యుద్ధం ముగిసిందని  సిపాయిలు నిద్రపోయారు  విజయం సాధించామని  జనం ఆనందంలో మునిగిపోయారు
 పడుతూ లేస్తూ నడిచినవాళ్లు    జెండాలు పెకైత్తి పట్టుకొన్నారు  కష్టాలను నష్టాలను ఓర్చుకున్నవాళ్లు  కలల్లో తేలియాడారు  దెబ్బలు తిన్నవాళ్లను నెట్టేసుకుంటూ  తెలివైనవాళ్లు  పూలగుచ్ఛాలందుకొన్నారు
  
 తోరణాలు కడుతూ నగరమంతా తిరిగిన కవికి అర్ధరాత్రి ఆకలేసింది  ఎవర్ని పిలిచిన  బహుమతి ప్రదానాల్లో మరిచి ఒక్కరూ తిరిగి చూడలేదు  ఎగిరిపోయిన డైరీ పేజీలు ఏరుకుని  గుర్రాలు పారిపోయిన బగ్గీ పక్కన రాత్రి గడిపాడు  అద్దం పగిలిన గడియారాన్ని ముద్దాడి యుద్ధానికి ముందు వినిపించిన  అగ్గినొకసారి చదువుకొన్నాడు  శత్రు సంహారం తర్వాత కూడా అదే కవిత అవసరమైనందుకు
  మళ్లీ ప్రతిపక్షంలో కూర్చున్నాడు.
  - ఆశారాజు, 9392302245
  
  
  


 ఆనాటి ప్రేమలు వేరు  ఆ కలయికల తీరు వేరు మమతల మాధుర్యం వేరు  మాటలకు విలువలు వేరు
 ఈనాటి పలకరింపులు వేరు సంబంధాలకిచ్చే గౌరవం వేరు పిలిస్తే పలకడం వేరు వెళ్తే స్వాగతాలు వేరు
  పోల్చుకుంటూ పోతే దానికీ దీనికీ పోటీ కుదరదు వాదించుకుంటూ కూర్చుంటే  పంచుకోవడానికి ప్రేమే మిగలదు
  అది అప్పటిదొక కాలం ఇది ఇప్పటిదొక కాలం  అన్నిటినీ పక్కన పెట్టి సర్దుకొని పోవడమే జీవితం
  - ఆశారాజు