నాసాకు సునీత గుడ్‌బై 

న్యూఢిల్లీ: అంతరిక్ష పరిశోధనలకే వన్నె తెచ్చిన భారత సంతతికి చెందిన అమెరికా వ్యోమగామి సునీతా విలియమ్స్‌ (60) తన పరుగు చాలించారు. అమెరికా అంతరిక్ష పరిశోధన సంస్థ (నాసా) నుంచి రిటైరయ్యారు. తద్వారా 27 ఏళ్ల ఉజ్వల కెరీర్‌కు ముగింపు పలికారు. ‘సునీ విలియమ్స్‌ గత డిసెంబర్‌ 27న మా సంస్థ నుంచి రిటైరయ్యారు’ అని నాసా మంగళవారం ఒక ప్రకటనలో పేర్కొంది. ‘‘ఆమె తన ఉజ్వల కెరీర్లో పలు రికార్డులకు మారుపేరుగా మారారు. 

మానవసహిత అంతరిక్ష యాత్రలకు వన్నె తెచ్చారు. అంతర్జాతీయ అంతరిక్ష కేంద్రానికి నాసా తలపెట్టిన మూడు మిషన్లలో కీలక భాగస్వామి అయ్యారు’’ అంటూ ప్రశంసించింది. ‘‘మానవసహిత అంతరిక్ష యాత్రలకు సునీ విలియమ్స్‌ దారిదీపంలా నిలిచారు. వాటి తీరుతెన్నులను మెరుగుపరచడంలో ఎనలేని కృషి చేశారు. తన అసమాన ప్రతిభా పాటవాలతో భావి అంతరిక్ష యాత్రలకు బాటలు పరిచారు’’ అని నాసా అడ్మినిస్ట్రేటర్‌ జరేద్‌ ఐజాక్‌మన్‌ ఒక ప్రకటనలో అభినందించారు. నాసాకు, అమెరికాకు ఆమె అందించిన సేవలకు కృతజ్ఞతలని పేర్కొన్నారు. 

నాసాలో పని చేయడాన్ని గొప్ప గౌరవంగా విలియమ్స్‌ అభివరి్ణంచారు. సంస్థతో 27 ఏళ్ల కాలం తనకెంతో అద్భుతంగా గడిచిందని చెప్పారు. సహచరుల నుంచి నిత్యం అద్భుతమైన ప్రేమ, మద్దతు లభించాయని గుర్తు చేసుకున్నారు. ‘‘నాకు అత్యంత ఇష్టమైన చోటు అంతరిక్షమే. ఈ మాట నా గురించి తెలిసిన వారందరూ చెబుతారు’’ అన్నారు. అంతరిక్ష యాత్రలు తన దృక్కోణాన్నే సమూలంగా మార్చేశాయని చెప్పారు. విలియమ్స్‌ అసాధారణ ప్రతిభావంతురాలని ఆమె నాసా సహచరులు పలువురు ఈ సందర్భంగా గుర్తు చేసుకున్నారు. తను సాధించిన ఘనతలతో ఎంతోమందికి స్ఫూర్తిగా, ఆదర్శంగా నిలిచారంటూ అభినందించారు. 

ఎన్ని రికార్డులో! 
అంతరిక్ష రంగంలో విలియమ్స్‌ సాధించిన ఘనతలు అన్నీ ఇన్నీ కావు. మొత్తం 608 రోజుల పాటు అంతరిక్షంలో గడిపారామె! అక్కడ అత్యధిక కాలం గడిపిన నాసా వ్యోమగాముల జాబితాలో రెండో స్థానంలో నిలిచారు. బోయింగ్‌ స్టార్‌లైనర్‌ తొలి అంతరిక్ష యాత్రలో భాగంగా 8 రోజుల కోసమని ఐఎస్‌ఎస్‌కు వెళ్లిన ఆమె, వ్యోమనౌకలో సాంకేతిక సమస్యల కారణంగా సహచర వ్యోమగామి బచ్‌ విల్మోర్‌తో పాటు ఏకంగా 286 రోజుల పాటు అక్కడే గడపాల్సి రావడం తెలిసిందే. ఒకే యాత్రలో ఎక్కువ రోజుల పాటు అంతరిక్షంలో గడిపిన వ్యోమగాముల జాబితాలో వారు ఆరో స్థానంలో నిలిచారు. 

విలియమ్స్‌ మొత్తం 9సార్లు స్పేస్‌వాక్‌ చేశారు. తద్వారా అత్యధిక స్పేస్‌వాక్‌లు చేసిన మహిళగా నిలిచారు. ఆ క్రమంలో 62 గంటల 6 నిమిషాల పాటు అంతరిక్షంలో నడిచారు. అంతేకాదు, అంతరిక్షంలో మారథాన్‌ చేసిన తొలి వ్యక్తి విలియమ్సేనని నాసా పేర్కొంది. విలియమ్స్‌ తండ్రి దీపక్‌ పాండ్యా గుజరాతీ కాగా తల్లి ఉర్సులిన్‌ బోనీది స్లొవేనియా. పాండా 1950ల్లోనే అమెరికాలో స్థిరపడ్డారు. విలియమ్స్‌ అమెరికాలో ఒహాయో రాష్ట్రంలోని యూక్లిడ్‌లో 1965 సెపె్టంబర్‌ 19న జన్మించారు. ఇంజనీరింగ్, మేనేజ్‌మెంట్‌లో నావల్‌ అకాడెమీ నుంచి మాస్టర్స్‌ డిగ్రీ అయ్యాక నావిక దళంలో చేరారు. 40 రకాల విమానాలు నడిపారు. 4,000 గంటలకు పైగా విమానాలను నడిపిన రికార్డుతో కెపె్టన్‌గా రిటైరయ్యారు.