‘ఖ్యాల్‌ 50 అబౌవ్‌ 50’ పోటీ, రూ.కోటి బహుమతులు

ఉద్యోగ విరమణ అనంతరం ప్రతి ఒక్కరి జీవితంలో నూతన అధ్యాయం మొదలవుతుంది. ఈ దశలో విశ్రాంతి తీసుకుంటూ, కుటుంబంతో సమయం గడుపుతూ, తమకు ఇష్టమైన పనులను ఆనందంగా కొనసాగిస్తారు. అయితే దేశంలో 50 ఏళ్లకు పైబడి ఉన్నవారిలో ఎంతో ప్రతిభవున్నప్పటికీ దానిని ప్రదర్శించడానికి సరైన వేదికలు, అవకాశాలు లేవు. ఈ  నేపథ్యంలో వయసు అనే సరిహద్దులను దాటుతూ, సీనియర్‌ సిటిజన్స్‌ ప్రతిభను వెలికితీసేలా 50 ఏళ్లు పైబడిన వారికి  కళాత్మక వేదిక అందించాలనే లక్ష్యంతో ‘ఖ్యాల్‌ 50 అబౌవ్‌ 50’ అనే వినూత్న వేదిక ప్రారంభించింది. నగరంతో పాటు దేశమంతటా ఖ్యాల్‌ కమ్యూనిటీ ఈ పోటీలు నిర్వహిస్తున్నారు. 2026 సంవత్సరానికి సంబంధించి మొదటి పోటీ హైదరాబాద్‌లోని ‘అమేయా సోషల్‌’ వేదికగా నిర్వహించారు. – సాక్షీ, సిటీ బ్యూరో 

నటినయ్యా.. కానీ సింగింగ్‌ ఇష్టం.. 
నాకు సింగింగ్‌ అంటే ఇష్టం. కానీ నటన పరంగా మంచి అవకాశాలు వచ్చాయి. గాయనిగా సరైన సమయంలో అవకాశాలు అందుకోలేదు. ఈ వేదిక గురించి ఫేస్‌బుక్‌లో తెలుసుకుని వచ్చా. నాకు నచ్చిన కళని ప్రదర్శించా. వ్యక్తిగత ఆశయాలు సాధించుకునే అద్భుత అవకాశంగా భావిస్తున్నా.  – మిర్చి మాధవి, సినీ నటి 

రూ.కోటి నగదు బహుమతులు.. 
50 ఏళ్లకు పైబడిన వారు తమ జీవితం అక్కడితో ముగిసిందని, ఇంటికే పరిమితం కాకూడదని, కలను నెరవేర్చుకునేందుకు ఈ సంస్థ ఏర్పాటైంది. హిమాన్షు జైన్, ప్రీతిష్‌ నెల్లెరి ఈ వేదికను స్థాపించారు. ఈ ఆడిషన్స్‌లో 500 మందిని ఎంపిక చేసి అందులో టాప్‌–10 విజేతలకు ప్రత్యేక బహుమతులు, మిగతా వారికి కన్సోలేషన్‌ బహుమతులు అందిస్తారు.  – ఎస్‌.రామ చంద్రన్, ఖ్యాల్‌ సౌత్‌ ఇండియా రీజినల్‌ హెడ్‌ 

ఆరోగ్య కళ.. యోగా.. 
నేను యోగా సాధకురాలిని, శిక్షకురాలిని. ఆరు పదుల వయసులో యోగా ఒక కళగా ప్రదర్శించడానికి అద్భుతమైన వేదిక లభించింది. వ్యక్తిగత ఆరోగ్య సంరక్షణ, సామాజిక పరిరక్షణ అవసరమని ఈ వేదికలో భాగస్వామ్యం అయ్యా. ఈ వయసులో ఆరోగ్య సంరక్షణ గురించి తెలియజేసేలా అవకాశాన్ని వినియోగించుకుంటున్నా.  – రాజేశ్వరి (60) యోగా నిపుణురాలు 

కళలు, క్రీడలు, వ్యాపారం, సాంకేతికత, సామాజిక అంశాలు.. ఇలా ఏ రంగానికి చెందిన వారైనా సరే, ఈ వేదికగా కొత్త సవాళ్లను స్వీకరిస్తూ, అంకితభావం, కళాత్మకతతో ఇతరులకు స్ఫూర్తినిచ్చే వారిని సత్కరిస్తుంది ఈ వేదిక. సరికొత్తగా రూపొందిన ఖ్యాల్‌ 50 అబవ్‌ 50 కాంటెస్ట్‌లో 50 ఏళ్లకు పైబడిన వారి ప్రతిభను ప్రపంచానికి చూపిస్తుంది. తమకు ఇష్టమైన రంగంలో పాల్గొనవచ్చని ఖ్యాల్‌ యాజమాన్యం చెబుతోంది. ఈ పోటీల్లో నగరం నుంచి విభిన్న రంగాలకు చెందిన సీనియర్‌ సిటీజన్స్‌ పాల్గొని పాటలు, వంటలు, నృత్యం, కథలు, చిత్రాలు వంటి కళలను ప్రదర్శించారు. ఈ ఆడిషన్స్‌లో సింగింగ్, యోగా, నటన వంటి సృజనాత్మక కళలతో ఆడిషన్స్‌లో పాల్గొన్నారు.