కోడిగుడ్ల ఆహారోత్పత్తులకు పురస్కారాలు!

హైదరాబాద్‌: ఇంటర్నేషనల్‌ ఎగ్‌ కమిషన్‌ (ఐఈసీ) తాజాగా విజన్‌ 365 ఎగ్‌ ఇన్నోవేషన్‌ అవార్డులను ప్రవేశపెడుతున్నట్లు ప్రకటించింది. కోడిగుడ్లతో చేసిన వినూత్న ఆహారోత్పత్తులకు గాను ఈ అవార్డును అందించనున్నట్లు విజన్‌ 365 చైర్మన్‌ సురేష్‌ చిట్టూరి తెలిపారు. ఈ కొత్త అంతర్జాతీయ పురస్కారానికి ఎంట్రీలను ఆహ్వానిస్తున్నట్లు వివరించారు.

నూతన ఉత్పత్తులకు ప్రచారం కల్పించుకునేందుకు, వ్యాపారాన్ని పెంపొందించుకునేందుకు సంస్థలకు ఇది మంచి అవకాశం కాగలదని ఆయన పేర్కొన్నారు. దీనికి ఆగస్టు 11లోగా కంపెనీలు తమ ఉత్పత్తుల వివరాలను షేర్‌ చేయాల్సి ఉంటుంది. ఈ ఏడాది సెప్టెంబర్‌ 24–28 మధ్య జరిగే ఐఈసీ గ్లోబల్‌ లీడర్‌షిప్‌ సదస్సులో అవార్డును ప్రదానం చేస్తారు.