నరాలు తెగే ఉత్కంఠ.. చివరి బంతికి సిక్సర్‌.. కావ్యా మారన్‌ జట్టు సంచలన విజయం

పురుషుల హండ్రెడ్‌ లీగ్‌లో కావ్యా మారన్‌ జట్టు నార్త్రన్‌ సూపర్‌ ఛార్జర్స్‌ సంచలన విజయం సాధించింది. నరాలు తెగే ఉత్కంఠ నడుమ నిన్న (ఆగస్ట్‌ 13) సథరన్‌ బ్రేవ్‌తో జరిగిన మ్యాచ్‌లో చివరి బంతికి గెలుపొందింది. గెలుపుకు 5 పరుగులు కావాల్సిన తరుణంలో గ్రహం క్లార్క్‌ నమ్మశక్యం కాని రీతిలో సిక్సర్‌ బాది సూపర్‌ ఛార్జర్స్‌ను గెలిపించాడు. తైమాల్‌ మిల్స్‌ వేసిన స్లో డెలివరీని క్లార్క్‌ అద్భుతంగా ఎగ్జిక్యూట్‌ చేశాడు. 

GRAHAM CLARK, THE FINISHER IN THE HUNDRED 🥶

SUPERCHARGES NEED 5 FROM THE FINAL BALL & GRAHAM CLARK SMASHED A SIX...!!!! pic.twitter.com/BcEEs7sT4q

— Johns. (@CricCrazyJohns) August 14, 2025

ఈ సిక్సర్‌తో ప్రత్యర్థి హోం గ్రౌండ్‌ ఒక్కసారిగా మూగబోయింది. మైదానం మొత్తం నిశ్శబ్దం ఆవహించింది. ఈ ఓటమితో సథరన్‌ బ్రేవ్‌ వరుసగా విజయాలకు బ్రేక్‌ పడింది.

ఈ మ్యాచ్‌లో తొలుత బ్యాటింగ్‌ చేసిన సథరన్‌ బ్రేవ్‌.. లారీ ఇవాన్స్‌ (53), జేమ్స్‌ కోల్స్‌ (49 నాటౌట్‌) రాణించడంతో నిర్ణీత 100 బంతుల్లో 5 వికెట్ల నష్టానికి 139 పరుగులు చేసింది. సూపర్‌ ఛార్జర్స్‌ బౌలర్లలో జేకబ్‌ డఫీ 3, మిచెల్‌ సాంట్నర్‌ 2 వికెట్లు తీశారు.

అనంతరం ఓ మోస్తరు లక్ష్య ఛేదనకు దిగిన సూపర్‌ ఛార్జర్స్‌.. ఆది నుంచి క్రమం తప్పకుండా వికెట్లు కోల్పోతూ గెలుపు కష్టమన్నట్లు సాగింది. అయితే గ్రహం క్లార్క్‌ మ్యాచ్‌ స్వరూపాన్నే మార్చేశాడు. కీలక తరుణంలో 24 బంతుల్లో 3 ఫోర్లు, సిక్సర్‌ సాయంతో అజేయమైన 38 పరుగులు చేసి తన జట్టును విజయతీరాలకు చేర్చాడు. అతడికి మిచెల్‌ సాంట్నర్‌ (24) సహకరించాడు. 

అంతకుముందు జాక్‌ క్రాలే (29), హ్యారీ బ్రూక్‌ (24) ఓ మోస్తరు స్కోర్లు చేసి సూపర్‌ ఛార్జర్స్‌ను మ్యాచ్‌లో ఉంచారు. బ్రేవ్‌ బౌలర్లలో ఓవర్టన్‌ 3, జోఫ్రా ఆర్చర్‌, తైమాల్‌ మిల్స్‌ తలో 2 వికెట్లు తీశారు.