ఓటీటీలో 'కంగువా' స్ట్రీమింగ్‌ అప్‌డేట్

కోలీవుడ్‌ టాప్‌ హీరో సూర్య నటించిన కంగువా సినిమా ఓటీటీలో విడుదల కానున్నట్లు తెలుస్తోంది. ఈమేరకు సోషల్‌మీడియాలో పెద్ద ఎత్తున ప్రచారం జరుగుతుంది. నవంబరు 14న ప్రపంచవ్యాప్తంగా విడుదలైన ఈ మూవీ అనుకున్నంత స్థాయిలో మెప్పించలేదు. దీంతో సూర్య కెరీర్‌లో దారుణమైన నష్టాలను ఈ చిత్ర నిర్మాతలు లైకా ప్రొడక్షన్స్‌ వారు ఎదుర్కోనున్నారు. కంగువా సినిమా ఓటీటీ రైట్స్‌ను అత్యధిక ధరకు అమెజాన్‌ దక్కించుకుంది. దీంతో  ఒక రకంగా చిత్ర నిర్మాతలను ఈ ఓటీటీ సంస్థే కాపాడినట్లు అయింది.

కంగువా ఓటీటీ రైట్స్‌ దక్కించుకున్నట్లు గతంలోనే అమెజాన్‌ ప్రైమ్‌ వీడియో ప్రకటించింది. సినిమా విడుదలైన నాలుగు వారాలకు ఈ చిత్రం ఓటీటీలో విడుదల కానుంది.  డిసెంబర్‌ 13న ఈ చిత్రం ఓటీటీలో స్ట్రీమింగ్‌ కానున్నట్లు తెలుస్తోంది. సుమారు రూ. 300 కోట్ల బడ్జెట్‌తో తెరకెక్కిన ఈ చిత్రం బాక్సాఫీస్‌ వద్ద రూ. 130 కోట్ల గ్రాస్‌ రాబట్టినట్లు సమాచారం. అయితే, అమెజాన్‌ ప్రైమ్‌ మాత్రం రూ. 100 కోట్లకు కంగువా రైట్స్‌ దక్కించుకున్నట్లు ఇండస్ట్రీలో ప్రచారం ఉంది.

కంగువా సినిమా ప్రారంభంలో 30 నిమిషాల పాటు చాలా బోరింగ్‌గా ఉందని ప్రచారం రావడంతో మూవీ నుంచి 12 నిమిషాల పాటు కొన్ని సీన్లు తొలగించారు. జ్యోతిక కూడా సినిమాపై ఇదే విమర్శ చేసింది. సూర్య,బాబీ డియోల్,దిశా పటాని నటించిన ఈ చిత్రాన్ని శివ దర్శకత్వం వహించారు.