కమల్ హాసన్‌కు బుల్లితెర నటుడు బెదిరింపులు.. ఏకంగా చంపేస్తానంటూ!

కోలీవుడ్ స్టార్‌ కమల్ ‍హాసన్‌కు బెదిరింపులు వచ్చాయి. తాజాగా ఆయనకు కోలీవుడ్ బుల్లితెర నటుడు రవిచంద్రన్ కమల్‌ను బెదిరించినట్లు తెలుస్తోంది. ఇటీవల సనాతన ధర్మంపై కమల్ చేసిన వ్యాఖ్యలను వ్యతిరేకిస్తూ కమల్‌ హాసన్‌ను చంపేస్తానంటూ మాట్లాడినట్లు సమాచారం. ఈ బెదిరింపులపై మక్కల్ నీది మయ్యం పార్టీ సభ్యులు పోలీసులను ఆశ్రయించినట్లు తెలుస్తోంది. ఈ మేరకు చెన్నై పోలీస్ కమిషనర్ కార్యాలయంలో ఫిర్యాదు చేశారు. కమల్‌ హాసన్‌కు రక్షణ కల్పించాలని కోరారు.

కాగా.. ఇటీవలే రాజ్యసభ సభ్యునిగా ప్రమాణ స్వీకారం చేసిన కమల్ హాసన్.. అగరం ఫౌండేషన్‌ వేడుకకు హాజరయ్యారు. ఈ సందర్భంగా సనాతన ధర్మాన్ని అడ్డుకోవాలంటే విద్య ఒక్కటే మార్గమని మాట్లాడారు. అంతేకాకుండా వైద్య విద్య సీట్ల కోసం కేంద్రం నిర్వహిస్తోన్న నీట్‌ పరీక్షపై విమర్శలు చేశారు. దీంతో కమల్ చేసిన కామెంట్స్‌ పెద్ద ఎత్తున వివాదానికి దారితీశాయి.

అయితే ఈ మాటలు విన్న బుల్లితెర నటుడు రవిచంద్రన్‌ కమల్‌ను అమాయక రాజకీయ నాయకుడు అంటూ ఎద్దేవా చేశారు. మరోసారి ఇలాగే మాట్లాడితే కమల్ గొంతు కోస్తానని హెచ్చరించారు. కమల్ వ్యాఖ్యలను తమిళనాడు బీజేపీ సైతం ఖండించింది. దీంతో ఈ వ్యవహారం కోలీవుడ్‌లో హాట్ టాపిక్‌గా మారింది. ఇక సినిమాల విషయానికొస్తే కమల్ హాసన్ ఈ ఏడాది థగ్ లైఫ్‌తో ‍ప్రేక్షకుల ముందుకొచ్చారు. ఈ సినిమా బాక్సాఫీస్ వద్ద పెద్దగా మెప్పించలేకపోయింది.