ట్రంప్‌ సలహా సంఘంలో మాజీ ఉగ్రవాదులు

వాషింగ్టన్‌: కరడుగట్టిన అల్‌కాయిదా, లష్కరే తోయిబా ఉగ్రసంస్థలకు చెందిన మాజీ ఉగ్రవాదులకు ఏకంగా అమెరికా అధ్యక్షుని సలహా సంఘంలో చోటు దక్కింది! వారిలో ఒకరు ఉగ్రవాదం, సంబంధిత కేసుల్లో దోషిగా జైలుశిక్ష అనుభవించి విడుదలైన ఇస్మాయిల్‌ రాయర్‌ కాగా మరొకరు హమాస్, ముస్లిం బ్రదర్‌హుడ్‌లతో సంబంధాలున్న మాజీ ఉగ్రవాది షేక్‌ హమ్జా యూసుఫ్‌. 

వారిని రిలీజియస్‌ లిబర్టీ కమిషన్‌ ఆధ్వర్యంలో పనిచేసే అడ్వైజరీ బోర్డ్‌ ఆఫ్‌ లే లీడర్స్‌లో సభ్యులుగా ట్రంప్‌ సర్కారు ఎంపిక చేసింది. వారిద్దరూ అమెరికాలో ఇస్లామిక్‌ బోధనల్లో ప్రముఖులుగా మంచిపేరు తెచ్చుకున్నారని చెప్పుకొచి్చంది. కరడుగట్టిన ఉగ్ర చరిత్ర ఉన్న మాజీలను సలహా సంఘంలోకి కూర్చోబెడతారా అని విమర్శలు వెల్లువెత్తుతున్నాయి. ట్రంప్‌ రెండో హయాంలో అమెరికాలో నెలకొన్న అవ్యవస్థకు ఇది మరో నిదర్శనమంటూ పలువురు మండిపడుతున్నారు. ఈ సలహా సంఘం మతస్వేచ్ఛ, మత విశ్వాసాలకు అనుగుణంగా విధాన నిర్ణయాల్లో అధ్యక్షుడికి సలహాలిస్తుంది.

ఎవరీ ఇస్మాయిల్‌? 
ఇతను అమెరికా జాతీయుడు. అసలు పేరు ర్యాండల్‌ టోడ్‌ రాయర్‌. 1992లో ఇస్లాం స్వీకరించి ఇస్మాయిల్‌గా పేరు మార్చుకున్నాడు. లష్కరే తోయిబా, ఈజిప్‌్టలోని ముస్లిం బ్రదర్‌హుడ్, ‘వర్జీనియా జిహాద్‌ నెట్‌వర్క్‌’, పాలస్తీనాలోని హమాస్‌ ఉగ్ర సంస్థతో సత్సంబంధాలున్నాయి. ప్రత్యేక ఉగ్రశిక్షణ కోసం 2000లో పాక్‌ వెళ్లాడు. అమెరికాపై యుద్ధం కోసం పలువురికి ఉగ్ర తర్ఫీదు ఇచ్చేలా ప్రణాళికలు వేశాడు. జమ్మూ కశీ్మర్‌లో సైనిక స్థావరాలపై రాకెట్‌ ప్రొపెల్డ్‌ గ్రనేడ్‌ దాడికి సహచర ఉగ్రవాదికి శిక్షణ ఇచ్చాడు. అల్‌ఆయిదా, లష్కరేలకు సాయపడ్డ నేరానికి 2003లో ఇస్మాయిల్‌పై కేసు నమోదైంది. దోషిగా తేలడంతో 20 ఏళ్ల జైలుశిక్ష పడ్డా స్రత్పవర్తన కారణంగా 2017లో విడుదలయ్యాడు. అమెరికాలోని రిలీజియస్‌ ఫ్రీడం ఇన్‌స్టిట్యూట్‌లో డైరెక్టర్‌గా ఉన్నాడు.

ఎవరీ షేక్‌
హమ్జా యూసుఫ్‌? అమెరికాలో తొలి ముస్లిం లిబరల్‌ ఆర్ట్స్‌ కాలేజీ అయిన జేతునా కాలేజ్‌ సహవ్యవస్థాపకుడు. ఈ కాలేజీలో షరియా చట్టాలను బోధిస్తారు. యూసుఫ్‌కు ముస్లిం బ్రదర్‌హుడ్, హమాస్‌లతో లింకులున్నట్టు తేలింది. వాటితో ఇప్పటికీ సంబంధాలు కొనసాగిన్తున్నట్టు చెబుతారు. ఇతని బోధనలకు పలువురు ఉగ్రవాదులు ఆకర్షితులైనట్టు స్పష్టమైంది. అమెరికా జాత్యహంకార దేశమంటూ వ్యాఖ్యలు చేశాడు.

 1990ల నాటి శకంలో న్యూయార్క్‌ బాంబు దాడుల కేసు నిందితుడు షేక్‌ ఒమర్‌ అబ్దుల్‌ రహా్మన్‌పై దర్యాప్తులో అమెరికా ప్రభుత్వం పారదర్శకంగా వ్యవహరించడం లేదని విమర్శలు గుప్పించాడు. అమెరికా పోలీస్‌ ఉన్నతాధికారిని హత్య చేసిన జమీల్‌ అల్‌ అమీన్‌ అనే వ్యక్తికి మద్దతుగా యూసుఫ్‌ ప్రసంగించాడు. తర్వాత రెండు రోజులకే అమెరికాపై 9/11 దాడి జరిగింది. దాంతో అతన్ని ఎఫ్‌బీఐ విచారించింది. ముస్లిం దేశాల్లో అత్యంత ప్రముఖ ఇస్లామిక్‌ విద్యావేత్తగా పేరొందాడు.