జోహార్‌.. ఆర్డీఆర్‌

జోహార్‌.. ఆర్డీఆర్‌

సూర్యాపేట : మాజీ మంత్రి, కాంగ్రెస్‌ పార్టీ సీనియర్‌ నేత రాంరెడ్డి దామోదర్‌రెడ్డి (ఆర్డీఆర్‌) మరణవార్త విని కాంగ్రెస్‌ పార్టీ శ్రేణులు, ఆయన అభిమానులు శోకసంద్రంలో మునిగిపోయారు. అనారోగ్యంతో చికిత్స పొందుతూ హైదరాబాద్‌లోని ఓ ప్రైవేటు ఆసుపత్రిలో ఈనెల 2వ తేదీ రాత్రి 10.10 గంటలకు దామోదర్‌రెడ్డి మృతిచెందిన విషయం విదితమే. ఆయన పార్థివదేహాన్ని శుక్రవారం సూర్యాపేటకు తీసుకొచ్చారు. ఈ సందర్భంగా ఆయన పార్థివదేహాన్ని అభిమానులు, కాంగ్రెస్‌ పార్టీ కార్యకర్తలు సందర్శించి కన్నీరుమున్నీరుగా విలపిస్తున్నారు. పెద్దపులి లాంటి దామన్నకు ఎవరూ సాటిరారని, దేవుడు తమకు అన్యాయం చేసి మా నాయకున్ని తీసుకెళ్లాడని దుఃఖించారు. జోహార్‌ దామన్న అంటూ పెద్ద ఎత్తున నినాదాలు చేశారు.

ప్రజల సందర్శనార్థం రెడ్‌హౌస్‌కు..

ముఖ్యమంత్రి రేవంత్‌రెడ్డి హైదరాబాద్‌లో నివాళులర్పించిన అనంతరం రాంరెడ్డి దామోదర్‌రెడ్డి పార్థివదేహాన్ని ప్రత్యేక అంబులెన్స్‌లో శుక్రవారం సూర్యాపేటలోని రెడ్‌హౌస్‌కు తీసుకొచ్చారు. తమ అభిమాన నాయకున్ని చూసేందుకు పార్టీ కార్యకర్తలు, అభిమానులు, మహిళలు, యువకులు వేలాది మందిగా నియోజకవర్గంలోని అన్ని గ్రామాల నుంచి వేలాది మందిగా తరలివచ్చారు. ఎస్వీ ఇంజనీరింగ్‌ కళాళాల వద్ద మధ్యాహ్నం 3గంటల నుంచే ప్రజలు వేచిచూశారు. మరికొందరు రెడ్‌హౌస్‌ వద్ద బారులుదీరారు. సాయంత్రం 5.15 గంటలకు ఎస్వీ ఇంజనీరింగ్‌ కళాశాలకు చేరుకుంది. దామోదర్‌రెడ్డి పార్థివదేహం ఉన్న ప్రత్యేక అంబులెన్స్‌ ముందుభాగంలో కుమారుడు రాంరెడ్డి సర్వోత్తమ్‌రెడ్డి కూర్చుని తన తండ్రిని చూసేందుకు వచ్చిన జనాన్ని చూస్తూ కన్నీటి పర్యంతమయ్యారు. ఎస్వీ ఇంజనీరింగ్‌ నుంచి పాతబస్టాండ్‌, పోస్టాఫీస్‌ సెంటర్‌, వాణిజ్య భవన్‌ సెంటర్‌ శంకర్‌ విలాస్‌ సెంటర్‌ మీదుగా కొత్తబస్టాండ్‌ నుంచి ర్యాలీగా పార్థివదేహాన్ని రెడ్‌హౌస్‌కు తీసుకెళ్లారు. ఇందులో వేలాది మంది అభిమానులు పాల్గొనడంతో రహదారులన్నీ జనసంద్రంగా మారాయి. శక్రవారం రాత్రి పొద్దుపోయే దాకా రెడ్‌హౌస్‌లో దామన్న పార్థివదేహాన్ని ప్రజలు , అభిమానులు పెద్ద ఎత్తున తరలివచ్చి సందర్శించి కడసారి తమ అభిమాన నాయకున్ని చూసుకుని కన్నీటి పర్యంతమయ్యారు.

రాత్రి పొద్దుపోయిన తర్వాత రాంరెడ్డి దామోదర్‌రెడ్డి పార్థివదేహాన్ని ప్రత్యేక అంబులెన్స్‌లో తుంగతుర్తికి తరలించారు. అక్కడ ప్రజల సందర్శనార్థం ఉంచిన తర్వాత శనివారం మధ్యాహ్నం 12గంటలకు ప్రభుత్వ అధికారిక లాంఛనాలతో అంత్యక్రియలు నిర్వహించనున్నారు. ఇందుకోసం ఆర్డీఆర్‌ గడీ పక్కనే పామాయిల్‌ తోటలో మహా ప్రస్థానం కోసం ఏర్పాట్లన్నీ పూర్తయ్యాయి. సూర్యాపేట ఆర్డీఓ వేణుమాధవరావు, డీఎస్పీ ప్రసన్నకుమార్‌లు అంత్యక్రియల కోసం చేపట్టిన పనులను పర్యవేక్షించారు. సూర్యాపేటలో జరిగిన ర్యాలీలో మాజీ ఎమ్మెల్యే వేదాపు వెంకయ్య, సీపీఎం నేత జూలకంటి రంగారెడ్డి పాల్గొన్నారు.

ఫ తుంగతుర్తికి చేరిన రాంరెడ్డి దామోదర్‌రెడ్డి పార్థివదేహం

ఫ అంతకుముందు సూర్యాపేటలో భారీ ర్యాలీ

ఫ రెడ్‌హౌస్‌లో మంత్రి సీతక్క, మాజీ మంత్రి జానారెడ్డి, ఎమ్మెల్యేలు జగదీశ్‌రెడ్డి, జైవీర్‌రెడ్డి, ప్రముఖుల నివాళి

ఫ కన్నీటి పర్యంతమైన పార్టీ కార్యకర్తలు, అనుచరులు, అభిమానులు

ఫ నేడు వ్యవసాయ క్షేత్రంలో అంత్యక్రియలు