జనాభా ఆధారంగా పంచాయతీల వర్గీకరణ

సాక్షి, అమరావతి: రాష్ట్రంలోని గ్రామ పంచాయతీలను జనాభా ప్రాతిపదికన గ్రేడ్ల వారీగా వర్గీకరించంలో భాగంగా పంచాయతీరాజ్‌ శాఖ కమిషనర్‌ వీఆర్‌ కృష్ణతేజ మైలవరపు శుక్రవారం పంచాయతీ కార్యదర్శుల ఉద్యోగ సంఘాల నాయకులతో భేటీ కాబోతున్నారు. ప్రస్తుతం వార్షిక రాబడి ప్రకారం పంచాయతీలు 5 రకాలుగా ఉన్నా­యి. కానీ వార్షిక రాబడితో పాటు జనాభా సంఖ్య ఆధారంగా పంచాయతీలను వర్గీకరించేందుకు ప్రభుత్వం జనవరిలో అధికారుల కమిటీని ఏర్పా­టు చేసింది. ఆ కమిటీ పలు ప్రతిపాదనలు చేసింది. పది వేలకు పైగా జనాభా లేదంటే ఏడాదికి రూ.కోటికి పైగా వార్షికాదాయం ఉండే వాటిని స్పెషల్‌ గ్రేడ్‌ పంచాయతీలుగా ప్రతిపాదించింది.

జనాభా, రాబడి ఆధారంగా గ్రేడ్‌–1,2,3 పంచా­య­తీలుగా వర్గీకరించాలని సిఫార్సులు చేసింది. రాష్ట్రవ్యాప్తంగా 13,326 గ్రామ పంచాయతీలు ఉన్నాయి. అందులో 350 స్పెషల్‌ పంచాయతీలు­గా గుర్తించాలని నిర్ణయించింది. మరో 2,400 గ్రేడ్‌–1 కేటగిరిలో, 4,200 గ్రేడ్‌–2లో, మిగిలిన వాటిని గ్రేడ్‌–3 కేటగిరిలో కొనసాగించాలని కమిటీ ప్రతిపాదించింది. ప్రస్తుతమున్న 5 రకాల గ్రేడ్‌ పం­చాయతీలకు.. 5 రకాల గ్రేడ్‌ల పంచాయతీ కా­ర్యదర్శులున్నారు. వారిని ప్రస్తుత ప్రతిపాదనలకు అనుగుణంగా మార్చేందుకు శుక్రవారం జరిగే సమావేశంలో అభిప్రాయాలు సేకరించనున్నారు. 

పంచాయతీ కార్యదర్శుల విభజన ఇలా..
» ప్రసుత్తం గ్రేడ్‌–1, గ్రేడ్‌–2, గ్రేడ్‌–3, గ్రేడ్‌–4, గ్రేడ్‌–5 పంచాయతీ కార్యదర్శులు ఉన్నారు.
» కొత్తగా ఏర్పాటు చేసే స్పెషల్‌ గ్రేడ్‌ పంచాయతీ­లకు ప్రస్తుత గ్రేడ్‌–1 పంచాయతీ కార్యదర్శుల నుంచి సీనియారిటీ ప్రాతిపదికన పదో­న్న­తులు కల్పించాలని పంచాయతీరాజ్‌ శాఖ అధికారులు భావిస్తున్నారు. లేదంటే డిప్యూటీ ఎంపీడీవోలను స్పెష­ల్‌ గ్రేడ్‌ పంచాయతీలకు నియమించే ఆలోచన చేస్తున్నారు. 
»  గ్రేడ్‌–1 కార్యదర్శులను కొత్తగా ఏర్పాటయ్యే గ్రేడ్‌–1 కేటగిరిలో కొనసాగించాలని భావిస్తున్నారు.
» జోనల్‌ కేడర్‌లో ఉన్న గ్రేడ్‌–2, జిల్లా కేడర్‌లో ఉన్న గ్రేడ్‌–3 కార్యదర్శులను కొత్త జోనల్‌ కేడర్‌లోని గ్రేడ్‌–2 కార్యదర్శులుగా.. జిల్లా కేడర్‌గా ఉ­న్న గ్రేడ్‌–4, గ్రేడ్‌–5 కార్యదర్శులను కొత్త  జిల్లా కేటగిరిలోని గ్రేడ్‌–3 కార్యదర్శులుగా కొనసాగించేందుకు కసరత్తు చేస్తున్నారు.