సూర్యుడినే గెంటేస్తాయా? 

వాషింగ్టన్‌: సౌర కుటుంబం మొత్తానికి ఆవాసంగా ఉన్న పాలపుంత గెలాక్సీ కొన్ని లక్షల కాంతి సంవత్సరాల తర్వాత సూర్యుడిని గెంటేస్తుందని తాజా అధ్యయనంలో తేలింది. పాలపుంత గెలాక్సీ సమీపంలోనే ఆండ్రోమెడా గెలాక్సీ ఉంది. ఈ రెండింటి మధ్య ఆకర్షణ పెరుగుతుండటంతో ఒకదానితో మరోటి ఢీకొనడమో, విలీనం కావడంతో తథ్యమని దాదాపు వందేళ్ల క్రితమే ఖగోళ శాస్త్రవేత్తలు నిర్ధారించారు. అయితే ఈ సంయోగ ప్రక్రియకు మన సౌరకుటుంబానికి మధ్య ప్రత్యక్ష సంబంధాన్ని తాజాగా కనుగొన్నారు. 

ప్రణయ భీకర వేగంతో రెండు గెలాక్సీలు ఢీకొన్నప్పుడు జనించే బలాలు ఊహకందనంత శక్తివంతంగా ఉంటాయి. ఈ బలాలు ఏకంగా గెలాక్సీల్లోని నక్షత్రాలను సైతం చిన్న రాళ్లలాగా దూరంగా విసిరివేయగలవు. ఈ బలాలే మన సూర్యునికి బద్ధశత్రువుగా మారనున్నాయని తాజా అధ్యయనం పేర్కొంది. గెలాక్సీలు ఢీకొన్నప్పుడు సూర్యుడు తన కక్ష్య నుంచి దూరంగా విసిరివేయబడతాడని, దీంతో ఏకంగా గెలాక్సీ నుంచి గెంటివేతకు గురౌతాడని శాస్త్రవేత్తలు అంచనావేస్తున్నారు. సూర్యుడు తన కక్ష్యను కోల్పోయినప్పుడు భూమి వంటి గ్రహాల ఉనికే ప్రశ్నార్థకంగా మారనుంది. 

బలాల తీవ్రతకు విసురుగా దూరంగా వెళ్లే క్రమంలో సూర్యుడు తనతోపాటు తన చుట్టూ ఉండే గ్రహాలను లాగేసుకుంటూ వెళ్లితే సరేసరి. అలా జరగకపోతే గ్రహాలన్నీ చెల్లాచెదురుకావడమో, శాశ్వతంగా కక్ష్యలను కోల్పోయి అనాథలుగా మారడమో ఖాయమని అధ్యయనకారులు అంచనావేస్తున్నారు. నాసా వారి హబుల్‌ స్పేస్‌ టెలిస్కోప్, యురోపియన్‌ స్పేస్‌ ఏజెన్సీ వారి గియా స్పేస్‌ టెలిస్కోప్‌ల నుంచి సేకరించిన సమాచారాన్ని క్రోడీకరించడంతో ఈ మేరకు అంచనాకొచ్చామని వాళ్లు తెలిపారు. సంబంధిత అధ్యయన వివరాలు నేచర్‌ ఆస్ట్రోనమీ జర్నల్‌లో ప్రచురితమయ్యాయి. 

వేయి కోట్ల ఏళ్ల తర్వాత..! 
‘‘వచ్చే 10 బిలియన్‌ సంవత్సరాల తర్వాత ఈ ఢీకొనే ప్రక్రియ జరగొచ్చు. నేరుగా ఢీకొనే అవకాశాలు 50 శాతమే. సుళ్లు తిరుగుతూ సంయోగం జరగే అవకాశాలూ ఉన్నాయి. ఇలా 22 భిన్న అవకాశాలను పరిశీలించాం. పొరుగు గెలాక్సీలుగా సంచరించే అవకాశం కూడా ఉంది. ఢీకొంటే మాత్రం జరిగే విధ్వంసంలో మన సూరీడు దూరంగా వెళ్లిపోయే వీలుంది’’అని ఈ పరిశోధనలో ముఖ్య రచయిత టిల్‌ సవాలా చెప్పారు. మరో నాలుగైదు బిలియన్‌ సంవత్సరాల తర్వాత సూటిగా ఢీకొనే అవకాశాలు సైతం 2 శాతం ఉన్నాయని సవాలా వెల్లడించారు.