‘ఈనాడు’ పైత్యం: అటకాయించడమే కాక.. ఎదురుదాడా!?

హనుమాన్‌ జంక్షన్‌ రూరల్‌: దొంగే దొంగా.. దొంగా అన్నట్లుగా ఉంది ఈనాడు పైత్యం చూ­స్తుంటే. చట్ట ప్రకారం.. నిబంధనల ప్రకారం కృష్ణాజిల్లా గన్నవరం పోలీసులు విధులు నిర్వర్తించినప్పటికీ వారి విధులకు ఆటంకం కలిగించడమే కాక వారిపై ఎదురుదాడికి ది­గ­డంపై సర్వత్రా విమర్శలు వెల్లువెత్తు­తు­న్నాయి.  ‘పడక గదిలోకి చొరబడి దౌర్జన్యం’ అంటూ ఆ పత్రిక మంగళవారం సంచికలో అచ్చేసిన తీరుపై ఆగ్రహం వ్యక్తమవుతోంది.

నిజానికి.. తెలుగు మహిళా రాష్ట్ర ప్రధాన కార్యదర్శి మూల్పూరు సాయి కల్యాణిని అరెస్టుచేయటానికి వచ్చిన గన్నవరం పోలీసు­లపై నిందితురాలి కుటుంబ సభ్యులు దురు­సుగా ప్రవర్తించి, వారి విధులకు ఆటంకం కలి­గిం­చారు. ఆమెను అరెస్టుచేసేందుకు వచ్చి­నట్లు ఎస్‌ఐ జి. రమేష్‌బాబు వారికి చెప్పారు. కానీ, ఈ సమయంలో సాయికల్యాణి కుటుంబ సభ్యులు ఎస్‌ఐతో పాటుగా వచ్చిన మహి­ళా కానిస్టేబుళ్లపై దురుసుగా వ్యవహారిస్తూ నానా దుర్భాషలాడారు.

అరెస్టుకు సహాకరించాల్సిందిగా ఎస్‌ఐ రమేష్‌బాబు పదేపదే విజ్ఞప్తి చేసినప్పటికీ పోలీసులపై ఆమె కుటుంబ సభ్యులు ఎదురుదాడికి దిగారు. దీంతో సాయికల్యాణిని అరెస్ట్‌చేసి తీసుకువెళ్లేందుకు యత్నించిన పోలీసులకు ఆమె కుటుంబ స­భ్యు­లు అడ్డుపడి ఆటంకాలు సృష్టించారు. ఇలా దాదాపు గంటసేపు అరెస్టుచేయటానికి వచ్చిన గన్నవరం పోలీసులకు చుక్కలు చూపించారు.
చదవండి: టీడీపీ కేంద్ర కార్యాలయానికి సీఐడీ.. నోటీసులు

అయినప్పటీ ఎంతో ఓర్పుతో, సంయమనంతో, బాధ్యతాయుతంగా వ్యవ­హారించిన పోలీసులు ఆమె దుస్తులు మార్చు­కుని, బ్రష్‌ చేసుకునేందుకు తగిన సమయం ఇచ్చిన తర్వాతే అరెస్టు చేసి తీసుకువెళ్లారు. కానీ, ఈ­నా­డు పత్రిక ఈ వివరాలేమీ ప్రస్తా­వించకుండా ఏకపక్షంగా పోలీసుల తీరును అభ్యంతరకర రీతిలో విమర్శించడం శోచనీ­యం. అయినా, తప్పు చేసిన వారి కోసం పోలీ­సు­­లు ఎక్కడైనా వెతుకుతారు. ఇందులో తప్పేముంది?.