టీమిండియా దిగ్గజం బర్త్‌డే.. సారా టెండుల్కర్‌ పోస్ట్‌ వైరల్‌

టీమిండియా దిగ్గజ క్రికెటర్‌ సచిన్‌ టెండుల్కర్‌ (Sachin Tendulkar) పుట్టినరోజు నేడు (ఏప్రిల్‌ 24). ఈరోజు మాస్టర్‌ బ్లాస్టర్ సచిన్‌ 52వ వసంతంలో అడుగుపెడుతున్నాడు. ఈ సందర్భంగా బీసీసీఐ (BCCI) ఈ లెజెండరీ బ్యాటర్‌కు ప్రత్యేకంగా శుభాకాంక్షలు తెలిపింది.

శతక శతకాలు సాధించిన ఏకైక క్రికెటర్‌
‘‘664 అంతర్జాతీయ మ్యాచ్‌లు.. 34,357 పరుగులు.. 201 అంతర్జాతీయ వికెట్లు.. 2011 వన్డే వరల్డ్‌కప్‌ విజేత.. కల్నల్‌ సీకే నాయుడు జీవనసాఫల్య పురస్కారం అందుకున్న విజేత..

అంతర్జాతీయ క్రికెట్‌లో శతక శతకాలు సాధించిన ఏకైక క్రికెటర్‌.. దిగ్గజ, స్ఫూర్తిదాయక ఆటగాడికి పుట్టినరోజు శుభాకాంక్షలు’’ అని ఎక్స్‌ వేదికగా విషెస్‌ చెప్పింది. మాజీ క్రికెటర్లు యువరాజ్‌ సింగ్‌, హర్భజన్‌ సింగ్‌, వీరేందర్‌ సెహ్వాగ్‌, సురేశ్‌ రైనా, ఏబీ డివిలియర్స్‌ తదితరులు సచిన్‌కు పుట్టినరోజు శుభాకాంక్షలు తెలిపారు.

హ్యాపీ బర్త్‌డే బాబా
ఇక సచిన్‌ టెండుల్కర్‌ కుమార్తె సారా టెండుల్కర్‌ తండ్రి బర్త్‌డే సందర్భంగా తాను అమూల్యంగా భావించే ఫొటోలను పంచుకుంది. అంతేకాదు తన తండ్రి గొప్పదనాన్ని వివరిస్తూ.. ‘‘ఎవరికీ భయపడొద్దు.. అయితే, ప్రతి ఒక్కరిని గౌరవించాలి అని నేర్పించిన వ్యక్తికి...

ఫ్రాక్చర్‌ అయిన తన భుజంపై నన్ను మోసుకువెళ్లిన దృఢమైన సారథికి.. నా ఫొటోషూట్లను మరింత ప్రత్యేకంగా మార్చే వ్యక్తికి.. అన్నిటికంటే ముఖ్యంగా జీవితాన్ని ఆస్వాదిస్తూ నవ్వులతో ప్రయాణాన్ని కొనసాగించాలని చెప్పే వ్యక్తికి హ్యాపీ బర్త్‌డే బాబా’’ అంటూ సారా క్యాప్షన్‌ జత చేయగా.. ఆమె పోస్ట్‌ వైరల్‌గా మారింది.

కాగా 1989లో భారత్‌ తరఫున అరంగేట్రం చేసిన సచిన్‌ టెండుల్కర్‌ లిటిల్‌ మాస్టర్‌ నుంచి క్రికెట్‌ దేవుడిగా ఎదిగాడు. తన ఇరవై రెండేళ్ల కెరీర్‌లో లెక్కలు మిక్కిలి రికార్డులు సాధించిన మాస్టర్‌ బ్లాస్టర్‌.. తన కెరీర్‌లో అంతర్జాతీయ స్థాయిలో ఏకైక టీ20 ఆడాడు.

సచిన్‌ కెరీర్‌లో  టాప్‌-9 రికార్డ్స్‌ ఇవే
👉టెస్టుల్లో అత్యధిక పరుగులు సాధించిన క్రికెటర్‌- 15,921
👉వన్డేల్లో అత్యధిక పరుగులు సాధించిన క్రికెటర్‌- 18,426
👉అత్యధిక వన్డేలు ఆడిన ప్లేయర్‌- 463
👉అత్యధిక టెస్టులు ఆడిన ప్లేయర్‌- 200
👉వన్డేల్లో తొలి డబుల్‌ సెంచరీ చేసిన క్రికెటర్‌
👉అంతర్జాతీయ క్రికెట్‌లో వంద సెంచరీలు చేసిన ఏకైక క్రికెటర్‌
👉దేశవాళీ క్రికెట్‌లో ఇరానీ ట్రోఫీ, రంజీ ట్రోఫీ, దులిప్‌ ట్రోఫీ అరంగేట్రంలోనే శతక్కొట్టిన వీరుల జాబితాలో తొలి స్థానం
👉టెస్టుల్లో అత్యధిక సెంచరీలు చేసిన క్రికెటర్‌- 51
👉వరల్డ్‌కప్‌ టోర్నీలో అత్యధిక పరుగులు చేసిన క్రికెటర్‌- 2278.

చదవండి: IND Vs PAK: బీసీసీఐ కీలక నిర్ణయం