లేనిపోని పుకార్లు పుట్టించొద్దు

 ఇటీవల కరీనాకపూర్ ఓ ప్రైవేటు ఫంక్షన్‌కి హాజరయ్యారు. ఆమె ధరించిన వస్త్రాల వల్లనో, లేక తిన్న ఫుడ్ కారణంగానో తెలీదు కానీ... ఆమె పొట్ట కాస్త ఎత్తుగా కనిపించిందట. దాన్ని చీర కుచ్చిళ్లలో దాచేయాలని కరీనా ప్రయత్నం చేశారట. ఇంకేముంది బెబో ప్రెగ్నెన్సీపై అక్కడ గుసగుసలు మొదలయ్యాయి. ఈ విషయం మీడియాకు ఎలా పొక్కిందో కానీ... ‘కరీనా గర్భవతా?’ అంటూ కథనాలు మొదలయ్యాయి. గతంలో ‘ఆమిర్‌ఖాన్ రెండో పెళ్లి చేసుకున్నారు. ఇటీవలే హృతిక్ కూడా తన భార్య నుంచి విడాకులు తీసుకున్నారు. కలహాల మధ్య బాలీవుడ్ కపుల్స్ జీవితాలు సాగుతుంటే... కరీనా, సైఫ్‌అలీఖాన్ జంట మాత్రం ఎంతో అన్యోన్యంగా జీవితం సాగిస్తోంది. తన భర్త పేరును తన పేరులో కలుపుకొని ‘సైఫీనా’గా పిలిపించుకుంటున్నారు కరీనా. త్వరలో సైఫీనా తల్లి కాబోతున్నారు’ అని వివిధ చానల్స్‌లో ఆసక్తికర కథనాలు ప్రసారమయ్యాయి. దీంతో ఖంగు తినడం బెబో వంతైంది. అందుకే ప్రత్యేకంగా ఈ విషయం కోసమే మీడియా సమావేశం ఏర్పాటు చేశారు కరీనా.
 
  ‘‘ప్రస్తుతం నా చేతిలో ప్రతిష్టాత్మకమైన ప్రాజెక్టులు ఉన్నాయి. కొన్ని వ్యాపార ప్రకటనల్లో కూడా నటిస్తున్నాను. ఇలాంటి సమయంలో ఈ రూమర్లు నా నిర్మాతల్ని భయాందోళనలకు గురి చేసే ప్రమాదం ఉంది. అందుకే వివరణ ఇస్తున్నా. నేను గర్భవతిని కాను. ఇప్పుడే తల్లిని కావాలని నాకు లేదు. ఆల్రెడీ సైఫ్‌కి ఇద్దరు పిల్లలు ఉన్నారు. వారు నా పిల్లలే. వారి నుంచే తల్లిప్రేమను పొందుతున్నాను. దయచేసి ఇలాంటి లేనిపోని పుకార్లను పుట్టించొద్దు’’ అని మీడియాను బతిమాలారు కరీనా.