ఐసీసీ అవార్డుకు నామినేట్‌ అయిన టీమిండియా ప్లేయర్‌

టీమిండియా ఆల్‌రౌండర్‌ వాషింగ్టన్‌ సుందర్‌ ఐసీసీ ప్లేయర్‌ ఆఫ్‌ ద మంత్‌ అవార్డుకు నామినేట్‌ అయ్యాడు. జులై నెలలో అత్యుత్తమ ప్రదర్శన కనబర్చిన మరో ఇద్దరితో కలిసి సుందర్‌ ఈ అవార్డు రేసులో నిలిచాడు. సుందర్‌తో పాటు ఇంగ్లండ్‌ పేసర్‌ గస్‌ అట్కిన్సన్‌, స్కాట్లాండ్‌ బౌలర్‌ చార్లీ కాస్సెల్‌ ప్లేయర్‌ ఆఫ్‌ ద మంత్‌ అవార్డుకు నామినేట్‌ అయ్యారు. మహిళల విభాగంలో శ్రీలంక కెప్టెన్‌ చమారీ ఆటపట్టు, టీమిండియా  ప్లేయర్లు స్మృతి మంధన, షఫాలీ వర్మ ప్లేయర్‌ ఆఫ్‌ ద మంత్‌ అవార్డు రేసులో నిలిచారు. వీరందరు జులై నెలలో వివిధ ఫార్మాట్లలో అత్యుత్తమ ప్రదర్శన కనబర్చారు.

Presenting the nominees for the Men's and Women's ICC Player of the Month for July 2024.

Whom would you cast your vote for? pic.twitter.com/nAqqtwOBok

— CricTracker (@Cricketracker) August 5, 2024

గస్‌ అట్కిన్సన్‌: 26 ఏళ్ల అట్కిన్సన్‌ జులై నెలలో స్వదేశంలో విండీస్‌తో జరిగిన టెస్ట్‌ సిరీస్‌లో అరంగేట్రం చేశాడు. మూడు మ్యాచ్‌ల ఈ సిరీస్‌లో అట్కిన్సన్‌ ఏకంగా 22 వికెట్లు పడగొట్టాడు.

చార్లీ కాస్సెల్‌: 25 ఏళ్ల కాస్సెల్‌ స్కాట్లాండ్‌ తరఫున వన్డే అరంగేట్రంలో రికార్డు గణాంకాలు నమోదు చేశాడు. ఒమన్‌తో జరిగిన మ్యాచ్‌లో కాస్సెల్‌ 5.4 ఓవర్లలో 21 పరుగులిచ్చి ఏడు వికెట్లు పడగొట్టాడు. వన్డే అరంగేట్రంలో ఇవే అత్యుత్తమ గణాంకాలు.

వాషింగ్టన్‌ సుందర్‌: జులైలో జింబాబ్వేతో జరిగిన ఐదు మ్యాచ్‌ల టీ20 సిరీస్‌లో సుందర్‌ ఎనిమిది వికెట్లు తీసి ప్లేయర్‌ ఆఫ్‌ సిరీస్‌గా నిలిచాడు. ఈ సిరీస్‌ మూడో టీ20లో సుందర్‌ సూపర్‌ ఓవర్‌లో కేవలం రెండు పరుగులిచ్చి రెండు వికెట్లు పడగొట్టాడు.

చమారీ అటపట్టు: చమారీ జులైలో జరిగిన ఆసియా కప్‌లో 101.33 సగటున 204 పరుగులు చేసింది. ఈ టోర్నీ ఫైనల్లో శ్రీలంక భారత్‌పై విజయం సాధించి టైటిల్‌ ఎగరేసుకుపోయింది.

స్మృతి మంధన: మంధన జులైలో సౌతాఫ్రికాతో జరిగిన టెస్ట్‌ మ్యాచ్‌లో 149 పరుగులు చేసింది. ఆతర్వాత సౌతాఫ్రికాతోనే జరిగిన టీ20 సిరీస్‌లోనూ (47, 54 నాటౌట్‌) రాణించింది. ఆసియా కప్‌లోనూ స్మృతి రెండు అర్ద సెంచరీలతో సత్తా చాటింది.

షఫాలీ వర్మ: షఫాలీ జులై నెలలో సౌతాఫ్రికాతో జరిగిన టెస్ట్‌ మ్యాచ్‌లో డబుల్‌ సెంచరీతో చెలరేగింది. అనంతరం ఆసియా కప్‌లోనూ సత్తా చాటింది. షఫాలీ నేపాల్‌తో జరిగిన మ్యాచ్‌లో 48 బంతుల్లో 81 పరుగులు చేసింది.