పాలీవర్కింగ్‌ గురించి విన్నారా..?

ముంబైకి చెందిన సారా ఒక టెక్‌ కంపెనీలో టాలెంటెడ్‌ మార్కెటింగ్‌ ప్రొఫెషనల్‌. యోగా ఇన్‌స్ట్రక్టర్, ఫ్రీలాన్స్‌ కాపీరైటర్‌గా కూడా పనిచేస్తోంది. ఉదయం నుంచి సాయంత్రం వరకు తన ప్రైమరీ జాబ్‌ చేసే సారా సాయంత్రం తరువాత లోకల్‌ స్టూడియోలో యోగా పాఠాలు చెబుతుంది. వీకెండ్స్‌లో ఫ్రీలాన్స్‌ రైటింగ్‌ ప్రాజెక్ట్‌లు చేస్తుంటుంది.

పాలీవర్కింగ్‌ వల్ల ఆర్థికస్థిరత్వం తోపాటు తన పాషన్‌ను కూడా కొనసాగించే వీలు కలుగుతోంది. ఒకటి కంటే ఎక్కువ ఉద్యోగాలు చేయడం...పాలీవర్కింగ్‌. కోవిడ్‌ మహమ్మారి తరువాత ఈ ధోరణి బాగా పెరిగింది. అస్థిరమైన ఉద్యోగాల కారణంగా యువ ఉద్యోగులు మునుపెన్నడూ లేనంతగా కష్టపడుతున్నారు.

‘వోల్‌ ల్యాబ్స్‌’ సర్వే ప్రకారం 46 శాతం మంది ఉద్యోగులు సెకండరీ జాబ్‌ చేస్తున్నారు. అమెరికన్‌ ఉద్యోగుల్లో అత్యధికంగా ఉన్న మిలీనియల్స్‌లో 52 శాతం మంది ఒకటి కంటే ఎక్కువ ఉద్యోగాలు చేస్తున్నారని తాజా అధ్యయనంలో వెల్లడైంది. వీరిలో 24 శాతం మంది మూడు ఉద్యోగాలు చేస్తున్నారు. 

33 శాతం మంది నాలుగు లేదా అంతకంటే ఎక్కువ పనులు చేస్తున్నారు. ఇక జెన్‌ జెడ్‌లో సగం మంది ఒకటి కంటే ఎక్కువ ఉద్యోగాలు చేస్తున్నారు. అడ్వాన్స్‌డ్‌ టెక్నాలజీ, ఫ్లెక్సిబుల్‌ వర్క్‌ పాలసీలు పాలీవర్కింగ్‌’ ట్రెండ్‌కు కారణం. ‘ఆదాయం పెంచుకోవడం మాత్రమే కాదు, అనేక రకాల నైపుణ్యాలను సొంతం చేసుకోవడానికి ఈ ట్రెండ్‌ ఉపకరిస్తుంది’ అంటుంది సారా. 

(చదవండి: ఎవరీ ధీర..మయూర? ఆశావాదం, అసామాన్య ధైర్యానికి చిరునామ..)