దివ్యాంగులకు ఉచిత భోజనం

సాక్షిప్రతినిధి, ఖమ్మం: కలెక్టరేట్‌కు వచ్చే దివ్యాంగుల సమస్యలను తెలుసుకుని, పరిష్క­రించడమే కాక వారి ఆకలి తీర్చేలా ఖమ్మం కలెక్టర్‌ ముజమ్మిల్‌ఖాన్‌ వినూత్న నిర్ణయం తీసు­­కు­­న్నారు. పాలనలో తనకంటూ ప్రత్యేక­తను చూపుతున్న ఆయన.. ప్రజా సమస్యల పరిష్కారంలో వినూత్న పంథా అనుసరిస్తు­న్నారు. ప్రతీ సోమవారం జరిగే ప్రజావాణి­తోపాటు వివిధ పనుల కోసం జిల్లా నలు­మూ­లల నుంచి దివ్యాంగులు కలెక్టరేట్‌కు వస్తుంటారు. అయితే వీరు ఆకలితో వెళ్లొద్దనే భావ­నతో కలెక్టరేట్‌ క్యాంటీన్‌లో ఉచితంగా మధ్యా­హ్న భోజన సౌకర్యం కల్పించాలని కలెక్టర్‌ నిర్ణయించారు. ఈ పథకం ఈ నెల 5వ తేదీ నుంచి అమల్లోకి రానుంది.

కడుపు నిండా తినేలా..: ఉచిత భోజనం అంటే అన్నం, ఒక కూర కాకుండా.. పూర్తి మెనూతో అమలయ్యేలా కలెక్టర్‌ ప్రత్యేక శ్రద్ధ తీసుకుంటున్నారు. అన్నం, ఆకుకూర పప్పు, రోటిపచ్చడి, రెండు కూరలు, సాంబార్‌ లేదా రసం, పెరుగుతో దివ్యాంగులకు భోజనాన్ని సమకూరుస్తారు. కలెక్టరేట్‌లోని కార్యాలయా­లకు ఇందుకోసం కూపన్లు ఇస్తారు. ఆయా శాఖలకు 40% వైకల్యంతో ఉన్న దివ్యాంగులు వస్తే కూపన్లు అందజేయనున్నారు. ప్రతీరోజు జారీ చేసిన కూపన్ల వివరాలను రిజిస్టర్‌లో నమోదు చేసి, ఒక్కో భోజనానికి రూ. 80 చొప్పున క్యాంటీన్‌ నిర్వాహకులకు నెలకోమారు చెల్లిస్తారు. ది­వ్యాంగులకు ఉచిత భోజన సదుపాయం కల్పిస్తున్నామనే విషయాన్ని కలెక్టరేట్‌లోని ప్రవేశ మార్గాల్లో బోర్డులు ఏర్పాటు చేయించనున్నారు.

‘సదరం’నంబర్‌ ఆధారంగా..
దివ్యాంగులకు సదరం సర్టిఫికెట్‌ నంబర్‌ ఆధా­రంగా కూ­ప­న్‌ జారీ చేస్తారు. ఈ కూపన్‌తో కలెక్టరేట్‌ క్యాంటీన్‌లో ఉచితంగా భోజనం చేయొ­చ్చు. ఇందుకోసం క్యాంటీన్‌ బాధ్యు­లకు రూ.80 చొప్పున చెల్లిస్తాం. దివ్యాంగుల నుంచి వచ్చిన విజ్ఞప్తితో ఈ నిర్ణయం తీసుకున్నాం. బుధవారం నుంచి ఉచిత భోజన కార్యక్రమం ప్రారంభమవుతుంది. – ముజమ్మిల్‌ఖాన్, కలెక్టర్, ఖమ్మం