కోహ్లి రికార్డు బ్రేక్‌ చేసిన హార్దిక్‌ పాండ్యా

ఆసియా కప్‌-2025 (Asia Cup)లో భాగంగా టీమిండియా స్టార్‌ హార్దిక్‌ పాండ్యా పాకిస్తాన్‌కు ఆదిలోనే షాకిచ్చాడు. భారత బౌలింగ్‌ అటాక్‌ను ఆరంభించిన ఈ పేస్‌ ఆల్‌రౌండర్‌ తొలి బంతిని వైడ్‌గా సంధించాడు. అయితే, ఆ తర్వాత వెంటనే వికెట్‌ తీసి టీమిండియాకు శుభారంభం అ​​ందించాడు.

హార్దిక్‌ వేసిన అవుట్‌స్వింగర్‌ను తప్పుగా అంచనా వేసిన పాక్‌ ఓపెనర్‌ సయీమ్‌ ఆయుబ్‌.. బంతిని గాల్లోకి లేపగా జస్‌ప్రీత్‌ బుమ్రా క్యాచ్‌ పట్టాడు. దీంతో ఆయుబ్‌ డకౌట్‌ అయ్యాడు. ఫలితంగా పాక్‌ తొలి వికెట్‌ కోల్పోగా.. హార్దిక్‌ ఖాతాలో తొలి వికెట్‌ చేరింది.

పాండ్యా సూపర్‌ క్యాచ్‌
ఇక ఆ మరుసటి ఓవర్లో హార్దిక్‌ పాండ్యా మంచి క్యాచ్‌ అందుకున్నాడు. బుమ్రా బౌలింగ్‌లో వన్‌డౌన్‌ బ్యాటర్‌ మహ్మద్‌ హ్యారిస్‌ (3) ఇచ్చిన క్యాచ్‌ను పాండ్యా కష్టపడి పట్టాడు. బ్యాట్‌ టాప్‌ ఎడ్జ్‌ను తాకిన బంతి గాల్లోకి లేవగా లాంగ్‌ లెగ్‌లో నుంచి పరిగెత్తుకుని వచ్చి మరీ అందుకున్నాడు. ఫలితంగా పాక్‌ రెండో వికెట్‌ కోల్పోయింది.  

ఈ క్రమంలో హార్దిక్‌ పాండ్యా.. టీమిండియా దిగ్గజం విరాట్‌ కోహ్లిని అధిగమించాడు. అంతర్జాతీయ టీ20 ఫార్మాట్లో అత్యధిక క్యాచ్‌లు అందుకున్న రెండో భారత ఫీల్డర్‌గా నిలిచాడు. రోహిత్‌ శర్మ 65 క్యాచ్‌లతో అగ్రస్థానంలో ఉండగా.. హార్దిక్‌ పాండ్యా.. మహ్మద్‌ హ్యారిస్‌ క్యాచ్‌తో కలిపి 55 క్యాచ్‌లు పూర్తి చేసుకున్నాడు.  

ఇదిలా ఉంటే.. దుబాయ్‌ వేదికగా ఆసియా కప్‌-2025 టోర్నమెంట్లో భారత్‌- పాక్‌ తలపడుతున్నాయి. టాస్‌ గెలిచిన పాకిస్తాన్‌ తొలుత బ్యాటింగ్‌ ఎంచుకుంది. పది ఓవర్ల ఆట ముగిసే సరికి నాలుగు వికెట్ల నష్టానికి 49 పరుగులు చేసింది.

అంతర్జాతీయ టీ20లలో అత్యధిక క్యాచ్‌లు అందుకున్న భారత ఫీల్డర్లు
రోహిత్‌ శర్మ- 65
హార్దిక్‌ పాండ్యా- 55*
విరాట్‌ కోహ్లి- 54
సూర్యకుమార్‌ యాదవ్‌- 51*
సురేశ్‌ రైనా- 42. 

చదవండి: టీమిండియా కెప్టెన్‌గా తిల‌క్ వ‌ర్మ‌.. బీసీసీఐ ప్ర‌కట‌న‌

𝗕𝗢𝗢𝗠! 💥

India are tearing through. Pakistan lose their 2nd wicket 🔥

Watch #INDvPAK LIVE NOW on the Sony Sports Network TV channels & Sony LIV.#SonySportsNetwork #DPWorldAsiaCup2025 pic.twitter.com/xqJXwEHqnf

— Sony Sports Network (@SonySportsNetwk) September 14, 2025