నరసరావుపేట: సార్వత్రిక ఎన్నికల్లో పోటీలో ఉన్న అభ్యర్థులు అధికారులకు సహకరించాలని, జిల్లాలో ఎటువంటి అవాంఛనీయ ఘటనలు జరగకుండా చర్యలు తీసుకోవాలని జిల్లా ఎన్నికల అధికారి శ్రీకేష్‌ బి.లత్కర్‌ విజ్ఞప్తి చేశారు. సంయమనం పాటించాలని అభ్యర్థులు తమ కార్యకర్తలకు సూచించాలని కోరారు. బుధవారం కలెక్టరేట్‌లోని ఎస్‌ఆర్‌ శంకరన్‌ వీడియో కాన్ఫరెన్స్‌ హాలులో ఎన్నికల కౌంటింగ్‌ ప్రక్రియపై రాజకీయ పార్టీల ప్రతినిధులతో సమీక్ష నిర్వహించారు. జిల్లాలో గుర్తింపు పొందిన ప్రధాన పార్టీలు ఏజెంట్ల నియామకానికి ఫామ్‌–18 రెండు సెట్లను అందించాలని సూచించారు. ఒక సెట్‌ను పోలీస్‌ విభాగానికి పంపించి పూర్వాపరాలను తనిఖీ చేయిస్తామని వెల్లడించారు. ఎటువంటి కేసులూ లేని వారిని మాత్రమే ఏజెంట్లుగా అనుమతిస్తామని స్పష్టం చేశారు. జేఎన్టీయూ కౌంటింగ్‌ కేంద్రం చుట్టూ మూడంచెల భద్రతను ఏర్పాటు చేశామని, 100 మీటర్లలోపు ఎవరి వాహనాలకూ అనుమతి లేదని వివరించారు. గుర్తింపు కార్డులు ఉంటేనే లోపలకు అనుమతి ఉంటుందని వెల్లడించారు. జేఎన్టీయూ మెయిన్‌ గేటు వద్ద పెద్ద స్క్రీన్లు ఏర్పాటు చేసి, అన్ని స్ట్రాంగ్‌రూమ్‌ల నుంచి సీసీ కెమెరాల ద్వారా అనుసంధానించామని వివరించారు. పోస్టల్‌ బ్యాలెట్లన్నింటినీ జూన్‌ 3న కట్టుదిట్ట భద్రత నడుమ కౌంటింగ్‌ సెంటర్‌కు తరలిస్తామని వివరించారు. రెండురోజుల్లో కౌంటింగ్‌ సిబ్బందికి శిక్షణ ఇస్తామన్నారు. కౌంటింగ్‌ కేంద్రంలో ఏర్పాటు చేసిన వసతుల గురించి వివరించారు. ముందు పోస్టల్‌ బ్యాలెట్లు లెక్కించిన తర్వాత ఈవీఎంలలో ఓట్లు లెక్కిస్తారని వెల్లడించారు. ప్రతి అసెంబ్లీ నియోజకవర్గానికి, పార్లమెంట్‌ నియోజకవర్గానికి 14 టేబుళ్ల చొప్పున ఏర్పాటు చేశామని చెప్పారు. పోస్టల్‌ బ్యాలెట్ల కౌంటింగ్‌కు అసెంబ్లీ నియోజకవర్గానికి రెండు చొప్పున, మాచర్ల, సత్తెనపల్లి నియోజకవర్గాలకు మూడు చొప్పున టేబుళ్లు ఏర్పాటు చేశామని పేర్కొన్నారు. పార్లమెంట్‌ నియోజకవర్గ పోస్టల్‌ బ్యాలెట్‌ కౌంటింగ్‌కు 18 టేబుళ్లను ఏర్పాటు చేశామని కలెక్టర్‌ వెల్లడించారు. కార్యక్రమంలో జిల్లా రెవెన్యూ అధికారి కె.వినాయకం, రాజకీయ పార్టీల ప్రతినిధులు పాల్గొన్నారు. ఎక్కడా అవాంఛనీయ ఘటనలకు ఆస్కారమివ్వద్దు ఏ కేసులూ లేనివారికే కౌంటింగ్‌ ఏజెంట్లుగా అనుమతి పోస్టల్‌ బ్యాలెట్ల తర్వాతనే ఈవీఎంల ఓట్లు లెక్కింపు రాజకీయ పార్టీల ప్రతినిధులతో కలెక్టర్‌ శ్రీకేశ్‌ బి.లత్కర్‌

చిలకలూరిపేట: కళానిలయం 39వ జాతీయస్థాయి నవరస శాసీ్త్రయ, జానపద, సంగీత నాట్య కళారూపాల పోటీలు బుధవారం రెండోరోజు వైభవంగా సాగాయి. పోటీలకు వేదికై న పట్టణంలోని శ్రీవెంకటేశ్వరస్వామి ఆర్యవైశ్య కల్యాణ మండపంలో భరతనాట్యం, కూచిపూడి పోటీలు అట్టహాసంగా సాగాయి. చంద్ర, సూర్య విభాగాలలో కళాకారిణులు సత్తాచాటారు. కళాప్రియులకు సంగీత సిరిమువ్వల మాధుర్యాన్ని పంచారు. వివిధ ప్రాంతాల నుంచి వచ్చిన కళాకారులు కాళ్లకు గజ్జెలు కట్టి, చక్కటి హావభావాలతో పోటాపోటీగా ప్రతిభ చూపారు. కీర్తన, మూషికవాహన, గణపతికౌతం, వినాయకకౌతం, ముద్దుగారే యశోద, బాలగోపాల తరంగం, బ్రహ్మాంజలి, దశావతారశబ్దం, జనుతశబ్దం, కొండలలో నెలకొన్న, భామాకలాపం, నరసింహవైభవం, హిమగిరి తనయ, అలవేల్‌ మంగ వంటి పాటలకు లయబద్ధంగా నర్తించారు. ప్రేక్షకులను రంజింపచేశారు. కరతాళధ్వనులు అందుకున్నారు. ఓ వైపు పోటీలు కొనసాగిస్తూనే మరోవైపు నాట్యాచార్యులను సన్మానించారు. ముందుగా కళానిలయం నిర్వాహకుడు ప్రగడ రాజమోహనరావు సతీమణి ప్రగడ శివసత్యనారాయణమ్మ జ్యోతి ప్రజ్వలన చేసి పూజ నిర్వహించారు. నేటికార్యక్రమాలు కళానిలయం 39వ జాతీయస్థాయి నవరస శాసీ్త్రయ, జానపద, సంగీత నాట్య కళారూపాల పోటీలలో భాగంగా గురువారం చంద్ర, సూర్య విభాగాల్లో జానపద నృత్య పోటీలతోపాటు శాసీ్త్రయ జంటనాట్యాలు, శాసీ్త్రయ బృంద నాట్యాలు, శాసీ్త్రయం కాని బృంద నాట్యాలు, శాసీ్త్రయ నృత్య నాటికల పోటీలు నిర్వహిస్తారు. వీటితోపాటు నాట్యాచార్యులకు సన్మాన కార్యక్రమాలు ఉంటాయి. రెండోరోజూ వైభవంగా సంగీత నాట్య పోటీలు ప్రతిభతో అబ్బుర పరిచిన కళాకారిణులు

సత్తెనపల్లి: జిల్లాలో దివ్యాంగులను బడిబాట పట్టించే దిశగా చర్యలు ప్రారంభమయ్యాయి. చదువులకు దూరంగా ఉన్న ప్రత్యేక అవసరాలు గల పిల్లలను గుర్తించేందుకు అధికారులు ఇంటింటి సర్వే నిర్వహిస్తున్నారు. ఇప్పటి వరకు పాఠశాలల్లో చేరని వారితోపాటు మధ్యలో విద్యకు దూరమైన వారి వివరాలను సేకరిస్తున్నారు. చదువు వల్ల ప్రయోజనాలు, దివ్యాంగుల సంక్షేమానికి అమలవుతున్న రాయితీలు, సదుపాయాల గురించి పిల్లల తల్లిదండ్రులకు వివరిస్తున్నారు. ఈ సర్వేతో ఇప్పటికే కొందరు బడుల్లో చేరేందుకు ముందుకు వచ్చారని చెబుతున్నారు. విస్తృతంగా గడప గడపకు సర్వే సాధారణ విద్యార్థులతో సమానంగా దివ్యాంగులను తీర్చిదిద్దేందుకు ప్రభుత్వాలు రూ.కోట్లతో అనేక కార్యక్రమాలు చేపడుతున్నాయి. వీటిపై అవగాహన లేక ఇప్పటికీ అనేక మంది తల్లిదండ్రులు ప్రయోజనాలు పొందలేకపోతున్నారు. దీని వల్ల ఆ పిల్లల్లో వైకల్యానికి తోడు విద్యాబుద్ధులు లోపించి ఇళ్లలోనే మగ్గిపోతున్నారు. ఇప్పుడు ఇలాంటి వారందరినీ భవిత కేంద్రాల్లో చేర్పించేందుకు గడప గడపకు సర్వేను సహిత విద్య అధికారులు చేపట్టారు. ఈనెల ఒకటో తేదీ నుంచి ఇది ప్రారంభమైంది. ప్రస్తుతం వేసవి సెలవుల సమయాన్ని దీని నిమిత్తం వినియోగిస్తున్నారు. పాఠశాలలు తెరిచే నాటికి గుర్తించి అందరినీ భవిత కేంద్రాల్లో చేర్చడానికి వీలుగా కార్యాచరణను సిద్ధం చేశారు. పాఠశాలలకు అనుసంధానం ఇప్పటికే భవిత కేంద్రాల ద్వారా ప్రత్యేక అవసరాల గల పిల్లల్లో మానసిక, శారీరక ఎదుగుదల తీసుకొచ్చేందుకు ప్రభుత్వం ఎంత గానో కృషి చేస్తోంది. ఈ కేంద్రాల్లో వారికి విద్యాబుద్ధులూ నేర్పింది. గత ఏడాది నుంచి భవిత కేంద్రాల సమీప పాఠశాలల్లో ప్రత్యేక అవసరాలు గల పిల్లల విద్య అభ్యసనకు శ్రీకారం చుట్టింది. శారీరక, మానసిక వైకల్యం బారిన పడిన పిల్లలకు తమను ప్రత్యేకంగా విభజించారనే భావన కలగకుండా ప్రభుత్వం ఈ నిర్ణయం తీసుకుంది. ప్రాథమిక పాఠశాలల సమీప భవిత కేంద్రాలను వాటితో అనుసంధానించింది. సాధారణ పిల్లలతో కలిసి వీరు విద్యా బుద్ధులు నేర్చుకోవడం ద్వారా వారిలో ఆలోచనలు వృద్ధి చెందుతాయన్నది సర్కారు భావన. దీనికోసం మండలానికి ఒక పాఠశాలను ఎంపిక చేసి భవిత కేంద్రాల బాలలను ఆయా పాఠశాలల్లో విలీనం చేశారు. అక్కడ ఐఈఆర్‌పీలతో పిల్లలకు విద్య బోధిస్తారు. మధ్యాహ్న భోజనం, విద్యా కానుక కిట్లు, విద్యా దీవెన వంటి సౌక ర్యాలు కల్పిస్తారు. ఫిజియోథెరపీవ్యాయామం, స్పీచ్‌ థెరపీ, యోగా అంశాల్లో శిక్షణనిస్తారు. చేరితే బహుళ ప్రయోజనాలుపల్నాడు జిల్లాలో ఇలా.. జిల్లాలో గడప గడపకు భవితా కేంద్రాల ఐఈఆర్‌పీలు ఈనెల ఒకటిన ప్రారంభమైన సర్వే జూన్‌ 9వరకు కొనసాగింపు కొత్తగా 75 మంది ప్రత్యేక అవసరాల పిల్లలు గుర్తింపు వారి ఆరోగ్యం, విద్యపై సర్కారు ప్రత్యేక శ్రద్ధ సమగ్ర శిక్ష ద్వారా ప్రభుత్వ ప్రయోజనాలు అందించడానికి కృషి ప్రత్యేక అవసరాల పిల్లలను గుర్తిస్తున్నాం జిల్లాలో ప్రత్యేక అవసరాల పిల్లలను గుర్తించడంలో ఐఈఆర్‌పీలు నిమగ్నమయ్యారు. ఇప్పటి వరకు కొత్తగా 75 మందిని గుర్తించాం. దివ్యాంగులు బడిబాట పట్టేలా సర్వే ముమ్మరం చేశాం. చిన్నారులకు ప్రత్యేక శిక్షణ ఇస్తూనే సాధారణ విద్య బోధిస్తారు. వైకల్యం కలిగిన పిల్లల్లో సామర్థ్యాన్ని పెంచేందుకు సహిత విద్య తోడ్పడుతుంది. వైకల్యానికి అనుగుణంగా పరికరాలు ఉపయోగించి వారికి లైఫ్‌ స్కిల్స్‌ నేర్పించడం ద్వారా తోటి విద్యార్థులతో కలిసి చదువుకునేలా కృషి చేస్తున్నాం. ప్రత్యేక అవసరాల పిల్లలను చైతన్యపరిచి భవిత కేంద్రాలకు రప్పించి అక్కడ విద్యాబుద్ధులు నేర్పించడమే లక్ష్యం. – కె.శ్రీనివాసరావు, ఇన్‌క్లూజివ్‌ ఎడ్యుకేషన్‌ జిల్లా కో–ఆర్డినేటర్‌, పల్నాడు ప్రత్యేక అవసరాలు గల పిల్లలు భవిత కేంద్రాల్లో చేరితే బహుళ ప్రయోజనాలు అందించనున్నట్లు అధికారులు చెబుతున్నారు. చదువుకునే దివ్యాంగులకు ఉచితంగా అవసరమైన అన్ని ఉపకరణాలూ మంజూరవుతాయి. పాఠశాలల్లో చేరే వారికి ప్రతి నెలా రూ.300 చొప్పున రవాణా భత్యాన్ని చెల్లిస్తారు. వినికిడి, దృష్టిలోపం ఉన్నవారికి ఉచితంగా ట్యాబ్‌లు అందజేస్తారు. 9వ తరగతి విద్యార్థులు నేషనల్‌ మీన్స్‌ మెరిట్‌ కం స్కాలర్‌షిప్‌ పరీక్షలో ఎంపికైతే ఏడాదికి రూ.12 వేలు చొప్పున వరుసగా నాలుగేళ్లు అందిస్తారు. బాగా రాణించేవారికి ఉన్నత విద్య, ఉపాధికి అవకాశాలు ఉన్నాయి. వైకల్య శాతం అధికంగా ఉన్నవారికి సదరం ధ్రువ పత్రంతో పింఛన్‌ లభిస్తుంది. బస్సులు, రైలులో ప్రయాణానికి పాస్‌ సదుపాయం వర్తిస్తుంది. పాఠశాలకు రాలేని వారి ఇళ్ళకే ఉపాధ్యాయులు వచ్చి అవసరమైన బోధనతో ప్రత్యేక శిక్షణ ఇస్తారు. ఇలాంటి వారికి పాఠశాలలకు వచ్చినట్లే హాజరు నమోదు అవుతుంది.

గుంటూరు ఎడ్యుకేషన్‌: గుంటూరులోని ఉద్యోగుల భవిష్యనిధి (ఈపీఎఫ్‌) ప్రాంతీయ కార్యాలయ ఆధ్వర్యంలో ఈనెల 27న నిధి ఆప్‌కే నికత్‌ కార్యక్రమాన్ని నిర్వహిస్తున్నట్లు ప్రాంతీయ పీఎఫ్‌ కమిషనర్‌ ఇంద్రనీల్‌ ఘోష్‌ బుధవారం ఓప్రకటనలో తెలిపారు. గుంటూరు, కృష్ణా, ఎన్టీఆర్‌, పల్నాడు, బాపట్ల, ప్రకాశం జిల్లాల్లో ఉదయం 9.30 గంటల నుంచి నిర్వహించనున్నట్టు వెల్లడించారు. గుంటూరు కృష్ణనగర్‌లోని ఈఎస్‌ఐ ఆస్పత్రి, కృష్ణాజిల్లా నందివాడ మండలం తమిరిసలోని ఉమా స్పింటెక్స్‌ ప్రైవేటు లిమిటెడ్‌, ఒంగోలులోని ఈఎస్‌ఈసీ బ్రాంచ్‌, విజయవాడ గాంధీనగర్‌లోని ఈఎస్‌ఈసీ బ్రాంచ్‌ కార్యాలయం, బాపట్ల జిల్లా కారంచేడులోని శ్రీసాయి ఎడ్యుకేషనల్‌ సొసైటీ, పల్నాడు జిల్లా నాదెండ్ల మండలం తిమ్మాపురంలోని వసంత ఇండస్ట్రీస్‌లో కార్యక్రమాలు జరగనున్నాయని వివరించారు.

గుంటూరు ఎడ్యుకేషన్‌: ఏపీ ఓపెన్‌ స్కూల్‌ సొసైటీ ఆధ్వర్యంలో దూరవిద్య టెన్త్‌, ఇంటర్‌ సప్లిమెంటరీ పరీక్షలు జూన్‌ ఒకటి నుంచి 8వ తేదీ వరకు జరగనున్నట్లు జిల్లా విద్యాశాఖాధికారి పి.శైలజ బుధవారం ఓ ప్రకటనలో తెలిపారు. అభ్యర్థుల హాల్‌టికెట్లు జిల్లాలోని ఏఐ సమన్వయకర్తలతోపాటు ఏపీఓపెన్‌స్కూల్‌.ఏపీ.జీవోవీ.ఇన్‌ సైట్‌ నుంచి నేరుగా డౌన్‌లోడ్‌ చేసుకోవచ్చునని తెలిపారు. పరీక్షలు మధ్యాహ్నం 2.30 గంటల నుంచి సాయంత్రం 5.30 గంటల వరకు జరుగుతాయని పేర్కొన్నారు. పరీక్షలకు పూర్తిస్థాయిలో ఏర్పాట్లు చేయడంతోపాటు ప్రశాంత వాతావరణంలో జరిగే విధంగా ఏఐ సమన్వయకర్తలు చర్యలు చేపట్టాలని డీఈవో పి.శైలజ, ప్రభుత్వ పరీక్షల విభాగ సహాయ కమిషనర్‌ కె.వెంకటరెడ్డి ఆదేశించారు. నర్సింగ్‌ స్కూల్‌ ప్రిన్సిపాల్‌కు చార్జిమెమో గుంటూరు మెడికల్‌: గుంటూరు జీజీహెచ్‌ ప్రభుత్వ నర్సింగ్‌ స్కూల్‌ ప్రిన్సిపాల్‌ పి.లక్ష్మీరాధికకు చార్జి మెమో ఇస్తూ డైరెక్టర్‌ ఆఫ్‌ మెడికల్‌ ఎడ్యుకేషన్‌ డాక్టర్‌ నరసింహం బుధవారం ఉత్తర్వులు జారీ చేశారు. నిబంధనలకు విరుద్ధంగా నర్సింగ్‌ విద్యార్థుల నుంచి యూనిఫామ్‌, పుస్తకాల కోసం రూ.8వేలు వసూలు చేసినట్లు ఆమైపె ఫిర్యాదులు వచ్చాయి. ఈ నేపథ్యంలో ఏపీ ప్రభుత్వ ఉద్యోగుల సర్వీస్‌ రూల్స్‌కు విరుద్ధంగా ఆమె పనిచేయడంతో చార్జి మెమో ఇస్తున్నట్లు ఉత్తర్వుల్లో పేర్కొన్నారు. కాగా నర్సింగ్‌ పాఠశాలలో ప్రిన్సిపాల్‌ తీరుపై గతంలో పలు మార్లు విద్యార్థులు ఫిర్యాదులు చేశారు. నర్సింగ్‌ కాలేజీలోనూ ఇదే తీరు గోరంట్లలోని ప్రభుత్వ బీఎస్సీ నర్సింగ్‌ కాలేజీలో కూడా విద్యార్థుల వద్ద నుంచి పుస్తకాలు, యూనిఫామ్‌ నిమిత్తం రూ. 9వేల వరకు వసూలు చేసినట్లు విద్యార్థులు చెబుతున్నారు. కళాశాలలో ఫ్రెషర్స్‌డే, ఫేర్‌వెల్‌ డే, ఇతర కార్యక్రమాల కోసం బలవంతంగా తమ వద్ద డబ్బులు వసూలు చేస్తున్నారని విద్యార్థులు ఆవేదన చెందుతున్నారు.