నేను బాగుండటం ఇష్టం లేదా : వడివేలు

పెరంబూరు:  హాస్య నటుడు వడివేలు  పేరు విని చాలా కాలమైంది. హాస్యనటుడిగా ఓహో అని వెలిగిన వడివేలు గత శాసనసభ ఎన్నికల్లో డీఎంకేకు మద్దతుగా ప్రచారం చేశారు. అయితే ఆ ఎన్నికల్లో డీఎంకే పార్టీ ఓటమి పాలైంది.ఆ తరువాత నటుడు విజయకాంత్‌తో వైరం వల్ల అటు రాజకీయాలకు, ఇటు సినిమాలకు దూరం అయిన పరిస్థితి. కాగా వైగైపులిగా పిలవబడే వడివేలు గురువారం జరిగిన లోక్‌సభ ఎన్నికల్లో ఓటు హక్కు వినియోగించుకున్నారు. ఈ సందర్బంగా ఆయన్ని మీడియా చుట్టు ముట్టింది. వడివేలు మాట్లాడుతూ ఈ ఎన్నికలు ఒక పెద్ద ఉత్సవానికి సమం అని పేర్కొన్నారు. ప్రజలు  తెలివిగా ఉన్నారని పేర్కొన్నారు. ఈ ఎన్నికలు పూర్తి అయిన తరువాత ప్రజలకు మంచి కాలం రాబోతోందని అన్నారు. ఎవరు అధికారం చేపట్టినా ప్రజలకు మంచి చేయాలని అన్నారు. ఈ ఎన్నికల్లో మీరు ఏ పార్టీకి మద్దతుగా ప్రచారం చేయకపోవడానికి కారణం ఏమిటన్న ప్రశ్నకు బదులిస్తూ తాను బాగుండడం ఇష్టం లేదా? అని వడివేలు ప్రశ్నించారు. మిమ్మల్ని ఎవరూ ఆహ్వానించలేదా? అన్న ప్రశ్నకు అదంతా ఇప్పుడెందుకు? చిత్రం పూర్తి అయ్యింది. నమస్కారం చెబుతాం అని ఆయన ఆన్నారు.