రుణం తీర్చుకునేందుకు పెట్టుబడులతో రండి

సాక్షి, హైదరాబాద్‌: పుట్టిన గడ్డ రుణం తీర్చుకునేందుకు పెట్టుబడులతో రావాలని ఆటా (అమెరికన్‌ తెలుగు అసో­సి­­యే­షన్‌), ఎన్నారైలకు ఉప ముఖ్యమంత్రి భట్టి విక్రమా­ర్క పిలుపునిచ్చారు. అమెరికాలోని మేరీల్యాండ్‌ స్టేట్‌ బాల్టి­మోర్‌­లో జరిగిన 19వ ఆటా మహాసభలకు ఆయన ముఖ్య అతి­థిగా హాజరయ్యారు. ఈ సందర్భంగా ప్రవాసుల­ను­ద్దేశించి ప్రసంగించారు. ప్రపంచవ్యాప్తంగా ఉన్న తెలంగాణ ప్రవా­సుల సమస్యల పరిష్కారానికి చట్టబద్ధ హోదా కలిగిన ప్రత్యే­క వ్యవస్థను ఏర్పాటు చేయాలని రాష్ట్ర ప్రభు­త్వం ఆలోచి­స్తోం­ద­న్నారు. విదేశాల్లో స్థిరపడిన తెలంగాణ వాసులు రాష్ట్ర అభివృద్ధి కోసం ప్రత్యేక చొరవ తీసుకోవాల­న్నారు.

వారు సంపాదించిన విజ్ఞానం, అనుభవాన్ని రాష్ట్రా­భివృద్ధికి విని­యో­గించాలని కోరారు. పారిశ్రామికంగా, సా­మాజికంగా చేప­ట్టే ప్రతి కార్యక్రమంలో మీ వెన్నంటి ఉంటా­మని చెప్పా­రు. తెలంగాణను 2047 నాటికి 3 ట్రిలియన్‌ డా­ల­ర్ల ఆర్థిక వ్యవస్థగా తీర్చిదిద్దేందుకు సీఎం రేవంత్‌రెడ్డి నా­యకత్వంలోని ప్రజా ప్రభుత్వం ప్రణాళికాబద్ధంగా ముందు­కెళ్తోందని చెప్పారు. పెట్టుబడులకు అనుకూల వాతావరణం కల్పిస్తూ సింగిల్‌ విండో విధానంలో అన్ని అనుమతులు అందిస్తున్నా­మని, ప్రవాసులు రాష్ట్రంలో పెట్టుబడులు పెట్టాలని పిలుపు­నిచ్చారు. దివంగత ముఖ్యమంత్రి వైఎస్‌ రాజశేఖర­రెడ్డి నిర్మించిన ఔటర్‌ రింగ్‌ రోడ్డు, అంతర్జాతీయ విమానా­శ్రయం నేడు తెలంగాణకు పెద్ద ఆస్తులుగా మారాయని గుర్తు­చేశారు.

ఇప్పుడు ఔటర్‌ రింగ్‌ రోడ్డును దాటి మిగతా జిల్లాలను కలుపుతూ రీజినల్‌ రింగ్‌ రోడ్‌ నిర్మిస్తున్నామని, వాటిని అనుసంధానం చేస్తూ కొత్తగా 36 రేడియల్‌ రోడ్లను ప్లాన్‌ చేశామని పేర్కొన్నారు. అంతేకాకుండా హైదరాబాద్, సికింద్రాబాద్, సైబరాబాద్‌లకు దీటుగా ప్రపంచస్థాయి ప్రమా­ణాలతో ఆ ప్రాంతాన్ని ఆనుకుని సరికొత్తగా ’ఫ్యూచర్‌ సిటీ’ నిర్మాణానికి శ్రీకారం చుట్టామని వివరించారు. మూసీ నది పునరుజ్జీవం వంటి ప్రతిష్టాత్మక ప్రాజెక్టులతో హైదరా­బాద్‌ రూపురేఖలు మారనున్నాయని తెలిపారు.

ప్రపంచంలో­ని ఎక్కడున్న తెలంగాణ వాసులైనా.. రాష్ట్రంలో ఉన్న త­మ కుటుంబసభ్యుల సమస్యలనైనా ప్రత్యేక వ్యవస్థ ద్వారా ప్రభుత్వ దృష్టికి తీసుకొస్తే సత్వర పరిష్కారానికి చర్యలు తీసుకుంటామని భట్టి హామీ ఇచ్చారు. అలాగే రాష్ట్రంలో ఓటర్ల జాబితా ప్రత్యేక సమగ్ర సవరణ (ఎస్‌ఐఆర్‌) కొన­సాగుతున్న నేపథ్యంలో విదేశాల్లో ఉన్న తెలంగాణ పౌరులు ఆన్‌లైన్‌ ద్వారా ఓటరుగా నమోదు చేసుకునే అవకాశం ఉందని గుర్తు చేశారు.