తెలంగాణ పండుగ బతుకమ్మ

తెలంగాణ పండుగ బతుకమ్మ

వనపర్తి: తెలంగాణ సంస్కృతికి అద్దం పట్టే పండుగ బతుకమ్మ అని కలెక్టర్‌ ఆదర్శ్‌ సురభి, ఎస్పీ రావుల గిరిధర్‌ అన్నారు. మంగళవారం కలెక్టరేట్‌ ఆవరణలో సెర్ప్‌, మెప్మా, జిల్లా సంక్షేమ శాఖలు సంయుక్తంగా బతుకమ్మ వేడుకలు నిర్వహించాయి. ఈ వేడుకలకు కలెక్టర్‌, ఎస్పీ హాజరై తీరొక్క పూలతో తయారుచేసిన బతుకమ్మలకు ప్రత్యేక పూజలు చేశారు. మహిళలు, చిన్నారులతో కలిసి బతుకమ్మ చుట్టూ ఆడి అందరిని ఉత్సాహపర్చారు. ఈ సందర్భంగా మాట్లాడుతూ.. సంస్కృతి సాంప్రదాయాలకు నిలువెత్తు నిదర్శనమైన జిల్లాలో బతుకమ్మ సంబరాలు వాడవాడల ఘనంగా జరుగుతున్నాయన్నారు. ప్రతి ఒక్కరూ పండుగను ఆనందోత్సాహాలతో జరుపుకోవాలని పండగ శుభాకాంక్షలు తెలియజేశారు. వివిధ శాఖల ఆధ్వర్యంలో బతుకమ్మ వేడుకలు నిర్వహించగా ఉత్తమ బతుకమ్మలను ప్రదర్శించిన వారికి బహుమతులు అందజేశారు. మొదటి బహుమతి మెప్మా, రెండో బహుమతి పురపాలక, మూడో బహుమతి వ్యవసాయశాఖ, నాలుగో బహుమతి కలెక్టరేట్‌కు దక్కింది. వేడుకల్లో వివిధ శాఖల జిల్లా అధికారులు, మహిళలు, చిన్నారులు, సిబ్బంది తదితరులు పాల్గొన్నారు.