సాక్షి, అమరావతి: దేశంలో తొలిసారిగా ఏడాది పీజీ కోర్సును పీజీ డిప్లొమా పేరుతో అందించేందుకు యూనివర్సిటీ గ్రాంట్స్‌ కమిషన్‌ ప్రతిపాదించింది. నూతన జాతీయ విద్యా విధానంలో భాగంగా పీజీ కోర్సుల కాలపరిమితి, క్రెడిట్స్, కరిక్యులమ్‌తో కూడిన కొత్త నిబంధనల ముసాయిదాను రూపొందించింది. ఇందులో పీజీ కోర్సులను మూడు విధాలుగా డిజైన్‌ చేసింది. ఏడాది, రెండేళ్ల పీజీ, సమీకృత ఐదేళ్ల పీజీ ప్రోగ్రామ్‌లను తీసుకొస్తోంది. ఆనర్స్‌–రీసెర్చ్‌ కాంపోనెంట్‌తో నాలుగేళ్ల బ్యాచి­లర్‌ డిగ్రీ పూర్తి చేసిన విద్యార్థులు ఏడాది మాస్టర్స్‌ ప్రోగ్రామ్‌ చేయొచ్చు. మూడేళ్ల బ్యాచిలర్‌ డిగ్రీ చేసిన విద్యార్థులు రెండేళ్ల పీజీ ప్రోగ్రామ్‌ను కొనసాగించవచ్చు. ఇక్కడ పీజీలో రెండో సంవత్సరం పూర్తిగా పరిశోధనపై దృష్టి సారించేలా కరిక్యులమ్‌­లో మార్పులు చేసింది. పీజీ మొదటి సంవత్సరం తర్వాత ప్రోగ్రామ్‌ నుంచి విద్యార్థులు వైదొలగాలి అనుకుంటే వారికి పీజీ డిప్లొమా అందిస్తుంది. ఇక సమీకృత ఐదేళ్ల బ్యాచిలర్, మాస్టర్స్‌ ప్రోగ్రామ్‌ పెట్టాలని యూడా యూజీసీ సూచించింది.  నచ్చిన సబ్జెక్ట్‌లో పీజీ  నాలుగేళ్ల యూజీ ప్రోగ్రామ్‌లో ఒక విద్యార్థి భౌ­తికశాస్త్రం మేజర్‌గా, ఆర్థిక శాస్త్రం మైనర్‌ సబ్జెక్టుగా తీసుకుంటే.. కొత్త విధానం ప్రకారం ఈ విద్యార్థి మేజర్, మైనర్‌లో దేనిలోనైనా పీజీలో చేరవచ్చు. మరోవైపు ఒకేసారి రెండు పీజీ కోర్సులు అభ్యసించే సౌలభ్యాన్ని కూడా యూజీసీ కలి్పస్తోంది. ఇందు కోసం ఆన్‌లైన్‌/ఆఫ్‌లైన్‌/దూరవిద్య లేదా ఆన్‌లైన్, ఆఫ్‌లైన్‌ మోడ్‌లతో ఏర్పడిన హైబ్రీడ్‌ విధానాల్లో చదువుకునేలా ప్రతిపాదించింది. మెషిన్‌ లెర్నింగ్, మల్టిడిసిప్లినరీ ఫీల్డ్‌ వంటి కోర్‌ ఏరియాలలో కృత్రిమ మేధ కాంబినేషన్‌లో వ్యవసాయం, వైద్యం, న్యాయ విద్యలో పోస్ట్‌ గ్రాడ్యుయేట్‌ ప్రోగ్రామ్‌లను అందించాలని సిఫార్సు చేసింది. ఇక స్టెమ్‌ సబ్జెక్టులు అభ్యసించిన విద్యా­ర్థు­లు సైతం ఎంఈ, ఎంటెక్‌ వంటి సాంకేతిక డిగ్రీల్లో ‘ఏడాది పీజీ’లో చేరేందుకు అర్హు­లని ప్రకటించింది. ఈ అంశాలపై వివిధ వర్గాలు, పౌరుల నుంచి అభిప్రాయం సేకరిస్తున్నట్టు యూజీసీ తెలిపింది.

కోలారు: చదువుల ఒత్తిడి, వేధింపులను తట్టుకోలేక మెడిసిన్‌ పీజీ విద్యార్థిని జీవితం అర్ధాంతరంగా ముగిసిపోయింది. కోలారు తాలూకాలోని నరసాపురం వద్ద ఉన్న క్వారీ నీటి గుంతలో పడి ఆత్మహత్య చేసుకుంది. బళ్లారి నగరానికి చెందిన దర్శిని (25) మృతురాలు. వివరాలు.. దర్శిని బెంగుళూరు రూరల్‌ జిల్లా హొసకోట వద్ద ఉన్న ఎంవిజి మెడికల్‌ కళాశాలలో పీడియాట్రిక్‌ (పిల్లల వైద్యం)లో ఎండీ కోర్సు చదువుతోంది. ఆదివారం ఉదయం 11 గంటల సమయంలో కళాశాల నుంచి బయలుదేరి కోలారు తాలూకా కెందట్టి వద్ద ఉన్న క్వారీ నీటి గుంత వద్దకు చేరుకుంది. చివరిసారిగా తన స్నేహితుడు మణి అనే వ్యక్తికి ఫోన్‌ చేసి కొంతసేపు మాట్లాడింది. తాను చనిపోతున్నట్లు అతనికి చెప్పింది. తరువాత చెప్పులు, ఫోన్‌ను గట్టున పెట్టి క్వారీ నీటి గుంతలో దూకింది. మరోవైపు మణి ఈ విషయాన్ని అందరికి చెప్పి అక్కడికి వెళ్లాలని చెప్పాడు. సాయంత్రం వచ్చి చూసేసరికి శవమై తేలింది. విపరీతమైన పని ఒత్తిడి? చదువులో ప్రతిభావంతురాలైన దర్శిని ప్రభుత్వ కోటాలోనే ఎండీ సీట్‌ దక్కించుకుంది. ఏడాది కిందట తండ్రిని కోల్పోయిన దర్శినికి తల్లి ఉంది. ఊళ్లో ఆస్పత్రి పెట్టి ప్రజలకు సేవ చేయాలని తలచేది. కానీ మెడికల్‌ కళాశాలలో రోజులో 24 గంటలూ తమతో పని చేయించుకుంటున్నారని, విశ్రాంతి అనేదే లేదని తన స్నేహితుని వద్ద ఆవేదన వ్యక్తం చేసింది. కళాశాలలోని సీనియర్‌ వైద్యుడు మహేష్‌ దర్శినిని వేధించేవాడని ఆమె బంధువులు శ్రీనివాస్‌, హనుమంతప్పలు ఆరోపించారు. పోలీసులు, ఫైర్‌ సిబ్బంది కలిసి మృతదేహాన్ని వెలికితీసి సోమవారం ఎంవీజీ ఆస్పత్రిలోనే పోస్టుమార్టం నిర్వహించి బంధువులకు అప్పగించారు. కోలారు రూరల్‌ పోలీసులు కేసు నమోదు చేసి విచారణ చేపట్టారు. వేధించడం వల్లనే: చిన్నాన్న మృతురాలి చిన్నాన్న శ్రీనివాస్‌ మాట్లాడుతూ పిల్లల డాక్టర్‌ కావాలని మా అన్న కూతురు దర్శిని పీడియట్రిక్‌ ఎండీ చేస్తోంది. దర్శినిది చిన్న పిల్లల మనసత్త్వం. సీనియర్‌ వైద్యుల వేధింపుల వల్లనే దర్శిని నీటిలో పడి ఆత్మహత్య చేసుకుంది. దీనికి మెడికల్‌ కళాశాలనే బాధ్యత వహించాలి, ఆమె మృతిపై పలు అనుమానాలు ఉన్నాయి, దీనిపై సమగ్ర దర్యాప్తు జరిపించాలని కోరాడు.

ఫిలింనగర్‌: డాక్టర్‌ బీఆర్‌ అంబేడ్కర్‌ సార్వత్రిక విశ్వవిద్యాలయం కొత్తగా ప్రవేశపెట్టిన పీజీ డిప్లొమా కోర్సుల బ్రోచర్‌ను శనివారం యూనివర్సిటీ వైస్‌ చాన్స్‌లర్‌ ఆచార్య కె. సీతారామారావు ఆవిష్కరించారు. కామర్స్‌ విభాగం ఆధ్వర్యంలో ఈ విద్యాసంవత్సరం నుంచి ప్రవేశ పెట్టిన కోర్సుల్లో పీజీ డిప్లొమా ఇన్‌ ఫైనాన్షియల్‌ మేనేజ్‌మెంట్, పీజీ డిప్లొమా ఇన్‌ మార్కెటింగ్‌ మేనేజ్‌మెంట్, హ్యూమన్‌ రిసోర్స్‌ మేనేజ్‌మెంట్, ఆపరేషన్స్‌ మేనేజ్‌మెంట్‌ కోర్సులు ఉన్నాయని డీన్‌ ఆనంద్‌ పవార్‌ పేర్కొన్నారు. ఆయా కోర్సులకు దరఖాస్తు చేసుకోవడానికి చివరి తేదీ మార్చి 10 అని వెల్లడించారు.  కార్యక్రమంలో అకడమిక్‌ డైరెక్టర్‌ ప్రొఫెసర్‌ ఘంటా చక్రపాణి, ఇ. సుధారాణి, షకీలా ఖానం, వడ్డాణం శ్రీనివాస్, అన్ని విభాగాల అధిపతులు, డీన్స్‌ పాల్గొన్నారు. 

న్యూఢిల్లీ: ఆన్సర్‌ షీట్లను సమర్పించాల్సిందిగా, పునర్మూల్యాంకనం చేయాల్సిందిగా హైకోర్టులు జారీ చేసే ఆదేశాలను అనుమతించలేమని సుప్రీంకోర్టు శుక్రవారం స్పష్టం చేసింది. సంబంధిత చట్టాల్లో ఆ మేరకు నిబంధనలుంటే తప్ప అలాంటి ఆదేశాలు ఇవ్వొద్దని పేర్కొంది. విచక్షణాధికారంతో నిర్దిష్ట ఆదేశాలిచ్చేందుకు రాజ్యాంగంలోని ఆర్టికల్‌ 226 హైకోర్టులకు కల్పించిన అధికారాలను ఈ విషయంలో ఉపయోగించరాదని న్యాయమూర్తులు జస్టిస్‌ ఎంఆర్‌షా, ఎంఎం సుందరేశ్‌లతో కూడిన ధర్మాసనం స్పష్టం చేసింది. కొందరు పీజీ డిప్లొమా విద్యార్థుల ఆన్సర్‌ షీట్ల పునర్మూల్యాంకనానికి ఆదేశిస్తూ 2019లో ఏపీ హైకోర్టు ఇచ్చిన తీర్పును కొట్టేసింది. ఈ విషయంలో సుప్రీంకోర్టు గత తీర్పులను మార్గదర్శకంగా తీసుకోవాలని సూచించింది. 

ఉస్మానియా యూనివర్సిటీ (హైదరాబాద్‌): ఉస్మానియా వర్సిటీ న్యాయశాస్త్ర విభాగం ఆధ్వర్యంలో కొనసాగుతున్న 6 పీజీ డిప్లొమా సాయంకాలం (6 నుంచి 8 గం. వరకు) కోర్సుల్లో ప్రవేశాలకు సోమవారం నోటిఫికేషన్‌ విడుదల చేశారు. ఏడాది కాల వ్యవధితో 2సెమిస్టర్‌ పరీక్షలు గల ఈ పీజీ డిప్లొమా ప్రవేశాలకు 2022, జనవరి 2న ప్రవేశ పరీక్ష జరగనుంది. దీనికోసం ఈనెల 11 నుంచి నవంబర్‌ 12 వరకు దరఖాస్తు చేసుకోవచ్చు. వర్సిటీ క్యాంపస్‌లో కాలేజీతోపాటు బషీర్‌బాగ్‌ పీజీ న్యాయ కళాశాలలో సైబర్‌ లా, టాక్సేషన్‌ అండ్‌ ఇన్సూరెన్స్, ఇన్‌సాల్‌వెన్సీ అండ్‌ బ్యాంక్‌రప్టసీ, ఇంటెలెక్చువల్‌ ప్రాపర్టీ రైట్స్‌ (ఐపీఆర్‌), మోడ్రన్‌ కార్పొరేట్‌ లా, అప్లైడ్‌ హ్యూమన్‌ రైట్స్‌ పీజీ డిప్లొమాలో ప్రవేశాలకు డిగ్రీ పూర్తి చేసిన అభ్యర్థులు అర్హులని అధికారులు పేర్కొన్నారు. ప్రవేశ పరీక్ష ద్వారా 2021–22 విద్యా సంవత్సరానికి అడ్మిషన్లు నిర్వహించనున్నట్లు కన్వీనర్‌ అపర్ణ తెలిపారు. పూర్తి వివరాలకు 81066 78887కు ఫోన్‌ చేసి తెలుసుకోవచ్చన్నారు.