పెళ్లి చేసుకో లేదంటే.. నీ తల్లిదండ్రులు చనిపోతారు!

అమీర్‌పేట: తనను పెళ్లి చేసుకోవాలని, లేని పక్షంలో నీ తల్లిదండ్రులు చనిపోతారని ఓ భూత వైద్యుడు యువతిని బెదిరించి లైంగికదాడికి పాల్పడిన సంఘటన ఎస్‌ఆర్‌నగర్‌ పోలీస్‌స్టేషన్‌ పరిధిలోని బోరబండలో ఆలస్యంగా వెలుగులోకి వచ్చింది. ఇన్స్‌పెక్టర్‌ మురళీకృష్ణ కథనం మేరకు వివరాలు ఇలా ఉన్నాయి. బోరబండకు చెందిన దంపతులు తమ కుమార్తె(19)తో కలిసి కొద్ది రోజుల క్రితం మల్లేపల్లి ప్రాంతానికి చెందిన భూతవైద్యుడు ఆదంను కలిసి తాము ఏ పని చేసినా కలిసి రావడం లేదని అందుకు పరిష్కారం చెప్పాలని కోరారు. దీంతో ఆదం కొద్ది రోజుల పాటు వారిని తన చుట్టు తిప్పుకుని ప్రార్థనలు, పూజలు చేశాడు. ఇంట్లో దయ్యం ఉందని, దాన్ని వదిలిస్తే కాని మంచి జరగదని చెప్పాడు. అతడి సూచన మేరకు సదరు దంపతులు తమ కుమార్తెతో పాటు, ఆదంతో కలిసి  రెండుసార్లు బీదర్‌లోని ఓ దర్గాకు వెళ్లారు.

ఈ సందర్భంగా ఆదం యువతిని తనను పెళ్లి చేసుకోవాలని, లేని పక్షంలో మీ తల్లిదండ్రులు చనిపోతారని భయపెట్టాడు. ఈ నెల 11న బోరబండలోని వారి ఇంటికి వెళ్లిన ఆదం ప్రార్థనల పేరుతో యువతిని గదిలోకి తీసుకెళ్లి లైంగికదాడికి పాల్పడ్డాడు. బాధితురాలు ఈ విషయాన్ని తన పెద్దమ్మకు చెప్పడంతో ఆమెగురువారం రాత్రి పోలీసులకు ఫిర్యాదు చేసింది. కేసు నమోదు చేసుకున్న పోలీసులు పరారీలో ఉన్న ఆదం కోసం గాలిస్తున్నారు.