సింగిల్‌గా అన్న.. రెండోపెళ్లితో రెండోసారి తండ్రి కాబోతున్న తమ్ముడు

ఏ వయసులో జరగాల్సిన ముచ్చట ఆ వయసులో జరగాలంటుంటారు. కానీ ఈ జనరేషన్‌కు అది వర్తించదు. కెరీర్‌ వేటలో పడి ఆలస్యంగా పెళ్లి చేసుకుని లేటుగా సంసారసాగరాన్ని ఈదుతున్నారు. కొందరైతే మనవళ్లను ఎత్తుకోవాల్సిన వయసులో మళ్లీ పెళ్లి చేసుకుంటున్నారు. మరికొందరే పెళ్లి అనే జంఝాటమే వద్దని సింగిల్‌గా బతికేస్తున్నారు.

57 ఏళ్ల వయసులో మరోసారి తండ్రిగా..
బాలీవుడ్‌ స్టార్‌ సల్మాన్‌ ఖాన్‌ (Salman Khan) విషయంలో ఇదే జరిగింది. ఎంతోమంది హీరోయిన్లతో ప్రేమాయణం నడిపినా పెళ్లికి మాత్రం సిద్ధపడలేదీ హీరో. 59 ఏళ్లు వచ్చినా సింగిల్‌గానే బతికేస్తున్నాడు. కానీ, ఇతడి సోదరుడు, నటుడు అర్బాజ్‌ ఖాన్‌ (Arbaaz Khan) మాత్రం 57 ఏళ్ల వయసులో మరోసారి తండ్రి కాబోతున్నాడు.

పట్టలేనంత సంతోషం
అర్బాజ్‌ భార్య షురా ఖాన్‌ గర్భం దాల్చిందన్న విషయాన్ని నటుడు మీడియాకు వెల్లడించాడు. మేము బయటకు వెళ్లినప్పుడు జనాలు ఆ విషయాన్ని ఇట్టే పసిగట్టారు. దాన్ని ఎంతోకాలం దాచలేమనుకోండి. ప్రస్తుతం మేమెంతో సంతోషంగా ఉన్నాం. మా జీవితాల్లో మరింత వెలుగు నింపేందుకు వస్తున్న బిడ్డ కోసం ఆతృతగా ఎదురుచూస్తున్నాం అన్నాడు.

రెండో పెళ్లి
అర్బాజ్‌ గతంలో మలైకా అరోరాను పెళ్లి చేసుకున్నాడు. వీరికి కుమారుడు అర్హాన్‌ ఖాన్‌ సంతానం. 2017లో అర్బాజ్‌-మలైకా విడాకులు తీసుకున్నారు. 2023 చివర్లో మేకప్‌ ఆర్టిస్ట్‌ షురా ఖాన్‌ను నిఖా చేసుకున్నాడు. సినిమాల విషయానికి వస్తే.. బాలీవుడ్‌లో ఎన్నో మూవీస్‌ చేసిన అర్బాజ్‌ తెలుగులో 'జై చిరంజీవ', 'కిట్టు ఉన్నాడు జాగ్రత్త', 'శివం భజే' వంటి చిత్రాల్లో నటించాడు.

చదవండి: ప్రముఖ సింగర్‌ బర్త్‌డే పార్టీలో గంజాయి కలకలం