హారికకు మూడో స్థానం

సెయింట్‌ లూయిస్‌ (అమెరికా): కెయిన్స్‌ కప్‌ అంతర్జాతీయ మహిళల చెస్‌ టోర్నమెంట్‌లో భారత గ్రాండ్‌మాస్టర్, హైదరాబాద్‌ క్రీడాకారిణి ద్రోణవల్లి హారిక మూడో స్థానాన్ని దక్కించుకుంది. మరోవైపు భారత నంబర్‌వన్, ఆంధ్రప్రదేశ్‌కు చెందిన స్టార్‌ గ్రాండ్‌మాస్టర్‌ కోనేరు హంపి వరుసగా మూడో ఓటమి చవిచూసి ఐదో స్థానంతో సరిపెట్టుకుంది. అలీనా కషిన్‌స్కాయ (పోలాండ్‌)తో జరిగిన చివరిదైన తొమ్మిదో రౌండ్‌ గేమ్‌ను హారిక 38 ఎత్తుల్లో ‘డ్రా’గా ముగించి 5 పాయింట్లతో మూడో స్థానాన్ని ఖరారు చేసుకుంది. గత ఏడాది కూడా మూడో స్థానంలో నిలిచిన హారిక ఈ ఏడాది టోర్నీలో కేవలం కోనేరు హంపి చేతిలో ఓడిపోయి... మిగతా ఎనిమిది గేముల్లో రెండింటిలో గెలిచి, ఆరింటిని ‘డ్రా’ చేసుకుంది. 

ఆరో రౌండ్‌ తర్వాత అగ్రస్థానంలో నిలిచిన హంపి వరుసగా మూడు గేముల్లో ఓడిపోయి 4.5 పాయింట్లతో ఐదో స్థానాన్ని పొందింది. ఏడో రౌండ్‌లో కరిసా యిప్‌ (అమెరికా) చేతిలో, ఎనిమిదో రౌండ్‌లో నినో బత్సియా‹Ùవిలి (జార్జియా) చేతిలో ఓడిన హంపి 46 ఎత్తుల్లో మరియా ముజీచుక్‌ (ఉక్రెయిన్‌) చేతిలో పరాజయం పాలైంది. హంపితోపాటు నానా జాగ్‌నిద్జె (జార్జియా), బీబీసారా అసబయేవా (కజకిస్తాన్‌), అలీషా 4.5 పాయింట్లతో ఉమ్మడిగా నాలుగో స్థానంలో నిలిచారు. 

మెరుగైన టైబ్రేక్‌ స్కోరు ఆధారంగా ర్యాంకింగ్‌ను వర్గీకరించగా... నానా జాగ్‌నిద్జె నాలుగో స్థానంలో, హంపి ఐదో స్థానంలో, బీబీసారా ఆరో స్థానంలో, అలీషా ఏడో స్థానంలో నిలిచారు. పది మంది మేటి క్రీడాకారిణుల మధ్య తొమ్మిది రౌండ్‌లపాటు ఈ టోర్నీని నిర్వహించగా... 6 పాయింట్లతో కరిసా యిప్‌ (అమెరికా) చాంపియన్‌గా అవతరించింది. 5.5 పాయింట్లతో అలైస్‌ లీ (అమెరికా) రన్నరప్‌గా నిలిచింది. విజేత కరిసా యిప్‌నకు 60 వేల డాలర్లు (రూ. 51 లక్షల 96 వేలు), రన్నరప్‌ అలైస్‌ లీకి 50 వేల డాలర్లు (రూ. 43 లక్షల 30 వేలు), మూడో స్థానంలో నిలిచిన హారికకు 40 వేల డాలర్లు (రూ. 34 లక్షల 64 వేలు) ప్రైజ్‌మనీగా లభించాయి.