పరిచయస్తులే.. పైశాచికత్వంతో..

నెల్లూరు నగరంలోని కరెంట్‌ ఆఫీస్‌ సెంటర్‌. ఎనిమిదేళ్ల బాలికపై ఓ కామాంధుడు లైంగిక దాడికి తెగబడ్డాడు. ఇదే నగరంలోని బట్టల దుకాణంలో పనిచేస్తున్న కోవూరు ప్రాంత బాలికను అదే ప్రాంతానికి చెందిన ఆటో డ్రైవర్‌ చంపేస్తానని బెదిరించి కామవాంఛ తీర్చుకున్నాడు. నెల్లూరు రూరల్‌ మండలానికి చెందిన ఓ బాలికను గౌడ్‌ హాస్టల్‌ సెంటర్‌కు చెందిన ఖాజామస్తాన్‌ అనే యువకుడు ప్రేమిస్తున్నానంటూ మాయమాటలు చెప్పాడు. ఆనక లైంగిక దాడికి పాల్పడ్డాడు. పడారుపల్లి సుందరయ్య కాలనీలో కామంతో కళ్లు మూసుకుపోయిన ఓ తండ్రి కన్న కూతురుపైనే అఘాయిత్యానికి ఒడిగట్టాడు. ఇలా చెప్పుకుంటూ వెళితే.. రక్త సంబంధీకులు, సమీప బంధువులు, తెలిసిన వారి పైశాచికత్వానికి బలైపోతున్న బాలికల ఉదంతాలు అనేకం ఉంటున్నాయి. బాధితుల్లో 90 శాతం మంది 5 నుంచి 13 ఏళ్లలోపు వారు ఉండటం ఆందోళన కలిగిస్తోంది.           – నెల్లూరు క్రైం

సాక్షి, నెల్లూరు: పైశాచికత్వం పెరుగుతోంది. బాలికలపై లైంగిక దాడులకు కారణమవుతోంది. అయినవారూ అఘాయిత్యాలకు ఒడిగడుతున్నారు. ఇంటాబయట భద్రత కొరవడటంతో బాలికలు బిక్కుబిక్కుమంటున్నారు. ఘోరం జరిగాక.. అగ్ని‘పరీక్ష’లు నిర్వహించి నిందితులు ఎంతటి వారైనా వదిలేదిలేదని అధికారులు, పాలకులు ప్రకటనలిస్తున్నారే తప్ప వీటి నిరోధానికి పటిష్టమైన చర్యలు చేపట్టలేకపోతున్నారు. 

ఆడపిల్లలపై అయినవారే అఘాయిత్యాలకు ఒడిగట్టడం సభ్యసమాజాన్ని తలదించుకునేలా చేస్తోంది. విద్యాబుద్ధులు నేర్చుకునేందుకు చిన్నారులను పాఠశాలలకు పంపితే.. కీచక గురువులు లైంగిక వేధింపులకు పాల్పడుతున్నారు. మనుమరాలి వయసున్న బాలికలపై లైంగికదాడి చేస్తున్న వృద్ధులూ లేకపోలేదు. కన్నతండ్రే కామంతో కళ్లు మూసుకుపోయి చిన్నారులను చిదిమేస్తున్న ఘటనలున్నాయి. బాలల రక్షణ కోసం పనిచేయాల్సిన చైల్డ్‌ వెల్ఫేర్‌ కమిటీల ప్రతినిధులు ఘటన జరి గిన అనంతరం హడావుడి చేయడంతో సరిపెడుతున్నారు. రికార్డుల పరంగా గడచిన 10 నెలల్లో  43 కేసులు నమోదయ్యాయి. అనేకమంది చిన్నారులు లైంగిక వేధింపులకు గురవుతున్నా పరువుపోతుందనే ఉద్దేశ్యంతో పోలీసుల వరకు  రావడం లేదు.

పరిచయస్తులే..
చిన్నారులపై లైంగిక దాడులు అధికం కావడాన్ని జాతీయ నేర రికార్డుల బృందం తీవ్రంగా పరిగణించి కేంద్రానికి నివేదిక ఇచ్చింది. హోం మంత్రిత్వ శాఖ, మహిళా శిశు సంక్షేమ శాఖల అధికారులు సంయుక్తంగా నేరాలను విశ్లేషించారు. గ్రామీణ, పట్టణ ప్రాంతాల్లో లైంగిక వేధింపులు ఎదుర్కొన్న, ఎదుర్కొంటున్న చిన్నారుల వయస్సు 5నుంచి12 ఏళ్లలోపు ఉందని తేల్చింది. ఇందులో 30 శాతం మంది లైంగిక దాడులకు గురవుతుండగా.. 40 శాతం మందిపై లైంగిక దాడి యత్నాలు జరిగాయని వెల్లడించింది. చిన్నారులను లైంగికంగా వేధించిన వారిలో 90 శాతం మంది వారికి పరిచయస్తులేనని స్పష్టం చేసింది.

చట్టాలున్నా..
నైతిక విలువలు, కట్టుబాట్లు లేని నడవడిక.. పర్యవేక్షణ కరువైన యువత పెడదారి పడుతున్నారు. అంతర్జాలం అందుబాటులోకి వచ్చాక పరిస్థితి విషమంగా మారుతోంది. పాఠశాలల్లోనే విద్యార్థులు మొబైల్‌లో అశ్లీల వీడియోలు చూడటం సర్వసాధారణ అంశంగా మారింది. లైంగిక దాడులు అధికమవుతున్న నేపథ్యంలో కేంద్ర ప్రభుత్వం 2012 నవంబర్‌ 26న ప్రొటెక్షన్‌ ఆఫ్‌ చిల్డ్రన్‌ ఫ్రమ్‌ సెక్సువల్‌ అఫెన్స్‌ (ఫోక్సో) చట్టాన్ని అమలులోకి తెచ్చింది. సాధారణ సెక్షన్ల మాదిరే ఉన్నా ఈ చట్టంలోని క్లాజ్‌లు చాలా కఠినంగా ఉంటాయి. 

ఈ చట్టం కింద కేసు నమోదైతే 13ఏళ్ల వరకు జైలుశిక్ష పడే అవకాశాలున్నాయి. ప్రభుత్వ అధికారులు, ఉద్యోగులు ఇలాంటి అఘాయిత్యాలకు పాల్పడితే మరింత ఎక్కువ శిక్ష పడే అవకాశం ఉండే విధంగా ఈ చట్టాన్ని రూపొందించారు. 18 ఏళ్లలోపు బాలికలు లైంగిక వేధింపులకు గురైతే ఈ కేసులను ఫోక్సో చట్టం కింద నమోదు చేస్తారు. గడచిన ఐదేళ్లలో ఫోక్సో యాక్ట్‌ కింద జిల్లాలో సుమారు 225 కేసులు నమోదయ్యాయి. 

ఈ జాగ్రత్తలు తీసుకోవాలి
ప్రస్తుత పరిస్థితులపై తల్లిదండ్రులు పిల్లలకు అవగాహన కల్పించాల్సి. పిల్లలు ఏ విషయాన్ని అయినా తమతో చెప్పుకునేలా వారిని తీర్చిదిద్దాలి. వారితో అధిక సమయం గడపాలి. పదేళ్లలోపు పిల్ల లను పాఠశాలలు, ట్యూషన్లకు పంపే సమయంలో పలు అంశాలను గమనించాలి. ఆడుకునే సమయంలో ఎక్కడిక్కెడకు వెళుతున్నారు? ఎవరితో ఎక్కువగా మాట్లాడుతున్నారనే విషయాలను గమనించాలి. అపరిచితులు, ఆకతాయిలు ఆటపట్టించినా.. అసభ్యకరంగా ప్రవర్తించి ఇబ్బందులు పెట్టినా వెంటనే తమ దృష్టికి తీసుకొచ్చేలా తల్లిదండ్రులు తర్ఫీదు నివ్వాలి. ఆడపిల్లలు తమను తాము రక్షించుకునేందుకు అవసరమైన ఆత్మరక్షణ విద్యలు నేర్పాలి. పిల్లలపై అతిగా ప్రేమ చూపిస్తున్నట్లు నటించే వారిపై కన్నేసి ఉంచాలి. అజ్ఞాత వ్యక్తుల నుంచి ఎలా కాపాడుకోవాలి, అనుకోని పరిస్థితులు ఎదురైనప్పుడు కుటుంబ సభ్యులకు, 100 నంబర్‌కు ఫోను చేసేవిధంగా శిక్షణ ఇవ్వాలి.

విలువలు బోధించాలి 
పిల్లలు మగవారైనా.. ఆడవారైనా చిన్నతనం నుంచీ నైతిక విలువల్ని బోధించాలి. ఏది మంచి.. ఏది చెడో తెలుసుకునేలా వారిని తీర్చిదిద్దాలి. అందుబాటులో ఉన్న ఆధునిక సాంకేతిక పరిజ్ఞానాన్ని అందిపుచ్చుకోవడంలో తప్పు లేదు. దానిని తప్పుడు పనులకు ఉపయోగించడం నేరం. చదువుకోవాల్సిన పిల్లలు నీలి చిత్రాలు చూసి పాడైపోతున్నారు. పిల్లలు అలాంటి వాటికి దూరంగా ఉండాలి.
                                           –కె.బాలచెన్నమ్మ, ఉపాధ్యాయిని, నెల్లూరు

అప్రమత్తంగా ఉండాలి 
చిన్నారులపై లైంగిక వాంఛ కలిగి ఉండటం ఒక మానసిక వ్యాధి. దీనిని ఫీడోఫీలియా అంటారు. సాధారణ వ్యాధుల్లా దీనిని గుర్తించలేం. లైంగిక సామర్థ్యంపై విశ్వాసం లేనివారు, వయసు పైబడిన వారిలో ఈ లక్షాణాలు ఉంటాయి. అలాంటి వారిని గుర్తించి ముందే కౌన్సెలింగ్‌ ఇవ్వాలి. వారితో పిల్లలు మెలుగుతుండేప్పుడు తల్లిదండ్రులు జాగ్రత్త పడాలి. స్వీట్లు, చాక్లెట్లు ఇచ్చి పిల్లలను మచ్చిక చేసుకునే వారి విషయంలో జాగ్రత్త వహించాలి. వారి ప్రవర్తనను పరిశీలించి పిల్లలను ఎడ్యుకేట్‌ చేయాలి.                 – డాక్టర్‌ శ్రీనివాసతేజ, మానసిక వైద్య నిపుణులు, నెల్లూరు

కఠిన చర్యలు తప్పవు 
చిన్నారులపై లైంగిక దాడులకు  పాల్ప డితే కఠిన చర్యలు తప్పవు. ఫోక్సా యాక్ట్‌ కింద కేసులు నమోదు చేస్తున్నాం. ఈ చట్టం కింద కేసులు నమోదైతే శిక్షలు కఠినంగా ఉంటాయి. ఆడపిల్ల లు తమను తాము కాపాడుకునేందుకు దోహదపడే ఆత్మరక్షణ విద్యలు, మెళకువలను తల్లిదండ్రులు నేర్పించాలి. ఫోక్సా చట్టంపై వారు  అవగాహన కల్గి ఉండాలి. అనుకోని ఘటన జరిగితే వెంటనే పోలీసులకు ఫిర్యాదు చేయాలి.
                                – కె.శ్రీనివాసాచారి, డీఎస్పీ, మహిళా పోలీస్‌ స్టేషన్, నెల్లూరు

ఐదేళ్లో నమోదైన కేసులు
2013  --  09
2014  --  68
2015  --  64
2016 --   41
2017  --43