బీఆర్‌ఎస్‌ కుట్రలో భాగమే వరంగల్‌ ఆరు ముక్కలు: కడియం శ్రీహరి

సాక్షి, జనగామ: తెలంగాణలో అవినీతి, అక్రమాలకు మారుపేరు బీఆర్‌ఎస్‌ అంటూ సంచలన ఆరోపణలు చేశారు ఎమ్మెల్యే కడియం శ్రీహరి. అలాగే, వరంగల్‌ చరిత్రను కనుమరుగు చేసేందుకే జిల్లాను ఆరు ముక్కలు చేశారని చెప్పుకొచ్చారు. జిల్లాను ముక్కలు చేయవద్దు అన్నందుకే తనకు రెండోసారి మంత్రి పదవి ఇవ్వలేదని కామెంట్స్‌ చేశారు. దీంతో, ఆయన వ్యాఖ్యలు రాజకీయంగా హాట్‌ టాపిక్‌గా మారాయి.

స్టేషన్‌ ఘనపూర్‌ ఎమ్మెల్యే కడియం శ్రీహరి గురువారం మీడియాతో మాట్లాడుతూ..‘ప్రజాస్వామ్య వ్యవస్థను బీఆర్‌ఎస్‌ ప్రభుత్వమే కాలరాసింది. అవినీతి, అక్రమాలకు బీఆర్‌ఎస్‌ మారుపేరు. వరంగల్‌ చరిత్రను కనుమరుగు చేసేందుకు కేసీఆర్‌ కుట్ర పన్నారు. అందులో భాగంగానే జిల్లాను ఆరు ముక్కలు చేశారు. దీనిపై ప్రశ్నించినందుకే రెండో సారి నాకు మంత్రి పదవి ఇవ్వలేదు.

కేసీఆర్‌ కుటుంబ చేతిలో తెలంగాణ బంధీ అయ్యింది. బీఆర్‌ఎస్‌ నేతలు సిగ్గులేకుండా ఇప్పుడు పార్టీ ఫిరాయింపులపై మాట్లాడటం విడ్డూరంగా ఉంది. ఏకంగా శాసనసభ పక్షాలను కలుపుకున్న చరిత్ర బీఆర్‌ఎస్‌ పార్టీది. ఇప్పట్లో తెలంగాణలో ఉప ఎన్నికలు రావు. ఒకవేళ వచ్చినా ఎదుర్కొనేందుకు కాంగ్రెస్‌ పార్టీ సిద్ధంగా ఉంది. స్టేషన్‌ ఘనపూర్‌లో ఎన్నికలు వస్తే బీఆర్‌ఎస్‌కు డిపాజిట్‌ కూడా రాదు. కోర్టులు, ప్రజాస్వామ్యంపై మాకు గౌరవం ఉంది’ అంటూ కామెంట్స్‌ చేశారు. 

ఇది కూడా చదవండి: మూసీ పరివాహక ప్రాంతాల్లో టెన్షన్‌‌.. అక్కడ భవనం కూల్చివేత