‘‘నేను పీజీ వరకు వైజాగ్‌లో చదువుకున్నాను. చిన్నప్పటి నుండి సాహిత్యాభిమానిని. పీజీ కాగానే రెండేళ్లు వ్యాపారం చేసాను. అందులో కిక్‌ దొరకలేదు. ఒక స్నేహితుని ద్వారా అనుకోకుండా చిత్ర పరిశ్రమకు వచ్చాను. ఇదే కరెక్ట్‌ అనిపించింది’’ అని శ్రీనివాస్‌ రవీంద్ర అన్నారు. విజయ్‌ దేవరకొండ, పూజా ఝవేరి జంటగా ఆర్బీ చౌదరి సమర్పణలో రూపొందిన ‘ద్వారక’ చిత్రం ద్వారా దర్శకునిగా పరిచయమవుతున్నారు శ్రీనివాస్‌ రవీంద్ర. ప్రద్యుమ్న చంద్రపాటి–గణేశ్‌ పెనుబోతు నిర్మించిన ఈ చిత్రం వచ్చే నెల 3న విడుదల కానుంది.
 దర్శకుడు శ్రీనివాస్‌ మాట్లాడుతూ – ‘‘తమ్మారెడ్డి భరద్వాజ, దశరద్, శ్రీను వైట్ల తదితరుల దగ్గర అసిస్టెంట్‌గా చేశా, పవన్‌కళ్యాణ్‌గారి దగ్గర ఏడాది పాటు రైటర్‌గా చేశా. దర్శకుడు శ్రీవాస్‌గారికి నాలుగు సంవత్సారాల కిందట ‘ద్వారక’ కథ చెప్పాను. ఆయనకి బాగా నచ్చటంతో మా ఇద్దరికీ పరిచయమైన ప్రద్యుమ్నగారికి చెప్పించారు. కథ విన్న వెంటనే, ఈ సినిమా మనం చేస్తున్నామని, షేక్‌హ్యాండిచ్చి అడ్వాన్సు ఇచ్చారు.
 విజయ్‌ దేవరకొండ అద్భుతంగా నటించాడు. కథ విషయానికి వస్తే, దేవుడు అంటే ఏంటి? అని హీరో ఎప్పుడూ ఆలోచిస్తూ ఉంటాడు. శ్రీకృష్ణుడు దొంగ, రొమాంటిక్‌గా కూడా ఉంటాడు. కానీ, నేను సర్వాంతర్యామి అంటాడు. ఈ సినిమాలో మా హీరో ఎర్రశ్రీనుగా దొంగ పాత్రలో  కనపడతాడు. హీరోయిన్‌ పాత్ర పేరు వసుధ. వసుధతో ప్రేమలో పడ్డ తర్వాత హీరో ఏవిధంగా పరిణతి చెందాడో చెప్పే కథే ఈ సినిమా. ఇది వ్యంగ్య హాస్య చిత్రం. అందరూ చూసే విధంగా ఉంటుంది ’’ అన్నారు.


 - నిర్మాత ఆర్‌బీ చౌదరి
  కుటుంబ సమేతంగా చూడదగ్గ చిత్రాలను అందించడంలో ఎప్పుడూ ముందుండే బ్యానర్ సూపర్‌గుడ్ ఫిలింస్. ఈ సంస్థ అధినేత ఆర్‌బీ చౌదరి సమర్పణలో శ్రీనివాస్ రవీంద్ర(ఎంఎస్‌ఆర్) దర్శకత్వంలో ప్రద్యుమ్న, గణేష్ నిర్మించిన చిత్రం ‘ద్వారక’. విజయ్ దేవరకొండ, పూజా జవేరి జంటగా నటించిన ఈ చిత్రం టీజర్‌ను హైదరాబాద్‌లో విడుదల చేశారు. ఆర్‌బీ చౌదరి మాట్లాడుతూ- ‘‘మా బ్యానర్ ద్వారా ఎంతో మంది ఆర్టిస్ట్స్‌ని, టెక్నీషియన్స్‌ని పరిచయం చేశాం. ‘ద్వారక’తో శ్రీనివాస్‌ను దర్శకునిగా పరిచయం చేస్తు న్నాం.
  
   ప్రద్యుమ్న, గణేష్‌లతో కలిసి ఈ చిత్రానికి అసోసియేట్ అవడం ఆనందంగా ఉంది. ఒక పాట మినహా షూటింగ్ పూర్తయింది. అందరూ చూసేలా ఈ సినిమా ఉంటుంది. సెప్టెంబర్ లేదా అక్టోబర్‌లో విడుదల చేయాలనుకుంటున్నాం’’ అన్నారు. ‘‘సమాజానికి ఉపయోగపడే సినిమాలు అందించే చౌదరిగారితో కలిసి ఈ చిత్రం చేసినందుకు హ్యాపీగా ఉంది’’ అని ప్రద్యుమ్న పేర్కొన్నారు. శ్రీనివాస్ రవీంద్ర, విజయ్ దేవరకొండ, పూజా జవేరి, సంగీత దర్శకుడు సాయికార్తీక్, మాటల రచయిత లక్ష్మీభూపాల్ తదితరులు పాల్గొన్నారు.