఈరోజు ఈ స్థాయిలో ఉండడానికి తల్లిదండ్రుల ప్రోత్సాహమే కారణం’ అంటుంది. చాలా చిన్న వయసులోనే ‘నేను వరల్డ్‌ ఛాంపియన్‌ కావాలి’ అని కలలు కనేది.అలాంటి కలలు దేశవ్యాప్తంగా ఎంతోమంది బాలికలకు కచ్చితంగా ఉంటాయి. ఆ కలలు సాకారం కావాలంటే సమాజానికి స్మృతి మంధాన లాంటి గర్ల్స్‌ ఎంపవర్‌మెంట్‌ అడ్వకేట్‌లు అవసరం. వారి స్ఫూర్తిదాయకమైన చరిత్ర మరింత అవసరం. అండగా నిలిచేలా...దక్షిణ కశ్మీర్‌లో అందమైన గ్రామం అది. ఆ గ్రామానికి చెందిన మూడవ తరగతి విద్యార్థిని అమీనా అందమైన కల కంటోంది. క్రికెటర్‌ కావాలనేది ఆమె కల. ఈ చిన్నారికి స్ఫూర్తి... స్టార్‌ క్రికెటర్‌ స్మృతి మంధాన. ఈ అమ్మాయి గురించి తన ΄ోస్ట్‌ ద్వారా లోకానికి పరిచయం చేశాడు సినీ దర్శకుడు కబీర్‌ఖాన్‌. కనీస సౌకర్యాలు లేని మారుమూల ప్రాంతాలలో కూడా చిన్నారులలో కలలు ఉంటాయని ఈ ΄ోస్ట్‌ మరోసారి గుర్తుచేసింది. పిల్లలు అరు లోయలో కొండల మధ్య, ఎగుడు దిగుడు మైదానాలపై క్రికెట్‌ ఆడుతుంటారు. ప్రకృతి కూడా మౌనంగా ఆటలో భాగం అవుతుంది. కబీర్‌ఖాన్‌ ΄ోస్ట్‌కు స్మృతి మంధాన ఇలా స్పందించింది...‘అరులోని ఆ లిటిల్‌ ఛాంపియన్‌కు దయచేసి నా తరఫున హగ్‌ ఇవ్వండి. నేను ఆమెకు స΄ోర్ట్‌గా ఉంటానని చెప్పండి’- స్మృతి మంధానఇదీ చదవండి: "ఆమె నా కూతురు": తండ్రిగా గర్వించే క్షణం..

లండన్‌: గత ఏడాది అత్యద్భుత ప్రదర్శనతో ప్రపంచ క్రికెట్‌ను శాసించిన ఇంగ్లండ్‌ టాప్‌ ఆల్‌రౌండర్‌ బెన్‌ స్టోక్స్‌ ప్రతిష్టాత్మక పురస్కారానికి ఎంపికయ్యాడు. 2019 సంవత్సరానికిగాను ‘లీడింగ్‌ క్రికెటర్‌ ఆఫ్‌ ద వరల్డ్‌’గా స్టోక్స్‌ను ఎంపిక చేసినట్లు విజ్డన్‌ క్రికెటర్స్‌ అల్మనాక్‌ ప్రకటించింది. 2005లో ఆండ్రూ ఫ్లింటాఫ్‌ తర్వాత ఒక ఇంగ్లండ్‌ ఆటగాడు దీనికి ఎంపిక కావడం ఇదే మొదటిసారి. వరుసగా గత మూడు సంవత్సరాలు లీడింగ్‌ క్రికెటర్‌గా కోహ్లి ఎంపిక కాగా... ఇప్పుడు స్టోక్స్‌ ఆ స్థానంలోకి వచ్చాడు. ఇంగ్లండ్‌ తొలిసారి వన్డే వరల్డ్‌ కప్‌ గెలుచుకోవడంలో కీలకపాత్ర పోషించిన స్టోక్స్‌... ఫైనల్లోనూ ప్లేయర్‌ ఆఫ్‌ ద మ్యాచ్‌గా నిలిచాడు. ఆ తర్వాత కొద్ది రోజులకే స్టోక్స్‌ టెస్టు క్రికెట్‌లో అత్యుత్తమ ఇన్నింగ్స్‌లలో ఒకటి ఆడాడు. హెడింగ్లీలో జరిగిన యాషెస్‌ సిరీస్‌ మూడో టెస్టులో 135 పరుగులు చేసి ఇంగ్లండ్‌కు సంచలన విజయం అందించాడు. మహిళల విభాగంలో ఆస్ట్రేలియా ఆల్‌రౌండర్‌ ఎలీస్‌ పెర్రీ ఉత్తమ ప్లేయర్‌గా ఎంపికైంది. 2016లోనూ ఇదే అవార్డుకు ఎంపికైన పెర్రీ...రెండుసార్లు ఈ పురస్కారానికి ఎంపికైన తొలి మహిళా క్రికెటర్‌గా నిలిచింది. యాషెస్‌ టెస్టు రెండు ఇన్నింగ్స్‌లలో సెంచరీ, అర్ధసెంచరీ చేయడంతో పాటు వన్డేల్లో 73 సగటుతో, టి20ల్లో 150 సగటుతో పరుగులు సాధించింది. మరో 27 వికెట్లు కూడా పడగొట్టింది. టి20ల్లో వరల్డ్‌ లీడింగ్‌ క్రికెటర్‌ గా వెస్టిండీస్‌ ఆల్‌రౌండర్‌ రసెల్‌ ఎంపికయ్యాడు.

సాక్షి, హైదరాబాద్‌ : బీసీసీఐ సీనియర్‌ మహిళల వన్డే లీగ్‌ ఎలైట్‌ గ్రూప్‌ ‘ఎ’లో రైల్వేస్‌ జట్టు జైత్రయాత్ర కొనసాగిస్తోంది. ఆంధ్రతో మంగళవారం జరిగిన మ్యాచ్‌లో రైల్వేస్‌ నాలుగు వికెట్ల తేడాతో గెలిచి వరుసగా మూడో విజయాన్ని నమోదు చేసింది. టాస్‌ గెలిచి తొలుత బ్యాటింగ్‌ ఎంచుకున్న ఆంధ్ర  నిర్ణీత 50 ఓవర్లలో 8 వికెట్ల నష్టానికి 156 పరుగులు చేసింది. కెప్టెన్‌ హిమబిందు (107 బంతుల్లో 53; 7 ఫోర్లు), సుధారాణి (35 బంతుల్లో 28; 1ఫోర్, 2 సిక్స్‌లు), పుష్పలత (22) రాణించారు. రైల్వేస్‌ బౌలర్లలో సుకన్య (2/19), పూనమ్‌ యాదవ్‌ (2/30) ఆకట్టుకున్నారు. 157 పరుగుల విజయ లక్ష్యంతో బరిలోకి దిగిన రైల్వేస్‌  మరో 8 ఓవర్లు మిగిలుండగానే 6 వికెట్ల తేడాతో విజయం సాధించింది. రెల్వేస్‌ తరఫున కెప్టెన్‌ మిథాలీ రాజ్‌ (22; 3 ఫోర్లు), తిరుష్‌ కామిని (39; 5 ఫోర్లు), పూనమ్‌ రౌత్‌ (36 బంతుల్లో 34; 4 ఫోర్లు, 2 సిక్స్‌లు) రాణించారు. ఆంధ్ర బౌలర్లలో మల్లిక (2/44) ఆకట్టుకుంది.   ఓటమితో ముగిసిన హైదరాబాద్‌ పోరు  ఐదు జట్లున్న ఎలైట్‌ ‘ఎ’ గ్రూప్‌లోనే ఉన్న హైదరాబాద్‌ తమ నాలుగు మ్యాచ్‌లను పూర్తి చేసుకుంది. హిమాచల్‌ప్రదేశ్‌తో మంగళవారం జరిగిన మ్యాచ్‌లో హైదరాబాద్‌ ఆరు వికెట్ల తేడాతో ఓడింది. టాస్‌ గెలిచిన హైదరాబాద్‌ కెప్టెన్‌ గౌహర్‌ సుల్తానా తొలుత బ్యాటింగ్‌ చేసే నిర్ణయం తీసుకుంది. స్నేహ (41 బంతుల్లో 35; 7 ఫోర్లు), మహేష్‌ కావ్య (33, 3 ఫోర్లు), స్రవంతి నాయుడు (31, 4 ఫోర్లు) రాణించడంతో.. హైదరాబాద్‌ భారీ స్కోరు చేస్తుందనిపించినా వరుస విరామాల్లో వికెట్లు కోల్పోయి 48.3 ఓవర్లలో 202 పరుగులకే పరిమితమైంది. ప్రత్యర్థి బౌలర్లలో ఎన్‌ ఎస్‌ చౌహాన్‌ (2/22), హర్లీన్‌ డియోల్‌ (2/31) ఆకట్టుకున్నారు. అనంతరం 203 పరుగుల లక్ష్యంతో బరిలోకి దిగిన హిమాచల్‌ ప్రదేశ్‌ జట్టు 49.3 ఓవర్లలో నాలుగు వికెట్లు కోల్పోయి లక్ష్యాన్ని అందుకుంది. హర్లీన్‌ డియోల్‌ (107 బంతుల్లో 79; 7 ఫోర్లు), నీనా చౌదరి (43), కెప్టెన్‌ సుష్మ (30) రాణించారు. గౌహర్‌ సుల్తానా (3/34) రాణించినా ఫలితం లేకపోయింది. ఒక విజయం, మూడు పరాజయాలతో హైదరాబాద్‌ నాలుగు పాయింట్లతో నాలుగో స్థానంలో నిలిచింది.