విక్రమ్‌ సినిమాలో అడుగుపెడుతున్న క్రేజీ నటుడు

తంగలాన్‌ చిత్రాన్ని పూర్తి చేసిన సియాన్‌ విక్రమ్‌ తాజాగా తన 62వ చిత్రానికి రెడీ అవుతున్నారు. ఇందులో ఎస్‌జే సూర్య ముఖ్య పాత్రను పోషించనున్నారు. కాగా తాజాగా ప్రముఖ మలయాళ నటుడు ఈ చిత్రం ద్వారా కోలీవుడ్‌కు పరిచయం కానున్నారు. హాస్య నటుడిగా బహుళ ప్రాచుర్యం పొంది మూడుసార్లు కేరళ రాష్ట్ర ప్రభుత్వం అవార్డులను అందుకున్న సురాజ్‌ వెంజారమూడు 2016లో ఉత్తమ నటుడిగా జాతీయ అవార్డును సైతం గెలుచుకున్నారు.

ఈయన మలయాళంలో నటించిన ఆండ్రాయిడ్‌ కుంజప్పన్‌, డ్రైవింగ్‌ లైసెన్స్‌, జన గణమన, ది గ్రేట్‌ ఇండియన్‌ కిచ్చెన్‌ వంటి చిత్రాలు సంచలన విజయాన్ని సాధించాయి. కాగా తాజాగా విక్రమ్‌ కథానాయకుడిగా నటించనున్న తన 62వ చిత్రం ద్వారా సురాజ్‌ కోలీవుడ్‌కు పరిచయం కానున్నారు. ఇందులో ఈయన ముఖ్య పాత్రను పోషించనున్నట్లు చిత్ర వర్గాలు మీడియాకు విడుదల చేసిన ప్రకటనలో పేర్కొన్నారు. పలు ఓటీటీలలో ఆయన నటించిన చాలా సినిమాలు తెలుగులో డబ్‌ అయ్యాయి. దీంతో టాలీవుడ్‌లో కూడా ఆయనకు ఎనలేని గుర్తింపు దక్కింది.

ఎస్‌యూ అరుణ్‌కుమార్‌ దర్శకత్వం వహిస్తున్న ఈ చిత్రాన్ని హెచ్‌ఆర్‌ పిక్చర్స్‌ పతాకంపై రియా శిబు నిర్మిస్తున్న ఈ చిత్రం ప్రీ ప్రొడక్షన్‌ కార్యక్రమాలు ముమ్మరంగా జరుగుతున్నాయి. ఏప్రిల్‌లో ఈ క్రేజీ చిత్రం సెట్‌ పైకి వెళ్లనుంది. దీనికి సంబంధించిన మరిన్ని వివరాలు త్వరలో వెలువడే అవకాశం ఉందని భావిస్తున్నారు.