పెద్దపప్పూరు/శింగనమల: ఇసుక రీచ్‌లపై ప్రత్యేక నిఘా ఉంచినట్లు కలెక్టర్‌ డాక్టర్‌ వినోద్‌కుమార్‌ అన్నారు. సోమవారం ఆయన పెద్దపప్పూరు సమీపంలోని ఇసుక రీచ్‌తో పాటు బుక్కరాయసముద్రం మండలం కొర్రపాడు వద్ద ఉన్న ప్రభుత్వ ఇసుక రీచ్‌లను తనిఖీ చేశారు. ఇసుక నాణ్యతను పరిశీలించారు. అనంతరం అధికారులతో కలెక్టర్‌ మాట్లాడారు. రీచ్‌లలో అక్రమ తవ్వకాలు, రవాణాకు తావు లేకుండా సీసీ కెమెరాలు ఏర్పాటు చేయాలని సూచించారు. ఇసుకను అక్రమంగా తరలిస్తున్న వాహనాలను సీజ్‌ చేసి, నిందితులపై కేసులు నమోదు చేయాలన్నారు. ఎక్కడైనా ఇసుక అక్రమ తవ్వకాలు జరిగితే dmgoatpsandcomplaints @ yahoo.com మెయిల్‌కు ఫిర్యాదు చేయాలని ప్రజలను కోరారు. ఫిర్యాదుల స్వీకరణకు టోల్‌ఫ్రీ నంబర్‌ ఏర్పాటు చేయాలని అధికారులను ఆదేశించారు. కార్యక్రమంలో మైన్స్‌ డీడీ నాగయ్య, సెబ్‌ అసిస్టెంట్‌ ఎన్‌ఫోర్స్‌మెంట్‌ సూపరింటెండెంట్‌ శ్రీరామ్‌, గ్రౌండ్‌ వాటర్‌ డీడీ తిప్పేస్వామి, పొల్యూషన్‌ కంట్రోల్‌ బోర్టు ఈఈ కిషోర్‌ రెడ్డి, మైన్స్‌ ఏజీ ఆదినారాయణ, తహశీల్దార్‌ రాజశేఖర్‌, తదితరులున్నారు.

జిల్లాపై వరుణుడి కరుణ కొనసాగుతోంది. ఆదివారం రాత్రి నుంచి సోమవారం ఉదయం వరకూ 28 మండలాల పరిధిలో 20.1 మి.మీ సగటు వర్షపాతం నమోదైంది. రాత్రి అనంతపురం నగరంలో వాన దంచికొట్టింది. భారీ వర్షంతో నగర వాసులకు ఉక్కపోత నుంచి ఉపశమనం లభించింది. వారం నుంచి వర్షాలు పడుతున్న నేపథ్యంలో ఖరీఫ్‌ సాగుకు అన్నదాతలు సన్నద్ధమవుతున్నారు. ముఖ్యమంత్రి వైఎస్‌ జగన్‌ సర్కారు ఉమ్మడి జిల్లా వ్యాప్తంగా రూ.356 కోట్ల మేర ఇన్‌పుట్‌ సబ్సిడీ విడుదల చేయడంతో సాగు ఖర్చులకు ఉపయోగపడుతోందని పలువురు రైతులు తెలిపారు. కాగా, జూన్‌ మొదటి వారంలోపే రుతుపవనాలు జిల్లాలోకి ప్రవేశించే అవకాశం ఉన్నట్లు రేకులకుంట వ్యవసాయ పరిశోధనా స్థానం ప్రధాన శాస్త్రవేత్త డాక్టర్‌ బి.సహదేవరెడ్డి, సీనియర్‌ శాస్త్రవేత్త డాక్టర్‌ జి.నారాయణస్వామి తెలిపారు. ఖరీఫ్‌లో సాధారణం కన్నా అధికంగా వర్షపాతం నమోదవుతుందని ‘చల్లని కబురు’ వినిపించారు. – అనంతపురం అగ్రికల్చర్‌/ సాక్షి ఫొటోగ్రాఫర్‌, అనంతపురం

రాయదుర్గంటౌన్‌: రాయలేలిన రాయదుర్గంలోని పలు ఆలయాల్లో అడుగడుగునా శిల్పకళా సంపద ఉట్టిపడుతోంది. పూర్వం రాయదుర్గం ప్రాంతాన్ని మహామంత్రి తిమ్మరుసు తమ్ముడు గోవిందామాత్యుడు పాలించినట్లుగా ఇక్కడి శాసనాల ద్వారా తెలుస్తోంది. రాజులు పోయారు. రాజ్యాలు పోయాయి. అయినా నాటి మధుర జ్ఞాపకాలు మాత్రం ఆహ్లాదాన్ని పంచుతున్నాయి. ప్రసన్న వేంకటరమణస్వామి, జంబుకేశ్వరస్వామి, దశభుజ గణపతి, లక్ష్మీనరసింహస్వామి, కోదండరామస్వామి, మాధవరాయస్వామి, రససిద్దేశ్వరస్వామి ఆలయాలతోపాటు ఇతర కట్టడాలు చూడమనోహరంగా ఉన్నాయి. అరుదైన పాదరస శివలింగం, లక్ష్మమ్మ సమాధిని కూడా ఇక్కడ చూడవచ్చు.

తాడిపత్రి అర్బన్‌: తాడిపత్రిలో శాంతి భద్రతలు అదుపులోకి వచ్చినా ఇంకా పోలీసు బందోబస్తు కొనసాగుతూనే ఉంది. 24 గంటలూ పోలీసు బలగాలు అప్రమత్తంగా ఉంటూ ఎక్కడికక్కడ తనిఖీలు, గస్తీలు నిర్వహిస్తున్నారు. అవాంఛనీయ ఘటనలకు తావు లేకుండా పలు చోట్ల పికెటింగ్‌లు ఏర్పాటు చేశారు. సోమవారం డీఐజీ షిమోషి, ఎస్పీ గౌతమిశాలి ఆదేశాలతో పట్టణ వీధుల్లో స్థానిక పోలీసులతో పాటు ర్యాపిడ్‌ యాక్షన్‌ ఫోర్సు, ఏపీఎస్పీ బలగాలు, ఏఆర్‌ బలగాలు ఫ్లాగ్‌ మార్చ్‌ చేపట్టాయి. అశోక్‌ పిల్లర్‌ వద్ద ప్రారంభమైన ఫ్లాగ్‌ మార్చ్‌ సమస్యాత్మక ప్రాంతాలైన బండామసీద్‌, చిన్న బజార్‌, కటికవీధి, సుంకులమ్మపాలెం, అంబేడ్కర్‌ సర్కిల్‌, గన్నెవారిపల్లి కాలనీ, యల్లనూరు రోడ్డు సర్కిల్‌, పుట్లూరు రోడ్డు సర్కిల్‌ మీదుగా అర్బన్‌ పోలీస్‌ స్టేషన్‌ వరకూ సాగింది. కార్యక్రమంలో అదనపు ఎస్పీలు ఆర్‌ విజయ్‌బాస్కర్‌రెడ్డి,జి.రామకృష్ణ, డీఎస్పీలు బి.శ్రీనివాసులు, శివభాస్కర్‌రెడ్డి, బీవీ శివారెడ్డి, యు.నరసింగప్ప, శ్రావణ్‌కుమార్‌ తదితరులు పాల్గొన్నారు. తాడిపత్రి డీఎస్పీగా జనార్దన నాయుడు అనంతపురం/తాడిపత్రి అర్బన్‌: తాడిపత్రి డీఎస్పీగా కే.జనార్దన నాయుడును నియమించారు. ఏలూరు సెబ్‌ డీఎస్పీగా ఉన్న ఆయన్ను ఇక్కడికి బదిలీ చేశారు. అలాగే, అనంతపురంలో వీఆర్‌లో ఉన్న పి. నాగేంద్ర ప్రసాద్‌ను తాడిపత్రి సీఐగా నియమించారు. ఆయనతో పాటు వీఆర్‌లో ఉన్న విశ్వనాథ చౌదరిని తిరుపతి జిల్లా ఎస్‌బీ ఇన్‌స్పెక్టర్‌గా, శ్రీ సత్యసాయి జిల్లాలో వీఆర్‌లో ఉన్న ఎం. రామారావును తిరుపతి జిల్లా అలిపిరి పోలీసుస్టేషన్‌ ఇన్‌స్పెక్టర్‌గా బదిలీ చేశారు. ఈ మేరకు రాష్ట్ర ఎన్నికల అధికారి ఉత్తర్వులు జారీ చేశారు. పోలింగ్‌ సందర్భంగా తాడిపత్రిలో చోటు చేసుకున్న అల్లర్లను అదుపు చేయడంలో విఫలమయ్యారన్న కారణంతో గతంలో ఇక్కడ పనిచేస్తున్న డీఎస్పీ గంగయ్య, అర్బన్‌ సీఐ మురళీ కృష్ణపై ఎన్నికల సంఘం సస్పెన్షన్‌ వేటు వేసిన విషయం తెలిసిందే. 23న క్యాంపస్‌ డ్రైవ్‌ అనంతపురం ఎడ్యుకేషన్‌: హోండా మోటార్‌సైకిల్‌, స్కూటర్‌ ఇండియా ప్రైవేట్‌ లిమిటెడ్‌ ఆధ్వర్యంలో ఈనెల 23న అనంతపురంలోని ప్రభుత్వ బాలుర ఐటీఐలో క్యాంపస్‌ డ్రైవ్‌ చేపడుతున్నట్లు ప్రిన్సిపాల్‌ రామమూర్తి తెలిపారు. ఈ మేరకు సోమవారం ఆయన ఓ ప్రకటన విడుదల చేశారు. ఐటీఐ పూర్తి చేసిన, చివరి సంవత్సరం చదువుతున్న విద్యార్థులు తమ బయోడేటాతో పాటు పదో తరగతి, ఐటీఐ మార్కుల మెమో, ఆధార్‌కార్డు, ఫొటోలు, పాన్‌కార్డ్‌, బ్యాంక్‌ పాస్‌బుక్‌, కులధ్రువీకరణ పత్రం రెండు సెట్లతో హాజరుకావాలని కోరారు. జీతం రూ. 14,074 నుంచి రూ.17,400 వరకు ఉంటుందన్నారు. కర్ణాటక రాష్ట్రం కోలార్‌లో పని చేయాల్సి ఉంటుందని వెల్లడించారు. 23న ఉదయం 10 గంటలకు అనంతపురంలోని ఐటీఐకు చేరుకోవాలని సూచించారు. 23న ఉద్యోగమేళా అనంతపురం: స్థానిక ఉప్పరపల్లి రోడ్డులో ఆర్డీటీ స్టేడియం ఎదురుగా ఉన్న ఏఎఫ్‌ ఎకాలజీ సెంటర్‌లో ఈ నెల 23న ఉద్యోగ మేళా నిర్వహిస్తున్నట్లు డైరెక్టర్‌ డాక్టర్‌ వై.వీ.మల్లారెడ్డి తెలిపారు. ఆయన తెలిపిన మేరకు.. అమరరాజా స్కిల్‌ డెవలప్‌మెంట్‌ సెంటర్‌లో రెండు సంవత్సరాల ఉచిత టెక్నికల్‌ శిక్షణ అనంతరం ఉద్యోగావకాశాలు కల్పిస్తారు. పదో తరగతి పాస్‌/ఫెయిల్‌, ఇంటర్‌ పాస్‌/ఫెయిల్‌, ఐటీఐ పాస్‌/ ఫెయిల్‌ (ఏ ట్రేడ్‌ అయినా) ఉద్యోగ మేళాకు అర్హులు. 16 నుంచి 25 సంవత్సరాల మధ్య వయసున్న యువత పాల్గొనవచ్చు. శిక్షణ సమయంలో స్టైఫండ్‌ ఉంటుంది. మొదటి మూడు నెలలు రూ.7,500, తరువాత 9 నెలలు రూ.11,453, చివరి 12 నెలలు రూ.11,653 చెల్లిస్తారు. యువతీ,యువకులకు వేర్వేరు గా హాస్టల్‌ వసతి కల్పిస్తారు. శిక్షణ అనంతరం సర్టిఫికెట్‌ అందజేస్తారు. ఆసక్తి గల వారు తమ రెజ్యూమ్‌ లేదా బయోడేటాతో ఈ నెల 23న జాబ్‌మేళాకు హాజరుకావచ్చు. పూర్తి వివరాలకు సంప్రదించాల్సిన ఫోన్‌ నంబర్లు : 90000 24919, 91004 77371, 77807 52418.

రాయదుర్గంటౌన్‌: పట్టణంలోని కోటలో వెలసిన ప్రసన్న వేంకటరమణస్వామి బ్రహ్మోత్సవాలు సోమవారం ప్రారంభమయ్యాయి. ఉత్సవాల్లో భాగంగా తొలిరోజు స్వామికి ప్రత్యేక పూజలు చేశారు. కలశ స్థాపన, స్వస్తి వాచనము, రక్షా బంధనం తదితర కార్యక్రమాలు భక్తిశ్రద్ధలతో చేపట్టారు. సాయంత్రం పట్టణంలోని మార్కండేయస్వామి ఆలయంలో సంప్రదాయబద్ధంగా కంకణధారణ జరిగింది. వందేళ్ల నుంచి వస్తున్న విశిష్ట సంప్రదాయంలో భాగంగా ఈ నెల 25న జరిగే శ్రీవారి కళ్యాణోత్సవానికి (పద్మశాలియ అరవ తెగకు చెందిన తొమ్మిదేళ్ల బాలికతో వివాహం) సంబంధించి శ్రీవారి నిశ్చితార్థం (కంకణధారణ) నిర్వహించారు. ఈ సందర్భంగా శ్రీవారి తరఫున బ్రాహ్మణులు, పట్టణ ప్రముఖులు, దేవదాయశాఖ అధికారులు, బాలిక తల్లిదండ్రులు, పద్మశాలీయ కులస్తులు తాంబూలాలను ఇచ్చిపుచ్చుకున్నారు. కార్యక్రమంలో పాలకమండలి అధ్యక్షుడు పాలాక్షిరెడ్డి, పద్మశాలీయ సంక్షేమ సంఘం అధ్యక్షుడు అరవ శివప్ప, కార్యదర్శి నాగప్ప, గురురాఘవేంద్ర, తదితరులు పాల్గొన్నారు. ఉత్సవాల్లో భాగంగా మంగళవారం ధ్వజారోహణ, శ్రీవారి సింహవాహనోత్సవం జరుగుతుందని దేవదాయశాఖ అధికారి నరసింహారెడ్డి తెలిపారు. సంప్రదాయబద్ధంగా బాలికతో శ్రీవారి కంకణధారణ