వార్‌-2లో జూనియర్ ఎన్టీఆర్.. ఎంట్రీతోనే రికార్డ్ రెమ్యునరేషన్‌!

ఆర్‌ఆర్‌ఆర్‌ సినిమాతో టాలీవుడ్ యంగ్ టైగర్ జూనియర్‌ ఎన్టీఆర్‌ పాన్‌ ఇండియా స్టార్‌గా మారిపోయాడు. దర్శకధీరుడు రాజమౌళి తెరకెక్కించిన ఈ చిత్రంలోని నాటు నాటు పాటకు ఆస్కార్‌ దక్కడంతో యంగ్ టైగర్ గ్లోబర్‌ స్టార్‌గా గుర్తింపు పొందాడు. దీంతో ఎన్టీఆర్‌ రాబోయే చిత్రాలపై అభిమానుల్లో భారీ అంచనాలు నెలకొన్నాయి. ప్రస్తుతం ఎన్టీఆర్‌ కొరటాల శివ దర్శకత్వంలో NTR30 చిత్రం చేస్తున్న సంగతి తెలిసిందే.  ఎన్టీఆర్30 చిత్రం ద్వారా జాన్వీ కపూర్ టాలీవుడ్‌లో ఎంట్రీ ఇస్తోంది. అలాగే బాలీవుడ్‌లో మల్టీస్టారర్‌ సినిమాకు గ్రీన్‌ సిగ్నల్‌ ఇచ్చేశాడు.

బాలీవుడ్‌లో హృతిక్‌ రోషన్‌ నటిస్తోన్న వార్‌ -2లో తారక్‌ స్క్రీన్‌ షేర్‌ చేసుకోబోతున్నాడు. ఇటీవలే దీనికి సంబంధించిన అధికారిక ప్రకటన కూడా వచ్చేసింది. దీంతో ఈ సినిమాపై అటూ బి-టౌన్‌లోనూ.. ఇటూ టాలీవుడ్‌లోనూ అభిమానుల్లో ఆసక్తి నెలకొంది. ఈ క్రమంలోనే వార్‌- 2కు తారక్‌ తీసుకుంటున్న రెమ్యునరేషన్‌ హాట్‌ టాపిక్‌గా మారింది. ప్రస్తుతం ఒక్కో సినిమాకు దాదాపు రూ.40 నుంచి రూ.50 వరకు కోట్ల పారితోషికం అందుకున్న ఎన్టీఆర్‌ వార్‌- 2 కోసం ఏకంగా రూ.100 కోట్ల రెమ్యునరేషన్‌ తీసుకుంటున్నట్లు బి-టౌన్‌లో జోరుగా ప్రచారం జరుగుతోంది. అయితే దీనిపై ఇంకా ఎలాంటి అధికారిక ప్రకటన రాలేదు. కాగా.. ఆర్ఆర్ఆర్ చిత్రంలో నటించేందుకు ఎన్టీఆర్ రూ.45 కోట్ల పారితోషికం అందుకున్న సంగతి తెలిసిందే. 

ఇప్పటికే దక్షిణాదిలో పలువురు స్టార్ హీరోలు రూ.100 కోట్ల క్లబ్‌లో చేరుకున్న సంగతి తెలిసిందే. ప్రభాస్, అల్లు అర్జున్, దళపతి విజయ్, అజిత్ కుమార్ లాంటి హీరోలు ఒక్కో చిత్రానికి రూ. 100 కోట్లకు పైగానే ఫీజు వసూలు చేస్తున్నారు. తాజాగా జూనియర్ ఎన్టీఆర్ సైతం వార్- 2 మూవీతో  వంద కోట్ల క్లబ్‌లో చేరబోతున్నట్లు తెలుస్తోంది.