గులాబీ మొనగాల్లు దప్ప ఏరే మొగోల్లే లేరా?

పాకిస్తాన్ను శెముటలు పోపిచ్చినోడు దేశమ్‌ల ఎవ్వలన్న ఉన్నరంటె ఒక్క మోడే ... సిగ్రెట్‌ ముట్టిచ్చి అరుగు మీద గూసొని ముచ్చెట మొదలువెట్టిండు మా తాలుక పువ్వు గుర్తు పార్టి లీడర్‌ లస్మయ్య.

ఎక్కన్నొ వున్న దేశెం సంగతెందుకు తీ... పక్క రాశ్టంలున్న చెంద్రాలును నిద్దుర వోకుంట చేసినయిన మా కేసియార్‌ సారు. గులాబి పార్టి దప్ప ఎకేరే పార్టి లేకుంట శేసిన మొనగాడు.. కవుంటరిచ్చిండు గులాబి పార్టి యూత్‌ లీడర్‌ సాగర్‌

రోజు పొద్దూకినంక మాపల్లె దోస్తులం బొడ్రాయి కాడి రాలె శెట్టు కింద గూసొని అదోటిదోటి శెప్పుకుంటం. గట్లనె ఇయ్యల్ల గూసొంగనే ఎంపి ఎలశ్చన్ల ఎవ్వలు గెలుస్తర నుకొంటన్రని నేనే మాటగలిపిన. ఎంటనె ఈల్లిద్దరు అందుకున్నరు.

దేశెంల మొగోడంటె మోడే. లంచాలు, లత్కోరు పన్లు అయినకవుసురవే లేదు. మల్ల పదాన మంతిరి ఆయినే అయితడు..  సిగ్రెట్‌ దమ్ము గుంజి పొగ ఇడుసుకుంట శెప్పవట్టిండు లస్మయ్య

ఇంకేడి పదానమంతిరే. దేశెంల రూపాలను మార్సుడు తోటె సగం ఇజ్జతి వోయింది. నల్లపైసల్ని తెల్లగ జేసుడేందో తెల్వదు గని ఉన్న పైసలు బ్యాంకులల్ల లేకుంట వోయినయి. బ్యాంకుల్ని ముంచినోల్లందర్ని దేశెం దాటిచ్చిండు. ఎలశ్చన్ల ఓడిపోవుడు రొండేండ్ల కెల్లె షురవయింది... పేపర్లల్ల సదివిన సంగతులు యాజ్జేసుకుంట లొల్లివెట్టినట్టే శెప్పిండు సాగరు.

లస్మయ్య ఏదో అనవోతంటె ఆపి... నిన్న మాసారు కర్నారంల శెప్పింది ఇన్లేదా? దేశెంల అగ్గిరాజేత్తనన్నడు. పదారు శీట్లు గెల్శి రాశ్టం కెల్లి దేశానికివోతండు. పదాన మంతిరి అయినా అవ్వచ్చు... ఇన్నవు గదా స్పీచు ..

‘దేశెమంటె తెలంగాననా ఏంది? ఇయ్యల్ల రాశ్టం, దేశెం ఏదన్న గాని ... ఒక్కటె మాట. మోడి మల్లత్తనె  దేశెం  మంచిగుంటదని. కేíసీయారుకు పదారు శీట్లత్తెనె పీయెం అయితడా ? ఈడ గుడ ఈ తాప పువ్వు గుర్తుకె ఓటెత్తరు. పది సీట్లన్న గెలుస్తం’ లస్మయ్య తగ్గకుంట వాదిచ్చుడు స్టాట్‌ జేసిండు. ‘ఈడ టీఆరెస్సుకు ఆల్టర్నేటు మేమే. పోటిచ్చేది, గెల్శేది సుత పువ్వు పార్టే’ అన్నడు.

గీ మాటలు నా శిన్నప్పట్కెల్లి ఇంటన్న . ఎన్కటికి మా తాత చెప్పెటోడు. ‘ఆడు లేత్తె మన్షిగాడని..’ గట్లున్నది నీ లెక్క. మొన్న ఎమ్మెల్లె ఎలశ్చన్ల గదే మాటంటిరి. ఉన్న ఐదింటికి ఒక్కటె మిల్గె. ఏడ డిపాసిట్లు రాకపాయె.  గిప్పుడే లెక్కన ఎంపి శీట్లు గెలుత్తరో? ఎగసెక్కంగ మాట్లాడిండు సాగర్‌

ఈల్లిద్దరి మాటలింటన్న నాకు సమజ్‌గాలె... పువ్వు గుర్తు, కమలం గుర్తేనా దేశెమ్ల ఉన్నయ్‌? మూడురంగుల పార్టి మీ లెక్కల లేదా ఏంది? నేనడిగిన నేను..

సాగర్‌ అందుకుంట... గా పార్టి గుడ గంతె గదనె అన్న. మేం గెలుత్తం... సీయెంల మయితం అన్నోల్లంత పత్తలెకుంట వోయిరి. ఇగ గెల్శినోల్లంత మాకాడికే రావట్టిరి. వున్నోల్లు గుడ శివరాకరికి... మూడు రంగులను గులాబి పార్టిల కలిపేత్తరంట. గీ ఎలశ్చన్లనంగనె ఇండ్లల్ల పండుకున్న లీడర్లంత మల్ల లేశిన్రు.  ఆల్లు గుడ ఎంపిలమయితం అంటన్రు. గా పార్టిల మిగిల్న మొన గాడెవ్వలొ అర్దవయితలే.. అన్నడు శెట్టు కిందికెల్లి లేసుకుంట.

అంటె రాశ్టమె గాదు... దేశెమ్ల ఎలశ్చన్లయితె సుత పదారు సీట్లతోటి గులాబి పార్టేనా శక్రాలు తిప్పేది. పువ్వు గుర్తు పార్టి, మూడు రంగుల పార్టిలకు ఈడ ïశీట్లు రావా? పదారుకు పదారు గెలిత్తె ఈడున్న పార్టీలన్ని ఏంగావాలె? కమ్మునిస్టుల్లెక్క ఉద్దెమాలకేనా? గీ పార్టిలను లేపె మొగోడు, మొనగాడె లేడా..? నా బుర్రల రీల్లు తిరుగుతంటె ఇంటి మొకం బట్టిన. - పోలంపల్లి ఆంజనేయులు, సాక్షి ప్రతినిధి, కరీంనగర్‌