‘స్కిల్‌’ సూత్రధారి చంద్రబాబే : పైలా

అనంతపురం క్రైం: స్కిల్‌ డెవలప్‌మెంట్‌ స్కామ్‌ సూత్రధారి టీడీపీ అధినేత చంద్రబాబేనని, ఈ కుంభకోణంలో ఆయన కటకటాలకెళ్లడం ఖాయమని వైఎస్సార్‌సీపీ జిల్లా అధ్యక్షుడు పైలా నరసింహయ్య పేర్కొన్నారు. శనివారం ఆ పార్టీ జిల్లా కార్యాలయంలో ఆయన విలేకరుల సమావేశంలో మాట్లాడారు. నిరుద్యోగులకు నైపుణ్యాభివృద్ధి శిక్షణ పేరుతో అప్పటి సీఎం హోదాలో చంద్రబాబు రూ.371 కోట్ల ప్రజాధనాన్ని దోచేశాడని ఆరోపించారు. మొత్తం రూ.3,356 కోట్ల విలువైన ఈ ప్రాజెక్ట్‌లో ప్రభుత్వ వాటా పది శాతం కాగా, సీమెన్స్‌ కంపెనీ 90 శాతం నిధులను భరిస్తున్నట్లుగా నకిలీ ఒప్పందాన్ని సృష్టించారన్నారు. ప్రపంచంలో ఏ ప్రైవేట్‌ కంపెనీ కూడా 90 శాతం నిధులను కేటాయించదనే ఇంగిత జ్ఞానం కూడా చంద్రబాబుకు లేకపోవడం దౌర్భాగ్యమన్నారు. పది శాతం నిధుల పేరుతో ఐదు విడతలుగా నిధులు విడుదల చేసి, స్వాహా చేశారన్నారు. ఈ డబ్బు మొత్తం షెల్‌ ద్వారా హవాలా రూపంలో చంద్రబాబు ఖాతాలో చేరిందన్నారు. ఈ కుంభకోణంపై జీఎస్‌టీ, ఇంటెలిజెన్స్‌, ఈడీ, సీఐడీ అధికారులు దర్యాప్తు చేస్తూ ఆధారాలతో సహా నిందితులను అరెస్ట్‌ చేస్తుంటే.. చంద్రబాబును కాపాడేందుకు టీడీపీ, ఎల్లో మీడియా కక్ష సాధింపు చేస్తున్నారంటూ దుష్ప్రచారం చేస్తున్నాయని మండిపడ్డారు.