ఆ డబ్బులు మావే ఇచ్చేయండి

సాక్షి, విశాఖపట్నం: సార్వత్రిక ఎన్నికల నేపథ్యంలో విశాఖపట్నంలో పోలీసులు తనిఖీలు నిర్వహిస్తుండగా.. ఎలాంటి ఆధారాలు లేకుండా తరలిస్తున్న రూ.51,99,800 నగదుతోపాటు రూ.36,88,675 విలువైన 51 చెక్కులను స్వాధీనం చేసుకున్న వ్యవహారంలో పచ్చ పత్రికాధినేత రామోజీరావుకు చెందిన మార్గదర్శి చిట్‌ఫండ్స్‌ డ్రామాలకు తెర­లేపింది. ఆ నగదుతోపాటు చెక్కులు కూడా తమవే­నని చెబుతున్న మార్గదర్శి ఇందుకు సంబంధించిన ఆధారాలు చూపమంటే చూపడం లేదు. దీంతో ఈ సొమ్ము మార్గదర్శిది కాదని.. టీడీపీ నేతలు ఓట్ల కొనుగోలుకు తరలిస్తున్న నగదని అంతా చెబుతు­న్నారు. ఇప్పటికే ఈ నగదుకు సంబంధించి కేసు కూడా నమోదైంది.

అంతేకాకుండా ఈ వ్యవ­హా­రం ఆదాయ పన్ను శాఖ పరిధిలోకి వెళ్లిపోయింది. ఆధారాలు చూపించి నగదును తీసుకునే అవ­కాశం ఉన్నా ఆ పనిచేయకుండా జిల్లా ఎన్నికల యంత్రాంగం చుట్టూ మార్గదర్శి సిబ్బంది తిరగడం చర్చనీయాంశంగా మారింది.

ఐటీ అధికారులకు ఆధారాలు చూపాల్సిందే..
ఎఫ్‌ఐఆర్‌ నమోదుతో మార్గదర్శి పేరుతో జరిగిన మనీలాండరింగ్‌కు సంబంధించిన అంశం ఐటీ శాఖ చేతుల్లోకి వెళ్లింది. దీంతో పట్టుబడిన ప్రతి పై­సాకు లెక్కలతో సహా ఆధారాల్ని పోలీసులతో పా­టు ఐటీ అధికారులకు మార్గదర్శి సమర్పించాల్సి ఉంటుంది. కానీ.. ఆ సొమ్ము మార్గదర్శిది కాదని.. అందుకే ఐదు రోజులు గడుస్తున్నా లెక్కా పత్రాలు చూపించడం లేదనే అనుమానాలు వ్యక్తమవుతు­న్నా­­యి.

ఎన్నికల ఖర్చులకు తమకు అనుకూలమైన పార్టీకి చెందిన రాజకీయ నాయకులకు అందించేందుకు మార్గదర్శి పేరుతో పక్కా ప్లాన్‌ వేసినట్లు ఆరో­పణలు ఉన్నాయి. ఈ నగదు ఎక్కడి నుంచి వచ్చింది.. ఎవరికి ఇస్తున్నారో అధికారులు దర్యాప్తు చేసి రామో­జీరావు నడిపిస్తున్న మనీలాండరింగ్‌ వ్యవహా­రాన్ని నిగ్గు తేల్చాలని డిమాండ్‌ చేస్తున్నారు.

ఆధారాల్లేకుండా అధికారుల చుట్టూ..
ఈ నెల 2న విశాఖ ద్వారకానగర్‌ ప్రాంతంలో రూ.51,99,800 నగదుతో పాటు రూ.36,88,675 విలువైన 51 చెక్కులు పట్టుబడ్డాయి. వీటిని ఇద్దరు మార్గదర్శి సిబ్బంది స్కూటీపై సూట్‌కేసులో తరలి­స్తుండగా పోలీసులు స్వాధీనం చేసుకున్నారు. నగ­దు, చెక్కులకు సంబంధించి ఎలాంటి ఆధారా­లు లేకపోవడంతో వాటిని స్వాధీనం చేసుకుని ఎన్నికల అధికారులకు అప్పగించారు. నగదు తర­లింపుపై పోలీసులు ఎఫ్‌ఐఆర్‌ నమోదు చేశారు. పోలీసు­లు కేసు నమోదు చేయడంతో ఈ వ్యవహా­రం తమ పరిధిలో లేదని రెండు రోజుల క్రితం మార్గదర్శి సిబ్బందికి ఎన్నికల అధికారులు స్పష్టం చేశారు.

అయినప్పటికీ.. కలెక్టరేట్‌లోని ఎన్నికల యంత్రాంగం చుట్టూ మార్గదర్శి సిబ్బంది ప్రదక్షిణ­లు చేస్తూ.. నగదు, చెక్కులు ఇప్పించాలంటూ హడావుడి చేస్తు­న్నారు. తమ పరిధిలో లేదని చెబు­తు­న్నా వదలకపో­వడంతో ‘ఆధారాలు చూపించండి.. పోలీసులు, ఐటీ సిబ్బందికి ఇస్తాం’ అని ఎన్ని­కల యంత్రాంగం చెప్ప­డంతో.. తామేమీ ఆధారా­లు తీసుకురాలేదని అక్కడి నుంచి మార్గదర్శి సిబ్బంది పలాయనం చిత్తగించారు. అయితే శని­వారం సాయంత్రం మళ్లీ ఎన్నికల అధికారుల వద్ద­కు వచ్చి నగదు కోసం ఒత్తిడి తెచ్చారు. విధులకు ఆటంకం కలిగిస్తుండటంతో మార్గదర్శి సిబ్బందిపై ఉన్నతా­ధికారులు ఆగ్రహం వ్యక్తం చేసినట్లు తెలుస్తోంది.