హైదరాబాద్ : రోడ్డు ప్రమాదం నుంచి తృటిలో తప్పించుకున్న సినీనటుడు తాను క్షేమంగా ఉన్నట్లు తెలిపారు. అయితే ప్రమాదం జరిగిన మాట  వాస్తవమే కానీ తనకు ఏమీ అవ్వలేదని ఆయన వెల్లడించారు. తానే స్వయంగా కారు డ్రైవ్ చేస్తుండగా.. పూలమాల వచ్చి అద్దం మీద పడిందన్నారు. దాంతో  రోడ్డు సరిగా కనిపించక డివైడర్ ను గుద్దినట్లు బాలయ్య తెలిపారు.
 (సినీనటుడు బాలకృష్ణకు తృటిలో తప్పిన ప్రమాదం) కారు టైరు బ్లాస్ట్ అవ్వడం మినహా నష్టమేమీ జరగలేదని ఆయన పేర్కొన్నారు. తన తండ్రి నందమూరి తారక రామారావు ఆశీస్సులు, తెలుగు ప్రజల ఆశీర్వాదాలు, అభిమానుల నాపై చూపించే ప్రేమే శ్రీరామరక్షగా తాను సురక్షితంగా ఇంటికి చేరుకోగలిగానని బాలకృష్ణ తెలిపారు.
 
  


 అనంతపురం : సినీనటుడు, హిందుపురం ఎమ్మెల్యే బాలకృష్ణకు బుధవారం తృటిలో ప్రమాదం తప్పింది. ఆయన ప్రయాణిస్తున్న వాహనం అదుపు తప్పి డివైడర్ను ఢీకొంది. బాలకృష్ణ వాహనంలో హిందూపురం నుంచి బెంగుళూరు వెళ్తుండగా లారీ ఓవర్‌టేక్ చేయబోయినపుడు పశువు అడ్డు రావడంతో డివైడర్‌ను ఢీకొంది. ఈ ప్రమాదం కర్ణాటకలోని బాగేపల్లి వద్ద చోటుచేసుకుంది. ఈ ఘటనలో వాహనం స్వల్పంగా ధ్వంసమైంది. అయితే ప్రమాదం నుంచి ఆయన క్షేమంగా బయటపడ్డారు. అనంతరం బాలయ్య మరో వాహనంలో బెంగుళూరు వెళ్లిపోయారు.